រាជធានីភ្នំពេញ៖ កីឡាករពុទ្ធ ហ៊ុច មកពីក្លិបពុទ្ធ សេរីវង្ស ព្រែកតាទែន បានធ្វើឱ្យអ្នកទស្សនាភាគច្រើនមានការកោតសរសើរមិនដាច់ពីមាត់ បន្ទាប់ពីកីឡាកររូបនេះបញ្ចេញស្នៀតកែងវាយផ្តួលកីឡាករថៃ Wuthhi Pong Somjit ឱ្យសន្លប់ត្រឹមនៅទី២នៅលើសង្វៀនស្ថានីយទូរទស្សន៍រាជធានីភ្នំពេញប៉ុស្តិ៍លេខ៣កាលពីរសៀលថ្ងៃសៅរ៍ទី២៣ មីនា កន្លងមកនេះ ។
ពុទ្ធ ហ៊ុច គ្រាន់តែជាអ្នកប្រដាល់ជើងថ្មីមួយរូបប៉ុណ្ណោះ ប៉ុន្តែគេមានចិត្តស្លុយខ្លាំងណាស់គ្រាន់តែសំឡេងជួងទឹកទី១បន្លឺឡើងមិនទាន់ផុតផង គេបានបញ្ជូនស្នៀតជើងទាត់សំដៅកណ្តៀតក្អម Somjit លាន់ដូចរន្ទះជាមួយនឹងការបញ្ជូនកណ្តាប់ដៃវាយចូលថែមទៀត ។ Somjit ដែលមានប្រៀបខាងកម្ពស់បន្តិចនោះ បានព្យាយាមវាយសងមកវិញទាំងបង្ខំចិត្ត ប៉ុន្តែដោយសារតែកម្លាំងរបស់គេមានភាពទន់ជ្រាយ ទើបត្រូវពុទ្ធ ហ៊ុច ទាត់ជើងក្រោមឱ្យដួលជាច្រើនលើកច្រើនសានៅចុងទឹកទី១ ពុទ្ធ ហ៊ុច បានវាយចូលមុខ Somjit យ៉ាងពេញទំហឹងរហូតដល់ថ្នាក់ឱ្យគេដួលអុកគូទនៅលើតាពីទាំងជំហរ ហើយត្រូវអាជ្ញាកណ្តាលលោកមាស សុខគ្រីរាប់៨ដង ប៉ុន្តែសំណាងល្អ ព្រោះបានសំឡេងជួងបញ្ចប់ទឹកជួយទាន់ ។ ចូលដល់ទឹកទី២មិនបានពាក់កណ្តាលទឹកស្រួលបួលផងក៏ត្រូវពុទ្ធ ហ៊ុច ពុះ១កែងចំក្បាល Somjit យ៉ាងពេញទំហឹងបណ្តាលឱ្យដួលសន្លប់តែម្តង ។
ដោយឡែក នួន ភិរក្ស មកពីសមាគមកីឡាប្រដាល់ក្រសួងមហាផ្ទៃ បានប្រកួតចាញ់ដោយសន្លប់នៅក្រោមជង្គង់របស់កីឡាករថៃ Keetty Pong ។
តាមពិតនួន ភិរក្ស ត្រូវជួបប្រកួតជាមួយកីឡាករប្រេស៊ីល Jose Alves toanco Neto ប៉ុន្តែដោយសារកីឡាករប្រេស៊ីលរូបនេះមានបញ្ហាផ្នែកសុខភាពមិនអាចប្រកួតបាន ទើបប្តូរដាក់ឱ្យKeetty Pong ជំនួសវិញ ។
ក្នុងការប្រកួត នួន ភិរក្ស ធ្វើមិនបានល្អតាំងតែពីទឹកទី១ម្លេ៉ះ សូម្បីតែកម្លាំងរបស់គេក៏ទៅមិនរួចជាមួយ Keetty Pong ដែរ ។ នួន ភិរក្ស ព្យាយាមបញ្ចេញស្នៀតកែងវាយនៅលើកីឡាករថៃរូបនេះម្តងម្កាលដែរ តែមិនទទួលបានលទ្ធផលល្អឡើយ ផ្ទុយទៅវិញត្រូវ Keetty Pong ច្រាស់កែង និងបុកជង្គង់សងវិញចំពោះទឹកនិងស្នៀតផ្កាពេញទំហឹង ។
នួន ភិរក្ស ដែលមានការធ្វេសប្រហែសបន្តិចនៅពាក់កណ្តាលទឹកទី៣នោះ ក៏ត្រូវ Keetty Pong បុកចូលពោះទឹកជាច្រើនជង្គង់ទៀតបណ្តាលឱ្យដួលសន្លប់ស្តូកនៅលើរេញតែម្តង ។
ក្រៅពីគូអន្តរជាតិ២គូទៅ នៅមានការប្រកួតជាលក្ខណៈមិត្តភាពជាច្រើនគូទៀតដូចជាវង្ស ណយ មកពីក្លិបកងពលតូចលេខ៣១ ទីបញ្ជាការកងទ័ពជើងទឹកបានប្រើស្នៀតកែងវាយផ្តួលឡេះ តើក មកពីក្លិបពុទ្ធសេរីវង្ស ព្រែកតាទែន ឱ្យសន្លប់នៅទឹកទី២ ។ អ៊ុង ស៊ីណា មកពីក្លិបផ្សារបឹងទំពុនយកឈ្នះជន សាវុធ មកពីក្លិបពោធិ៍ជ័យកីឡាដោយពិន្ទុ ។ យិន បូរិន មកពីក្លិបកងពលធំអន្តរាគមន៍លេខ៣ព្រះវិហារ យកឈ្នះខឹក សុខឿន មកពីក្លិបកងទ័ពឆ័ត្រយោង៩១១បានដោយពិន្ទុ ៕
ចែករំលែកព័តមាននេះ