សករាជថ្មី! កីឡាករជប៉ុន Yudai Ogawa ក្លាយជាសមាជិកក្រុមជម្រើសជាតិកម្ពុជា
- ភ្នំពេញ
រាជធានីភ្នំពេញ ៖ នៅព្រឹកថ្ងៃទី០៦ ខែតុលា ឆ្នាំ២០២៣ សហព័ន្ធកីឡាបាល់ទាត់ប្រទេសកម្ពុជាបាន
រាជធានីភ្នំពេញ ៖ នៅព្រឹកថ្ងៃទី០៦ ខែតុលា ឆ្នាំ២០២៣ សហព័ន្ធកីឡាបាល់ទាត់ប្រទេសកម្ពុជាបាន
រាជធានីភ្នំពេញ ៖ នៅព្រឹកថ្ងៃទី០៦ ខែតុលា ឆ្នាំ២០២៣ សហព័ន្ធកីឡាបាល់ទាត់ប្រទេសកម្ពុជាបានធ្វើការប្រកាសដំណឹងដ៏ភ្ញាក់ផ្អើលមួយ នៅលើបណ្តាញទំនាក់ទំនងសង្គមហ្វេសប៊ុកផ្លូវការរបស់ខ្លួន អំពីសមាជិកថ្មីនៃក្រុមជម្រើសជាតិ គឺ ខ្សែបម្រើជនជាតិជប៉ុន Yudai Ogawa ។
សករាជថ្មីនៅលើទឹកដីអង្គរ! ស្វាគមន៍កីឡាករ Yudai Ogawa មកកាន់ក្រុមជម្រើសជាតិកម្ពុជា។ នេះបើតាមការបង្ហោះរបស់សហព័ន្ធកីឡាបាល់ទាត់កម្ពុជា។ សហព័ន្ធក៏បានជូនដល់សមាជិកថ្មីរបស់ខ្លួនផងដែរ ដោយសរសេរបន្ថែមថា «ជូនពរជោគជ័យលើវិថីបាល់ទាត់ជាមួយក្រុមជម្រើសជាតិយើង»។
សូមជម្រាបជូនថា ខ្សែបម្រើ Yudai Ogawa អាយុ២៧ឆ្នាំ ដែលកើតនៅក្នុងខេត្តកាន់ណាហ្គាវ៉ា (Kanagawa) បានប្រឡូកអាជីពបាល់ទាត់ជាមួយក្លិបជប៉ុន FC Gifu នៅឆ្នាំ ២០១៥ និង ២០១៦ និងក្លិប Widzew Lodz របស់ប៉ូឡញ នៅឆ្នាំ ២០១៧ មុនពេលបោះជំហានមកប្រកបអាជីពលើទឹកដីប្រទេសកម្ពុជានៅឆ្នាំ ២០១៨ ដោយចូលរួមជាមួយក្លិបក្រសួងការពារជាតិ ហើយបានបន្តជាមួយក្លិបអង្គរថាយហ្គឺរនៅឆ្នាំ ២០១៩ មុនពេលផ្លាស់ទៅចូលរួមជាមួយក្លិបភ្នំពេញក្រោននៅឆ្នាំ ២០២១ រហូតមកទល់ពេលបច្ចុប្បន្ន។
អាជីពនៅកម្ពុជាជាមួយភ្នំពេញក្រោន Yudai Ogawa បានឈ្នះពានរង្វាន់ជាច្រើនដូចជា ជើងឯកលីគ Cambodian Premier League ២លើក, Cambodian Super Cup ២លើក និង Cambodian League Cup ២លើកផងដែរ។
ស្ថិតក្រោមមាត្រា ៦.១ នៃបទប្បញ្ញត្តិគ្រប់គ្រងការអនុវត្តលក្ខន្តិកៈរបស់ FIFA អំពីសញ្ជាតិដែលផ្តល់សិទ្ធិដល់កីឡាករលេងតំណាងសហព័ន្ធបាល់ទាត់លើសពីមួយ។ ប្រសិនបើកីឡាករមិនបានកើតក្នុងទឹកដីសហព័ន្ធនោះ, មិនមានឪពុកម្តាយ ឬជីដូនជីតាកើតក្នុងទឹកដីសហព័ន្ធនោះ កីឡាករអាចលេងតំណាងឱ្យសហព័ន្ធផ្សេងទៀត ដោយមានសញ្ជាតិរួមដូចគ្នា បន្ទាប់ពីស្នាក់នៅទឹកដីសហព័ន្ធនោះរយៈពេល៥ឆ្នាំ ក្រោយមានអាយុ១៨ឆ្នាំ។
វត្តមានខ្សែបម្រើឆ្នើម Yudai Ogawa របស់ក្រុមភ្នំពេញក្រោន មកកាន់ក្រុមជម្រើសជាតិកម្ពុជាទទួលបានការស្វាគមន៍ និងការអបអរសាទរយ៉ាងខ្លាំងពីសំណាក់អ្នកគាំទ្របាល់ទាត់កម្ពុជា តាមរយៈការបញ្ចេញមតិយ៉ាងច្រើន នៅលើការបង្ហោះរបស់សហព័ន្ធបាល់ទាត់កម្ពុជា។
គួរបញ្ជាក់ថា ការប្រកាសដំណឹងដ៏ភ្ញាក់ផ្អើលមួយនេះ ធ្វើឡើងស្របពេលក្រុមបាល់ទាត់ជម្រើសជាតិកម្ពុជា ក្រោមការដឹកនាំរបស់លោកគ្រូបង្វឹក Felix Dalmas ជនជាតិអាហ្សង់ទីន កំពុងត្រៀមខ្លួនសម្រាប់ការប្រកួតជម្រុះបឋម FIFA World Cup 2026 ប្រចាំតំបន់អាស៊ី ដោយកម្ពុជាត្រូវស្វាគមន៍ប៉ាគីស្ថាន សម្រាប់ជំនួបជើងទី១ នៅពហុកីឡដ្ឋានអូឡាំពិក នាថ្ងៃទី១២ ខែតុលា ខាងមុខនេះ មុនពេលធ្វើដំណើរទឹកដីប៉ាគីស្ថាន សម្រាប់ជើងទី២ នាថ្ងៃទី១៧ ខែតុលា នៅកីឡដ្ឋាន Jinnah Sports៕ (រូបភាព ៖ សហព័ន្ធបាល់ទាត់កម្ពុជា, ភ្នំពេញក្រោន និង Cambodian Premier League)
ចែករំលែកព័តមាននេះ