ADផ្ទាំងផ្សព្វផ្សាយពាណិជ្ជកម្ម

Picture

បាល់ទះ​អង្គុយ​បុរស​កម្ពុជា​បំបាក់​ថៃ រក​ឃើញ​ជ័យជម្នះ​ដំបូង​នៅ​អាស៊ី​ប៉ា​រ៉ា​ហ្គេ​ម​លើក​ទី​៤

7 ខែ មុន

ប្រទេស​ចិន ៖ ក្រុម​បាល់ទះ​អង្គុយ​បុរស​កម្ពុជា រក​ឃើញ​ជ័យជម្នះ​ដំបូង​នៅ​ក្នុង​ការ​ប្រកួត​វគ្គ​ចែក​ពូ​ល

ប្រទេស​ចិន ៖ ក្រុម​បាល់ទះ​អង្គុយ​បុរស​កម្ពុជា រក​ឃើញ​ជ័យជម្នះ​ដំបូង​នៅ​ក្នុង​ការ​ប្រកួត​វគ្គ​ចែក​ពូ​ល ព្រឹត្តិការណ៍​កីឡា​អាស៊ី​ប៉ា​រ៉ា​ហ្គេ​ម​លើក​ទី​៤ (4th Asian Para Games) នៅ​ក្រុង​ហាង​ចូ​វ ប្រទេស​ចិន បន្ទាប់​ពី​បាន​យកឈ្នះ​លើ​ថៃ នៅ​ក្នុង​លទ្ធផល ៣​សិត​ទល់​នឹង​១ (២៥-១៩,២៥-១៦, ២១-២៥ និង ២៥-២២) កាលពី​ថ្ងៃ​ទី​២៤ ខែតុលា ឆ្នាំ​២០២៣​។

នេះ​គឺ​ជ័យជម្នះ​លើក​ដំបូង​សម្រាប់​ក្រុម​បាល់ទះ​អង្គុយ​បុរស​កម្ពុជា នៅ​ក្នុង​ពូ​ល B នៃ​ព្រឹត្តិការណ៍​កីឡា​អាស៊ី​ប៉ា​រ៉ា​ហ្គេ​ម​លើក​ទី​៤ បន្ទាប់​ពី​ការ​ប្រកួត​បើក​ឆាក​បាន​ចាញ់​ក្រុម​កា​ហ្សា​ក់​ស្ថាន នៅ​ក្នុង​លទ្ធផល ៣​សិត​ទល់​នឹង​០ កាលពី​ថ្ងៃ​ទី​២៣ ខែតុលា កន្លង​ទៅ និង​កំពុង​ឈរ​នៅ​ចំណាត់ថ្នាក់​លេខ ៣ ។

នៅ​ថ្ងៃ​ទី​២៥ ខែតុលា កម្ពុជា​ត្រូវ​បន្ត​ប៉ះ​ក្រុម​នៅ​កំពូល​តារាង អ៊ី​រ៉​ង់ នៅ​ការ​ប្រកួត​ចុង​ក្រោយ​វគ្គ​ចែក​ពូ​ល វេលា​ម៉ោង ០៨:០០​នាទី​យប់ (​ម៉ោង​នៅ​កម្ពុជា​)​។ ចំណែក​ថៃ ដែល​ចាញ់​អ៊ី​រ៉​ង់ នៅ​ជំនួប​បើក​ឆាក និង​កំពុង​ឈរ​នៅ​បាត​តារាង ត្រូវ​បន្ត​ប៉ះ​កា​ហ្សា​ក់​ស្ថាន ដែល​ឈរ​នៅ​លេខ ២ នៅ​វេលា​ម៉ោង ០៦:០០​នាទី​ល្ងាច​ ។​

សូម​ជម្រាប​ជូន​ថា នៅ​ក្រោយ​បញ្ចប់​ការ​ប្រកួត​វគ្គ​ចែក​ពូ​ល ក្រុម​ដែល​ឈរ​នៅ​លេខ ១ និង ២ ត្រូវ​បន្ត​ទៅ​វគ្គ​ពាក់កណ្តាល​ផ្តាច់ព្រ័ត្រ ខណៈ​ក្រុម​ឈរ​នៅ​លេខ ៣ ប្រកួត​ដណ្តើម​ចំណាត់ថ្នាក់​លេខ ៥ និង​ក្រុម​ឈរ​នៅ​បាត​តារាង ប្រកួត​ដណ្តើម​ចំណាត់ថ្នាក់​លេខ ៧ ។

គួរ​បញ្ជាក់​ថា កម្ពុជា​បា​នប​ញ្ចូ​ន​ប្រភេទ​កីឡា​ចំនួន ៦ ដើម្បី​ចូលរួម​ប្រកួត​ព្រឹត្តិការណ៍​អាស៊ី​ប៉ា​រ៉ា​ហ្គេ​ម​លើក​ទី​៤ នៅ​ក្រុង​ហាង​ចូ​វ ប្រទេស​ចិន ដែល​បាន​ចាប់ផ្តើម​ពី​ថ្ងៃ​ទី​២២ ដល់​ថ្ងៃ​ទី​២៨ ខែតុលា ឆ្នាំ​២០២៣ ដោយ​រួម​មាន​ដូច​ជា កីឡា​អត្ត​ពលិកម្ម ហែល​ទឹក វាយ​កូន​ឃ្លី​លើ​តុ បាល់ទះ​អង្គុយ​បុរស បាល់បោះ​ជិះរទេះ​នារី និង​កីឡា​វាយ​សី​។

កីឡាករ សេន វ៉ា​រី អត្ដ​ព​លិ​ក​ប៉ា​រ៉ា​ឡាំ​ពិ​ក​កី​ឡាយ​វាយ​សី​កម្ពុជា​តែ​ម្នាក់​គត់ បាន​បញ្ចប់​ភារកិច្ច​ប្រកួត​របស់​ខ្លួន​ត្រឹម​វគ្គ​ចែក​ពូ​ល​វិញ្ញាសា​ឯកត្តជន SL3 នៅ​ក្នុង​ពូ​ល E ដោយ​ឆ្លងកាត់​៣​ប្រកួត ឈ្នះ​១ និង​ចាញ់​២ ។

ការ​ប្រកួត​ទី​១ ថ្ងៃ​ទី​២០ ខែតុលា កីឡាករ សេន វ៉ា​រី ចាញ់​កីឡាករ​ឥណ្ឌូ​នេ​ស៊ី Ukun Rukaendi លទ្ធផល ២​សិត​ទល់​០ (២១-១០, ២១-៥)​។ ការ​ប្រកួត​ទី​២ កាលពី​ថ្ងៃ​ទី​២១ ខែតុលា បន្ត​ចាញ់ កីឡាករ​ថៃ Mongkhong Bunsun លទ្ធផល ២​សិត​ទល់​០ (២១-៤, ២១-៣) មុន​ឈ្នះ​ការ​ប្រកួត​ទី​៣ កាលពី​ថ្ងៃ​ទី​២៣ ខែតុលា លើ​កីឡាករ​ម៉ុង​ហ្គោ​លី Munkhzul Munkhbayar លទ្ធផល ២​សិត​ទល់ ០ (២១-៥, ២១-២)៕ (​រូបភាព​ឯកសារ ៖ Cambodia 2023)

អត្ថបទសរសេរ ដោយ

កែសម្រួលដោយ