សម្រែកកាន់តែខ្លាំងឡើងៗ... ព្រោះមិនទាន់ឡើងកំដៅផង រកឃើញបាត់

សម្រែកកាន់តែខ្លាំងឡើងៗ… ព្រោះមិនទាន់ឡើងកំដៅផង រកឃើញបាត់

ថ្ងៃទី ១៥ ខែ កក្កដា ឆ្នាំ ២០១៨

ម៉ោង ១៣:០៣

រាជធានីភ្នំពេញ ៖ ការប្រកួតដ៏គួរឱ្យចាប់អារម្មណ៍នៅលើសង្វៀនទូរទស្សន៍អាស៊ីអាគ្នេយ៍ កីឡាករជើងខ្លាំងវ័យក្មេង ជា ល័ក្ខលៀត បង្គោលខៀវ មកពីអមតៈគុនខ្មែរ ខេត្តសៀមរាប ត្រូវគេឃើញដួលខ្ពោកមិនខុសពីគោចាស់នោះទេ បន្ទាប់ពីត្រូវមួយដៃពេញទំហឹងរបស់កីឡាករ ពុទ្ធ ភារិន្ទ មកពីក្លិបពុទ្ធសេរីវង្សខណ្ឌពោធិ៍សែនជ័យ កាលពីព្រឹកថ្ងៃទី១៥ ខែកក្កដា ឆ្នាំ២០១៨។

ការប្រកួតមួយនេះ ដ្បិតថា ជាកីឡាករក្មេងប៉ះក្មេង ប៉ុន្តែអ្នកណាក៏សរសើរថា គេមានថ្វីដៃល្អនោះដែរ ជាពិសេសក្នុងពេលការប្រកួតមិនទាន់បានឡើងកំដៅផង ក៏ឈានដល់ការកំណត់ចាញ់ឈ្នះ។

ការប្រកួតរវាងកីឡាករទាំងពីរនេះ ត្រូវបានបញ្ចប់ត្រឹមទឹកទី១ប៉ុណ្ណោះ ប៉ុន្តែបើក្រឡេកទៅមើលការប្រកួតគឺថា ជក់ចិត្តតាំងពីវិនាទីដំបូង ដោយសារតែទាំងបង្គោលខៀវ និងក្រហម សុទ្ធតែមានថ្វីដៃល្អរៀងខ្លួន។ កីឡាករបង្គោលក្រហមដែលត្រូវគេឃើញដួលមិនចាញ់គោចាស់ នៅដើមការប្រកួតវាយត្រូវគូប្រកួតច្រើនណាស់ ដោយគេវាយត្រូវសុទ្ធតែចំកន្លែងគោលដៅធ្វើឱ្យអ្នកទស្សនាលាន់មាត់សរសើរនោះផង។

សម្រែកនៃការគាំទ្រកាន់តែមានសន្ទុះខ្លាំងឡើង បន្ទាប់ពីការប្រកួតរបស់ពួកគេ គឺបង្គោលខៀវវាយគេត្រូវច្រើនកន្លែង ប៉ុន្តែចុងក្រោយបែរជាសន្លប់ខ្លួនឯង ដោយគ្រាន់តែត្រូវបង្គោលខៀវវាយត្រូវមួយដៃ។ កីឡាករបង្គោលខៀវត្រូវគេឃើញលោកអាជ្ញាកណ្ដាលរាប់ដល់១០ទៅហើយ នៅតែមិនអាចក្រោករួច ហើយថែមទាំងដួលដល់ថ្នាក់រង្វេងវង្វាន់នោះផង ដោយសារតែមួយដៃដែលបង្គោលខៀវវាយត្រូវ គឺត្រូវចំសៀតផ្កា ដែលជាចំណុចសំខាន់។

ការប្រកួតរបស់គូនេះ បានធ្វើឱ្យម្នាក់ៗលាន់មាត់ ជាពិសេសជាមួយនឹងកណ្ដាប់ដៃក៏ខ្លាំងរបស់អ្នកឈ្នះ ដែលវាយតែមួយដៃគឺអាចធ្វើឱ្យបង្គោលក្រហមវ័យក្មេងដួលដូចគោចាស់ នៅលើសង្វៀន។

ចំណែកលោកញាណ សុធី អ្នករៀបចំការប្រកួតបញ្ជាក់ថា ការប្រកួតមួយគូនេះវាយល្អ ហើយបើទោះជាបើកឆាកទឹកទី១ មិនទាន់ចប់ផង ក៏ស្រាប់តែរកឃើញចាញ់ឈ្នះ ប៉ុន្តែលោកថាការប្រកួតរបស់ពួកគេល្អមើល និងធ្វើអោយអ្នកគាំទ្រអស់ចិត្ត៕