រាជធានីភ្នំពេញ ៖ តាមប្រភពព័ត៌មានស្និទ្ធិស្នាលពីមន្ត្រីជំនាញផ្នែកប្រព័ន្ធលូទឹកបានប្រាប់ កោះសន្តិភាព អោយដឹងថា ប្រព័ន្ធលូបង្ហូរទឹកធំមួយខ្សែដែលមានមុខកាត់១ម៉ែត្រលាតសន្ធឹងក្នុងភូមិសាស្ត្រសង្កាត់ស្ទឹងមានជ័យ២ ស្ថិតក្នុងភូមិឬស្សី និងភូមិឬស្សី៣ និងភូមិនានាផ្សេងទៀតក្នុងភូមិសាស្ត្រសង្កាត់ស្ទឹងមានជ័យ២ ត្រូវបានអ្នកបច្ចេកទេសចុះដាក់ខុសលក្ខណះបច្ចេកទេសហើយមិនមានឃើញមន្ត្រីជំនាញណាចុះត្រួតពិនិត្យសោះឡើយ ។
ជុំវិញបញ្ហាខាងលើក្រុមមន្ត្រីក្រុមប្រឹក្សាសង្កាត់ស្ទឹងមានជ័យទី២បានរអ៊ូរទាំថា ពួកគាត់មិនហ៊ានណែនាំកម្មករ ឬក៏ភ្នាក់ងារក្រុមហ៊ុនដែលទទួលសិទ្ធិជីកដាក់ប្រព័ន្ធលូមេដ៏ធំមួយខ្សែនោះទេ ដោយសារប្រព័ន្ធលូនេះគឺជាគម្រោងរបស់សាលារាជធានីភ្នំពេញសូម្បីតែឈ្មោះរបស់ក្រុមហ៊ុនក៏មន្ត្រីអាជ្ញាធរមូលដ្ឋានមិនហ៊ានប្រាប់អ្នកសារព័ត៌មានដែរ ។
អ្វីជាការកត់សម្គាល់គឺប្រព័ន្ធលូមេដ៏ធំមួយខ្សែខាងលើនេះកំពុងតែដំណើរការដាក់ខុសបច្ចេកទេស ហើយត្រូវបានប្រជាពលរដ្ឋរស់នៅអមសងខាងប្រលាយលូរអ៊ូរទាំតាំងពីដើមភូមិដល់ចុងភូមិ ហើយលើសពីនេះទៅទៀតក្រុមកម្មករដែលជាអ្នកទទួលម៉ៅការធ្វើនោះបានទារលុយកាកថ្លៃបញ្ចូលប្រព័ន្ធទឹកទៅក្នុងបណ្តាញលូខាងលើនេះពីប្រជាពលរដ្ឋយ៉ាងច្រើនហួសកំណត់ស្ទើរគ្រប់គ្រួសារទាំងអស់អ្នកដែលរស់នៅជាប់មាត់ផ្លូវ ។
ប្រភពពលរដ្ឋបន្តថា ក្រុមអ្នកដាក់ប្រព័ន្ធលូបានកាយអាចម៍ដីចេញមកដាក់លើផ្លូវដើម្បីដាក់ប្រព័ន្ធលូលុះពេលដាក់រួចក្រុមជំនាញពុំបានយកអាចម៍ដីថ្មី ឬក៏ដីខ្សាច់ដើម្បីមកចាក់បំពេញវិញឡើយបែរជាយកដីចាស់ទៅចាក់លុបលើប្រព័ន្ធលូទៅវិញ ដែលជាហេតុរាល់ពេលមេឃភ្លៀងម្តងៗគឺតែងជួបការបាក់ស្រុកដីទៅក្រោមរហូត ។ ប្រភពបន្តថា បន្ថែមពីនេះក្រុមអ្នកដាក់ប្រព័ន្ធលូក៏បានទារលុយពីពលរដ្ឋមួយចំនួនថ្លៃការចាក់បំពេញដីខ្សាច់នៅមុខផ្ទះនីមួយៗផងដែរដោយក្នុងតម្លៃចាប់ពី៣ម៉ឺនរៀលដល់៥ម៉ឺនរៀលក្នុង១ឡាន ។
សូមបញ្ជាក់ថា កន្លងមកភ្នាក់ងារ កោះសន្តិភាព បានទំនាក់ទំនងទៅតាមទូរស័ព្ទទៅកាន់លោក មា សុភាព ដែលជាអភិបាលរងទទួលបន្ទុកសាធារណៈការ និងលោក ឡាយ ជ័រ ប្រធានការិយាល័យសាធារណៈការ និងដឹកជញ្ចូនខណ្ឌមានជ័យម្តងរួចមកហើយដែរដោយលោកទាំង២នាក់បញ្ជាក់ថា នឹងចុះទៅពិនិត្យមើលជាក់ស្តែង ប៉ុន្តែជាលទ្ធិផលគិតត្រឹមថ្ងៃទី៧ ខែកក្កដា ឆ្នាំ២០១៨ នេះពុំទាន់ឃើញមានមន្ត្រីជំនាញណាម្នាក់ចុះមកពិនិត្យមើលបញ្ហាខាងលើនេះឡើយនោះទេ ។
ជុំវិញបាតុភាពដដែលនេះលោក ពេជ្រ កែវមុនី អភិបាលខណ្ឌមានជ័យបានថ្លែងប្រាប់ កោះសន្តិភាព តាមរយៈប្រព័ន្ធអេឡិចត្រូនិច WhatsApp ថា លោកអរគុណច្រើនសម្រាប់ការផ្តល់ព័ត៌មានទៅកាន់រូបលោក ព្រោះកន្លងមកលោកពុំទាន់បានទទួលព័ត៌មាននេះឡើយយ៉ាងណាមិញលោកនឹងចាត់តាំងក្រុមមន្ត្រីជំនាញរួមជាមួយអាជ្ញាធរសង្កាត់អោយចុះទៅពិនិត្យមើលបន្ទាន់ និងត្រូវធ្វើរបាយការណ៍ត្រឡប់មកកាន់លោកវិញដើម្បីលោកស្វែងរកការពិតជាមុនសិនមុនឈានដល់ការដោះស្រាយបញ្ហា ៕
ចែករំលែកព័តមាននេះ