ខ្លាំងបាត់ ! Porsche គ្រោងផលិតរថយន្តប្រណាំងលើអាកាស
«យើងមានសំណាងណាស់ ។ អ្វីដែលនឹងកើតឡើងនៅប៉ុន្មានឆ្នាំខាងមុខ គឺពិតជាមានភាពអស្ចារ្យខ្លាំង » ។ នេះជាប្រសាសន៍របស់លោក Detlev von Platen…
«យើងមានសំណាងណាស់ ។ អ្វីដែលនឹងកើតឡើងនៅប៉ុន្មានឆ្នាំខាងមុខ គឺពិតជាមានភាពអស្ចារ្យខ្លាំង » ។ នេះជាប្រសាសន៍របស់លោក Detlev von Platen សមាជិកក្រុមប្រឹក្សាភិបាលរបស់ក្រុមហ៊ុន Porsche និងទទួលខុសត្រូវផ្នែកលក់និងទីផ្សារពិភពលោក នៅក្នុងកម្មវិធីពិព័រណ៍រថយន្តក្រុងហ្សឺណែវឆ្នាំ២០១៨ ។
ខណៈរថយន្តបើកបរដោយគ្មានតៃកុង និងរថយន្តប្រើប្រាស់អគ្គិសនី គឺជាអ្វីដែលគ្រប់គ្នាកំពុងធ្វើនាពេលបច្ចុប្បន្ននេះ ការគិតទៅដល់រថយន្តហោះ គឺពិតជាមានភាពអស្ចារ្យ និងគួរឲ្យចាប់អារម្មណ៍មែនទែន ។ ក្រុមហ៊ុន Porsche កំពុងតែធ្វើឲ្យរឿងនេះកាន់តែអស្ចារ្យមួយកម្រិតទៀត ដោយសារតែក្រុមហ៊ុនគិតទៅដល់ការបង្កើតរថយន្តប្រណាំងលើអាកាស ។
លោក Detlev von Platen មានប្រសាសន៍ថា ៖« នេះគឺជាដំណាក់កាលដំបូងបំផុត តែវាពិតជាស័ក្តិសមណាស់សម្រាប់ក្រុមហ៊ុន Porsche ក្នុងការសម្រេចវា ។ យើងក្រឡេកមើលជុំវិញខ្លួនគឺមិនឃើញមានគេនិយាយពីរឿងនេះទេ ហើយយើងក៏សម្រេចចិត្តនឹងបង្កើតវាឡើងដោយខ្លួនឯង » ។
ដោយសារតែពាក្យថា «រថយន្តប្រណាំងលើអាកាស» នេះហើយ បានជាមានការចាប់អារម្មណ៍យ៉ាងខ្លាំងពីសំណាក់មហាជន ។ គេមិនមែនគិតត្រឹមតែបង្កើតរថយន្តបើកលើអាកាសប៉ុណ្ណោះទេ ប៉ុន្តែក្រុមហ៊ុន Porsche ក៏បានគិតដល់រថយន្តប្រភេទស្ព័រផងដែរ ។
លោក Detlev von Platen បានបន្ថែមថា ៖« យើងសាកស្រមៃមើលថា រថយន្តហោះនឹងអាចជូនយើងពីចំណុច A ទៅកាន់ចំណុច B បាន ដោយវាអាចបើកបរនៅលើអាកាសជាធម្មតា ។ តែប្រសិនបើយើងអាចបើកវាបានលឿនទៀតនោះ វាកាន់តែអស្ចារ្យថែមទៀត ។ នេះជាអ្វីដែលត្រូវគ្នាជាមួយក្រុមហ៊ុន Porsche» ។
គួរបញ្ជាក់ថា នេះគ្រាន់តែជាការគ្រោងទុកប៉ុណ្ណោះ ។ ប្រសិនបើរថយន្តនេះមានមែននៅថ្ងៃមុខ វានឹងតម្រូវឲ្យប្រើប្រាស់អាជ្ញាប័ណ្ណថ្មីមួយប្រភេទទៀត ដែលខុសគ្នាដាច់ពីប្រភេទយានជំនិះផ្សេងៗ ពោលគឺវានឹងក្លាយទៅជាមធ្យោបាយថ្មីសន្លាង ដែលមនុស្សគ្រប់គ្នាធ្លាប់តែស្រមៃនឹកឃើញកាលពីវ័យកុមារ ៕
ចែករំលែកព័តមាននេះ