សហរដ្ឋអាមេរិក ៖ ក្រុមហ៊ុន Microsoft កាលពី​ថ្ងៃ​ទី​១១ ខែមករា ឆ្នាំ​២០២៤ បាន​វ៉ា​ដាច់​ក្រុមហ៊ុន Apple ដើម្បី​ក្លាយជា​ក្រុមហ៊ុន​មាន​តម្លៃ​ថ្លៃ​បំផុត​របស់​ពិភពលោក​ជា​លើក​ដំបូង​ចាប់តាំងពី​ឆ្នាំ ២០២១ បន្ទាប់​ពី​ភាគហ៊ុន​របស់​ក្រុមហ៊ុន​ផលិត​ទូរស័ព្ទ iPhone បាន​ចាប់ផ្តើម​ធ្លាក់​ចុះ​ក្នុងឆ្នាំនេះ លើ​ការ​ព្រួយបារម្ភ​កាន់តែ​ខ្លាំង​ឡើង​អំពី​បញ្ហា​តម្រូវការ​។

ភាគហ៊ុន​ក្រុមហ៊ុន Microsoft បាន​កើនឡើង​យ៉ាង​ខ្លាំង​ចាប់តាំងពី​ឆ្នាំ​មុន ដោយសារ​ការ​នាំមុខ​ដំបូង​ដែល​ក្រុមហ៊ុន​មួយ​នេះ​បាន​ចាប់​យក​បច្ចេកវិទ្យា AI ឬ​បញ្ញា​សិប្បនិម្មិត តាម​រយៈ​ការ​វិនិយោគ​នៅ​ក្នុង​ក្រុមហ៊ុន ChatGPT ដែល​ជា​អ្នក​បង្កើត OpenAI ។

ភាគហ៊ុន​ក្រុមហ៊ុន Microsoft បាន​បិទ​ខ្ពស់​ជាង ០.៥% ដែល​ផ្តល់​នូវ​តម្លៃ​ទីផ្សារ​ចំនួន ២.៨៥៩​ទ្រី​លាន​ដុល្លារ​អា​មេ​រិ​ក ពោល​កើនឡើង​ដល់​ទៅ ២% ហើយ​ឥឡូវនេះ តម្លៃ​ក្រុមហ៊ុន Microsoft បាន​កើនឡើង​ដល់ ២.៩០៣​ទ្រី​លាន​ដុល្លារ​។ ចំណែក​ភាគហ៊ុន​ក្រុមហ៊ុន Apple បាន​ធ្លាក់​ចុះ ០.៣% ហើយ​តម្លៃ​ក្រុមហ៊ុន​មាន​ចំនួន​ត្រឹមតែ ២.៨៨៦​ទ្រី​លាន​ដុល្លារ ខណៈ​ដែល​ទាំង Microsoft និង Apple បាន​ឈរ​នៅ​លំដាប់​កំពូល​ក្នុង​រយៈពេល​ជា​ច្រើន​ឆ្នាំ​មក​ហើយ​។

អ្នកជំនាញ​អះអាង​ថា ជា​រឿង​ជៀស​មិន​រួច​នោះ​ទេ​ដែល Microsoft នឹង​វ៉ា​ដាច់ Apple ចាប់តាំងពី Microsoft កំពុង​រីក​ចម្រើន​យ៉ាង​ខ្លាំង និង​មាន​អត្ថប្រយោជន៍​កាន់តែ​ច្រើន​ពី​បដិវត្តន៍ AI ជំនាន់​ថ្មី​។ ក្រុមហ៊ុន Microsoft បាន​ដាក់​បញ្ចូល​បច្ចេកវិទ្យា OpenAI នៅ​ទូ​ទាំង​កម្មវិធី​ផលិតភាព​របស់​ខ្លួន ដែល​ជា​ការ​ផ្លាស់​ប្តូរ​ជួយ​ជំរុញ​ឱ្យ​មានការ​ងើបឡើង​វិញ​ក្នុង​អាជីវកម្ម Cloud Computing របស់​ខ្លួន​ក្នុង​ត្រីមាស​ចាប់ពី​ខែកក្កដា​រហូត​ដល់​ខែកញ្ញា ឆ្នាំ​២០២៣​។

ទន្ទឹម​នឹង​នោះ ក្រុមហ៊ុន Apple បាន​នឹង​កំពុង​ប្រឈម​មុខ​នឹង​ការ​ធ្លាក់​ចុះ​នៃ​តម្រូវការ ដោយ​រួម​ទាំង iPhone ដែល​ជា​ឧបករណ៍​បង្កើត​សាច់ប្រាក់​ដ៏​ធំ​បំផុត​របស់​ខ្លួន​។ តម្រូវការ​នៅ​ក្នុង​ប្រទេស​ចិន ដែល​ជាទី​ផ្សារ​ធំ​មួយ​បាន​ធ្លាក់​ចុះ ខណៈ​សេដ្ឋកិច្ច​ប្រទេស​ចិន​មានការ​ងើបឡើង​វិញ​យឺត​បន្ទាប់​ពី​វិបត្តិ​ជំងឺ​កូ​វី​ដ​១៩ បូក​រួម​នឹង​ការ​ប្រកួតប្រជែង​ខ្លាំង​ពី​គូប្រជែង​ម្ចាស់​ស្រុក​គឺ​ក្រុមហ៊ុន Huawei​។

ក្រុមហ៊ុន Microsoft ធ្លាប់​នាំមុខ​លើ​ក្រុមហ៊ុន Apple ដើម្បី​ក្លាយជា​ក្រុមហ៊ុន​មាន​តម្លៃ​ថ្លៃ​បំផុត​នៅ​លើ​ពិភពលោក​មួយ​នៅ​ក្នុង​ឆ្នាំ ២០១៨ រួម​ទាំង​ឆ្នាំ ២០២១ នៅ​ពេល​មានការ​ព្រួយបារម្ភ​អំពី​កង្វះខាត​ខ្សែ​សង្វា​ក់​ផ្គត់ផ្គង់​ដែល​ជំរុញ​ដោយ​វិបត្តិ​កូ​វី​ដ​-១៩ ដែល​បាន​ប៉ះពាល់​ដល់​តម្លៃ​ភាគហ៊ុន​របស់​ក្រុមហ៊ុន Apple៕ (​ប្រភព ៖ Reuters)