សហរដ្ឋអាមេរិក ៖ ជាលើកដំបូងក្នុងប្រវត្តិអវកាសពិភពលោក ដែលអវកាសយានិកមិនអាជីពចំនួន២រូប ដែលមានន័យថាជាជនស៊ីវិលបានបញ្ចប់បេសកម្មបញ្ចេញខ្លួនទៅក្នុងលំហអវកាសដោយជោគជ័យ កាលពីថ្ងៃទី១២ ខែកញ្ញា ឆ្នាំ២០២៤ តាមរយៈបេសកកម្ម Polaris…
សហរដ្ឋអាមេរិក ៖ ជាលើកដំបូងក្នុងប្រវត្តិអវកាសពិភពលោក ដែលអវកាសយានិកមិនអាជីពចំនួន២រូប ដែលមានន័យថាជាជនស៊ីវិលបានបញ្ចប់បេសកម្មបញ្ចេញខ្លួនទៅក្នុងលំហអវកាសដោយជោគជ័យ កាលពីថ្ងៃទី១២ ខែកញ្ញា ឆ្នាំ២០២៤ តាមរយៈបេសកកម្ម Polaris Dawn ក្រុមហ៊ុន SpaceX របស់មហាសេដ្ឋីអាមេរិក Elon Musk។
កាលពីថ្ងៃទី១២ ខែកញ្ញា ក្រុមហ៊ុន SpaceX បានបង្កើតប្រវត្តិសាស្ត្រមិនធ្លាប់មានពីមុនមក តាមរយៈបេសកកម្ម Polaris Dawn ដោយបញ្ជូនអវកាសយានិកមិនអាជីពចំនួន៤នាក់ ឬមិនស្ថិតក្រោមបេសកម្មរបស់រដ្ឋាភិបាល ទៅកាន់ទីលំហអាវកាស ខណៈដែល២នាក់ក្នុងចំណោមនោះបានបញ្ចេញខ្លួនពីយានអវកាស ដើម្បីដាក់ខ្លួនទៅក្នុងលំហអវកាសដោយជោគជ័យ ដែលស្ថិតនៅចម្ងាយប្រមាណ ៧០០គីឡូម៉ែត្រពីផែនដី។
បេសកកម្មដែលដឹកនាំដោយមហាសេដ្ឋីអាមេរិក លោក Jared Isaacman អាយុ៤១ឆ្នាំ ស្ថាបនិកក្រុមហ៊ុន Draken International ដែលផ្តល់សេវាកងទ័ពអាកាសឯកជន និងជាស្ថាបនិក ក៏ដូចជានាយកប្រតិបត្តិក្រុមហ៊ុនទូទាត់សាច់ប្រាក់ Shift4 រួមជាមួយលោកស្រី Anna Menon អាយុ៣៨ឆ្នាំ និងកញ្ញា Sarah Gillis អាយុ៣០ឆ្នាំ ដែលទាំងពីរនាក់គឺជាវិស្វករជនជាតិអាមេរិកបម្រើការនៅក្នុងក្រុមហ៊ុន SpaceX និងម្នាក់ទៀត លោក Scott Poteet អាយុ៥០ឆ្នាំ ដែលជាអ្នកបើកយន្តហោះចូលនិវត្តន៍មកពីកងទ័ពអាកាសសហរដ្ឋអាមេរិក។ អវកាសយានិកមិនអាជីពទាំង៤នាក់ ដែលទទួលបានការបណ្តុះបណ្តាលពីក្រុមហ៊ុន SpaceX ស្ថិតក្នុងយានអវកាស Crew Dragon ភ្ជាប់ជាមួយរ៉ុក្កែត Falcon 9 Block 5 ដោយបាញ់ចេញមជ្ឈមណ្ឌលអវកាស John F. Kennedy រដ្ឋផ្លរីដា (Florida) កាលពីព្រឹកព្រលឹមថ្ងៃទី១០ ខែកញ្ញា កន្លងទៅ។
ប្រវត្តិសាស្ត្របានកើតឡើងនៅមុនម៉ោង៧ព្រឹក ថ្ងៃទី១២ ខែកញ្ញា ដោយលោក Jared Isaacman ក្លាយជាអវកាសយានិកមិនអាជីពដំបូងគេ ដែលបណ្តែតត្រឹមពាក់កណ្តាលខ្លួនចេញពីយាន Crew Dragon ចូលទៅក្នុងលំហដោយបំពាក់ឧបករណ៍បច្ចេកទេសក្រុមហ៊ុន SpaceX។ មុនពេលផ្លាស់ប្តូរកញ្ញា Sarah Gillis ចេញវិញម្តង ដើម្បីក្លាយជាអវកាសយានិកមិនអាជីពទី២បានបណ្តែតខ្លួនទៅក្នុងលំហ ហើយនាងក៏ជាបុគ្គលក្មេងបំផុតដែលបានចូលរួមបេសកម្មដើរក្នុងលំហអាកាសផងដែរ។ ខណៈដែលអ្នកទាំងពីរបានចំណាយពេលសរុបប្រហែល២០នាទីទៅក្នុងលំហ។ លោក Isaacman បានថ្លែងថា «ត្រឡប់ទៅផ្ទះវិញយើងទាំងអស់គ្នាមានការងារជាច្រើនដែលត្រូវធ្វើ ប៉ុន្តែពីទីនេះ មើលទៅដូចជាពិភពលោកដ៏ល្អឥតខ្ចោះមួយ»។
បេសកកម្មនេះ ក៏មានគោលបំណងធ្វើតេស្តសាកល្បងឈុតអវកាសថ្មីរបស់ SpaceX ជាមួយនឹងមុខងារពិសេសៗ និងមានរូបរាងតូចជាងមុន ប្រៀបដូចសម្លៀកបំពាក់ធម្មតា ដើម្បីរក្សាសុវត្ថិភាពអវកាសយានិក ការពារពួកគេពីវិទ្យុសកម្ម និងសីតុណ្ហភាពក្តៅខ្លាំង ដែលទាំងនេះជាគោលដៅសំខាន់របស់ SpaceX សម្រាប់ការហោះហើរពាណិជ្ជកម្មនៅពេលអនាគត។ លើសពីនេះក្រុមហ៊ុនបានចំណាយពេលជាង២ឆ្នាំ ដើម្បីបង្កើតឈុតមានរាងតូចជាងមុន ស្អាតជាងមុន និងងាយស្រួលនៅក្នុងការធ្វើចលនា។
បេសកកម្មនេះ ទទួលបានការអបអរសាទរជាពិសេសពីសំណាក់លោក Bill Nelson អ្នកគ្រប់គ្រងនៃរដ្ឋបាលអាកាសចរណ៍ជាតិ និងអវកាសសហរដ្ឋអាមេរិក ដែលគ្រប់គ្នាស្គាល់ថា NASA ដោយលោកបានសរសេរអបអរលើ X ថា « អបអរសាទរ Polaris Program និង SpaceX លើការដាក់ខ្លួនក្នុងលំហអាកាសនៃការហោះហើរពាណិជ្ជកម្មដំបូងគេក្នុងប្រវត្តិសាស្ត្រ!។ ភាពជោគជ័យនាពេលបច្ចុប្បន្ននេះ តំណាងឱ្យការលោតផ្លោះដ៏ធំមួយសម្រាប់ឧស្សាហកម្មអវកាសហោះហើរពាណិជ្ជកម្ម និងគោលដៅរយៈពេលវែងរបស់ NASA ក្នុងការកសាងសេដ្ឋកិច្ចអវកាសដ៏រស់រវើករបស់សហរដ្ឋអាមេរិក»។
តាមគម្រោងបេសកកម្ម Polaris Dawn គ្រោងបញ្ចប់នៅថ្ងៃទី១៥ ខែកញ្ញា ឆាប់ៗខាងមុខនេះ ដោយទីតាំងចុះចតអាចនៅមហាសមុទ្រអាត្លង់ទិក ឬឈូងសមុទ្រម៉ិកស៊ិក។ ដ្បិត Polaris Dawn គឺជាបេសកកម្មដំបូងក្នុងចំណោមបេសកកម្មចំនួន ៣ ដែលបានគ្រោងទុកក្នុងកម្មវិធី Polaris របស់ក្រុមហ៊ុន SpaceX ៕ (ប្រភព ៖ CNN, The Washington Post និង AFP)
ចែករំលែកព័តមាននេះ