ដើម្បីឆ្លើយតបនឹងបញ្ហាប្រឈមលើផ្នែកសុវត្ថិភាពលំនៅដ្ឋាន ដែលកំពុងតែចោទឡើងនៅក្នុងជីវភាពប្រចាំថ្ងៃដូចជា ៖ បញ្ហាចោ.រក.ម្ម ការគា.ស់ផ្ទះ និងសន្សំសំចៃថាមពល យុវជនខ្មែរមួយ ក្រុមកំពុងតែសិក្សា ហើយឈានដល់ដំណាក់ការអភិវឌ្ឍន៍ប្រព័ន្ធលំនៅដ្ឋានវ័យឆ្លាតមួយចេញកំពុងតែដាក់សាកល្បង ។
![](https://kohsantepheapdaily.com.kh/wp-content/uploads/2024/01/7f1de29e6da19d22b51c68001e7e0e54-7.jpg)
យុវជន ជៀន លីហ័រ អាយុ២២ឆ្នាំ គឺជានិស្សិតឆ្នាំទី៤ នៃសាកលវិទ្យាល័យភូមិន្ទភ្នំពេញ ជំនាញវិទ្យាសាស្ត្រកុំព្យូទ័រ ហើយក៏ជាសមាជិកនៃក្រុម E-Robot បានប្រាប់ឱ្យកម្មវិធីលុយនៃសារព័ត៌មានកោះសន្តិភាព ដឹងថា «សព្វថ្ងៃ បច្ចេកវិទ្យាមានការរីកចម្រើនលឿនមែនទែន ជាពិសេសវិស័យរ៉ូបូត ហើយក៏ជាផ្នែកមួយជំរុញឱ្យកម្ពុជាឈានទៅរកឧស្សាហកម្ម ៤.០ គឺរ៉ូបូត ដើរតួយ៉ាងសំខាន់នៅក្នុងវិស័យមួយនេះ ហើយការជ្រើសរើសសិក្សាលើគម្រោងលំនៅដ្ឋានវ័យឆ្លាតដែលគេហៅថា ស្មាតហូមនេះមក គឺដើម្បីផ្តល់សុវត្ថិភាពនៅតាមលំនៅដ្ឋានជូនពលរដ្ឋទូទៅ»។
![](https://kohsantepheapdaily.com.kh/wp-content/uploads/2024/01/42a0e188f5033bc65bf8d78622277c4e-7.jpg)
យុវជន ជៀន លីហ័រ បានបន្តថា «វាគឺជាបច្ចេកវិទ្យាដែលប្រទេសយើងកំពុងតែត្រូវការចាំបាច់ មែនទែន។ អ៊ីចឹង យើងយកវាមកបញ្ចូលគ្នាហើយ គឺធ្វើឡើងដើម្បីឱ្យថ្ងៃខាងមុខទៀត មានការអភិវឌ្ឍន៍បែបនេះទៀត ឬមួយក៏មានគំនិត ការបង្កើតថ្មីដាក់បញ្ចូលជាមួយនឹងស្មាតហូម ជាមួយនឹង AI ទៅក្នុងជីវិ.តពិត ឬក៏ការប្រើប្រាស់ប្រចាំថ្ងៃរបស់យើងនៅក្នុងសង្គមរបស់យើង»។
![](https://kohsantepheapdaily.com.kh/wp-content/uploads/2024/01/013d407166ec4fa56eb1e1f8cbe183b9-6.jpg)
យុវជន ជៀន លីហ័រ បន្តថា «សព្វថ្ងៃ ការបង្កើតឡើងនូវរ៉ូបូតជាច្រើនរបស់ក្រុមប្អូនបង្កើតឡើងក្នុងគោលបំណងសិក្សា ដែលរ៉ូបូតទាំងអស់ចែកចេញជា៣ប្រភេទ គឺស្មាតហូម RC Car និងឧបករណ៍សម្រាប់ដាក់តាំងបង្ហាញក្មេងៗនៅតាមបណ្តាខេត្ត ដែលក្រុមយុវជននេះ ចុះទៅបង្រៀន»។
យុវជន ជៀន លីហ័រ បន្ថែមថា «តាមការរួមបញ្ចូលបច្ចេកវិទ្យាថ្មីៗនៅក្នុងសង្គមយើង អាចបង្កើត concept មួយ ដែលជាការបង្កើតថ្មីឱ្យទៅអ្នកជំនាន់ក្រោយ ដែលគាត់អាចនឹងយកគំនិតទាំងនេះ ទៅគិតបន្តទៀត។ វានឹងអាចជួយដល់សង្គមជាតិយើង និងអភិវឌ្ឍន៍ទៅជាស្មាតហូម ឬមួយក៏ស្មាតស៊ីធី។ អាចនឹងធ្វើឱ្យវិស័យបច្ចេកវិទ្យា ដែលទាក់ទងជាមួយនឹងស្ថាបត្យកម្មរបស់យើងក៏រីកចម្រើន វិស័យបច្ចេកវិទ្យារ៉ូបូត របស់យើងក៏រីកចម្រើន អ៊ីចឹងវាក៏អាចធ្វើឱ្យសង្គមជាតិយើង ឆាប់រីកលូតលាស់ជាមួយនឹងវិស័យមួយនេះ»។
![](https://kohsantepheapdaily.com.kh/wp-content/uploads/2024/01/3988c7f88ebcb58c6ce932b957b6f332-7.jpg)
យុវជន ជៀន លីហ័រ បន្ថែមថា «គម្រោងស្មាតហូម ផ្តល់នូវអត្ថប្រយោជន៍យ៉ាងច្រើនដល់សន្តិសុខសង្គម លើប្រព័ន្ធសន្តិសុខ សុវត្ថិភាពជាចម្បង ហើយធ្វើឱ្យក្លាយជាផ្ទះឆ្លាតវៃ ដែលជាឧទាហរណ៍ ៖ វាជួយឱ្យយើងដឹងនៅពេលដែលយើងមិននៅផ្ទះ យើងភ្លេចបិទអគ្គិសនី មានចោ.រចូលលួ.ច ឬក៏មានសកម្មភាពណាមួយមិនប្រក្រតីនៅក្នុងផ្ទះយើង។ យើងអាចប្រាប់ ឬបញ្ជាពីចម្ងាយ ហើយទាំងនេះជាអ្វីដែលសង្គមយើងត្រូវការ និងពេញនិយម»។
យុវជន ជៀន លីហ័រ បន្ថែមថា «បើនិយាយពីគោលដៅសម្រាប់ប្រជាជនខ្មែរ ដែលអាចមានសមត្ថភាពបំពាក់បាននូវគម្រោងស្មាតហូមនេះបាន គឺស្ថិតនៅក្នុងស្ថានភាពជីវភាពមធ្យមឡើងទៅហើយ ប្រសិនបើពួកគាត់មានផ្ទះផ្ទាល់ខ្លួន ឬខុនដូ គាត់អាចបំពាក់នូវបច្ចេកវិទ្យាស្មាតហូមនេះបាន»។
យុវជន ជៀន លីហ័រ បន្ថែមថា «ពួកខ្ញុំមិនទាន់បានគិតទាក់ទងជាមួយនឹងការបំពាក់ប្រព័ន្ធនេះទេ ដោយសារតែនេះគ្រាន់តែជា concept គំនិតមួយថ្មី ហើយក៏ជា prototype មួយ ដែលយើងគិតថា វានឹងអាចកើតឡើងនៅក្នុងសង្គមជាតិ យើងនៅថ្ងៃណាមួយ»៕
អត្ថបទដោយ ៖ ស នីត
![](https://kohsantepheapdaily.com.kh/wp-content/uploads/2024/01/e00da03b685a0dd18fb6a08af0923de0-6.jpg)
ចែករំលែកព័តមាននេះ