ខេត្តសៀមរាប ៖ ជនសង្ស័យមួយក្រុមបានធ្វើសកម្មភាពគាស់ផ្ទះជនរងគ្រោះឈ្មោះ ស.ផ.យ ភេទស្រី អាយុ៤៣ឆ្នាំ រស់នៅភូមិខ្នារ សង្កាត់ជ្រាវ ក្រុងសៀមរាប ត្រូវបានអ្នកជិតខាងសង្ស័យ…
ខេត្តសៀមរាប ៖ ជនសង្ស័យមួយក្រុមបានធ្វើសកម្មភាពគាស់ផ្ទះជនរងគ្រោះឈ្មោះ ស.ផ.យ ភេទស្រី អាយុ៤៣ឆ្នាំ រស់នៅភូមិខ្នារ សង្កាត់ជ្រាវ ក្រុងសៀមរាប ត្រូវបានអ្នកជិតខាងសង្ស័យ និងសហការណ៍ជាមួយបងប្អូនប្រជាការពារភូមិរាយការណ៍ មកកម្លាំងនគរបាលប៉ុស្តិ៍រដ្ឋបាលសង្កាត់ជ្រាវ នៃអធិការដ្ឋាននគរបាលក្រុងសៀមរាប បានធ្វើការឃាត់ខ្លួនបានជាបន្តបន្ទាប់ រួចនាំយកទៅអធិការក្រុងសៀមរាប ដើម្បីចាត់ការបន្តទៅតាមផ្លូវច្បាប់។ ហេតុការណ៍ចុះប្រតិបត្តិការបង្ក្រាបករណីលួចគោះផ្ទះពលរដ្ឋនោះធ្វើឡើងនៅថ្ងៃទី៣០ ខែមិថុនា ឆ្នាំ២០១៨ ស្ថិតនៅភូមិខ្នារ សង្កាត់ជ្រាវ ក្រុងសៀមរាប។
លោកវរសេនីយ៍ត្រី នួន សក្តិចំរើនរិទ្ធ អធិការងទទួលផ្នែកមន្ត្រីនគរបាលយុត្តិធម៌ នៃអធិការដ្ឋាននគរបាលក្រុងសៀមរាប បានប្រាប់នៅថ្ងៃទី៣ ខែកក្កដា ឆ្នាំ២០១៨នេះថា ដោយយោងតាមពាក្យបណ្តឹងរបស់ជនរងគ្រោះ ទើបលោកបានដឹកនាំកម្លាំង ជំនាញ ចុះប្រតិបត្តិការស្រាវជ្រាវករណីចោរលួចគាស់ផ្ទះចូលលួចទ្រព្យសម្បត្តិបងប្អូនប្រជាពលរដ្ឋ នៅសង្កាត់ជ្រាវ ក្រុងសៀមរាប ទើបឈានដល់ធ្វើការឃាត់ខ្លួនជនសង្ស័យជាបន្តបន្ទាប់ភ្លាមៗចំនួន ០៣នាក់ យកមកសួរនាំនៅអធិការដ្ឋាននគរបាលក្រុង ដើម្បីរៀបចំកសាងសំណុំរឿងបញ្ជូនបន្ត ទៅតុលាការខេត្ត ចាត់ការតាមនីតិវិធីច្បាប់។ លោកបានបញ្ជាក់ថា ជនសង្ស័យទាំង៣នាក់ រួមមាន៖ទី១-ឈ្មោះ ហឿន សរ ភេទប្រុស អាយុ១៧ឆ្មាំ ជនជាតិខ្មែរ សញ្ជាតិ ខ្មែរបច្ចុប្បន្នរស់នៅភូមិ ធ្លកអណ្ដូង សង្កាត់ស្លក្រាម ក្រុងសៀមរាប ខេត្តសៀមរាប។
ទី២-ឈ្មោះ ឆាយ វ៉ាន់ណែត ភេទប្រុស អាយុ៣៣ឆ្នាំ ជនជាតិខ្មែរ សញ្ជាតិខ្មែររស់នៅភូមិខ្នារ សង្កាត់ជ្រាវក្រុង.ខេត្តសៀមរាប(ជនសមគំនិត) និងទី៣-ឈ្មោះ កែវ បញ្ញា ភេទប្រុស អាយុ២៦ឆ្នាំ រស់នៅភូមិខ្នារ សង្កាត់ជ្រាវ (ពាក់ព័ន្ធនឹងករណីអំពើលួចមានស្ថានទម្ងន់ទោស គាស់ទម្លុះទម្លាយ)។ ក្រោយពីសមត្ថកិច្ចសាកសួរចម្លើយរបស់ជនសង្ស័យខាងលើរួចមក ពួកគេបានសារភាពថា ខ្លួនពិតជាបានប្រព្រឹត្តសកម្មភាពលួចដូចការប្តឹងចោទប្រកាន់របស់ជនរងគ្រោះមែន។ ហើយរាល់ទ្រព្យសម្បត្តិដែលពួកគេលួចបាន យកលក់ឱ្យឈ្មោះ ឆាយ វ៉ាន់ណែត។ លោកបានបញ្ជាក់បន្ថែមថា តាមការរៀបរាប់របស់ជនសង្ស័យឈ្មោះ ឆាយ វ៉ាន់ណែត ដែលកម្លាំងយើងចាប់បាន បន្ទាប់ពីចាប់បានជនសង្ស័យខាងលើរួមមក កម្លាំងយើងក៏បាននាំឈ្មោះ ឆាយ វ៉ាន់ណែត យកទៅផ្ទះដើម្បីធ្វើការឆែកឆេរកន្លែងដែលលាក់ទុកវត្ថុតាងទាំងអស់នោះ។
លោកបានបញ្ជាក់ទៀតថា បន្ទាប់ធ្វើការឆែកឆេរផ្ទះជនសង្ស័យឈ្មោះ ឆាយ វ៉ាន់ណែត រួចមក នគរបាលក្រុងសៀមរាប បានសហការណ៍ជាមួយនគរបាលការិយាល័យប្រឆាំងគ្រឿងញៀន បន្តនាំខ្លួនជនសង្ស័យដែលស្នាក់នៅក្នុងបន្ទប់ដែលក្រុមជនសង្ស័យខាងលើ ទៅយកវត្ថុតាងគ្រឿងញៀន ដែលលាក់ទុក ហើយមានពាក់ពន្ធ័នឹងករណីប្រើប្រាស់នូវសារធាតុញៀនដោយខុសច្បាប់ បានចំនួន០២នាក់បន្ថែមទៀត៖ ទី០១-ឈ្មោះ ងិន មាសរិទ្ធី ភេទប្រុស អាយុ៣៦ឆ្នាំ រស់នៅភូមិគ្រួស សង្កាត់ស្វាយដង្កំ និងទី០២-ឈ្មោះ កែវ ឡោះ ភេទប្រុស អាយុ១៩ឆ្នាំ រស់នៅភូមិដូនស្វា ឃុំសំរោងយា ស្រុកពួក។
ក្រោយឃាត់ខ្លួនកម្លាំងជំនាញដកហូតបានវត្ថុតាងរួមមាន៖ ម៉ូតូ០១គ្រឿងម៉ាកMSX ពណ៌ខៀវ គ្មានស្លាកលេខ លេខតួលេខម៉ាស៊ីន ៤០០៥២៩ ផ្លាកលេខចំនួន០២សន្លឹកមានសៀមរាប 1Y-1361និងកណ្តាល 1S-6480 ម្សៅគ្រើមពណ៌ស(ម៉ាទឹកកចំនួន១៥កញ្ចប់តូច ទូរសព្ទចំនួន០៣គ្រឿង(ខូច) ជារបស់ជនសង្ស័យ។ ហើយ វត្ថុតាងរបស់ជនរងគ្រោះ ដែលដកហូត បានពីជនសង្ស័យមាន៖ -ទូរទស្សន៍ទំហំ២១ អ៊ិញ ០១គ្រឿង,ម៉ាញ៉េ០១គ្រឿង,សាឡុងឈើ០១,តុតូច ០១,នាឡិកាឈើ០១គ្រឿង,កៅអីផ្អែក០១,ទូទឹកកក០១គ្រឿង,ខោអាវមួយចំនួន។ បច្ចុប្បន្នជនសង្ស័យ និងវត្ថុតាង ត្រូវបាននគរបាលក្រុងសៀមរាប កសាងសំណុំរឿងបញ្ជូនទៅតុលាការដើម្បីចាត់ការតាមនីតិវិធី៕
ចែករំលែកព័តមាននេះ