ស្ទើរតែមិនជឿ ម្ចាស់ខ្សែក្រវ៉ាត់ត្រូវមួយដៃសន្លប់

ថ្ងៃទី ០១ ខែ កក្កដា ឆ្នាំ ២០១៨

ម៉ោង ១៣:៣៦

រាជធានីភ្នំពេញ ៖ ខុសពីការគ្រោងទុកដែលថា ម្ចាស់ខ្សែក្រវាត់កីឡាករ មាស ច័ន្ទមាន នឹងឈ្នះការប្រកួតលើកីឡាករវ័យក្មេងមកពីប្រទេសថៃ Pha Cha បែរជាកីឡាកររូបនេះបរាជ័យក្រោមដៃគូប្រកួតគួរឱ្យភ្ញាក់ផ្អើលទៅវិញ។

កីឡាករកម្ពុជាបានក្លាយជាអ្នកបោះបង់ការប្រកួតក្នុងទឹកទី៣ បន្ទាប់ពីមួយដៃពេញទំហឹងរបស់កីឡាករថៃ ហើយត្រូវចំចុងដង្ហើម រហូតដល់ថ្នាក់ដួលអុកគូទក្រោកលែងរួច ទោះជារាប់ដល់១០។

ការបរាជ័យដែលបានកើតឡើងនៅលើសង្វៀនទូរទស្សន៍អាស៊ីអាគ្នេយ៍ កាលពីព្រឹកថ្ងៃទី១ ខែកក្កដានោះ កីឡាករទាំងពីរបានឡើងប្រកួតគ្នាក្នុងនាមជាគូប្រកួតអន្តរជាតិ ដោយកីឡាករទាំងពីរគ្រាន់តែបើកឆាកភ្លាមក៏រាងស្វាហាប់រៀងខ្លួន ដោយមិននឹកស្មានការប្រកួតនឹងបញ្ចប់ត្រឹមទឹកទី៣នោះផង ហើយរឹតតែមានអ្នកនឹកស្មានមិនដល់ទៅទៀតសម្រាប់ការបរាជ័យរបស់កីឡាករ មាស ច័ន្ទមាន។

ការប្រកួតបញ្ចប់ត្រឹម២ទឹក កីឡាករទាំង២រកមិនឃើញអ្នកឈ្នះចាញ់នោះទេ ដោយសារតែកីឡាករសុទ្ធតែខ្លាំងរៀងខ្លួន ជាពិសេសក្នុងការវាយដាក់គ្នាទៅវិញដែលអ្នកណាក៏មើលឃើញថា មានចំណុចខ្លាំងដូចគ្នា។ ប៉ុន្តែឈានចូលក្នុងទឹកទី៣ ពេលដែលកីឡាករទាំង២ស្ថិតក្នុងការប្រកួតដាក់គ្នាយ៉ាងស្វិតស្វាញ ស្រាប់តែកីឡាករ មាស ច័ន្ទមាន ក៏ត្រូវមួយដៃរបស់កីឡាករថៃចំចុងដង្ហើម រហូតដល់ថ្នាក់អង្គុយអុកគូទ ហើយសម្រេចដល់ការបោះបង់ការប្រកួតនៅក្នុងទឹកនោះ។

បើទោះជាមានការរិះគន់ថា កីឡាករ មាស ច័ន្ទមាន ធ្លាក់ដៃជាងមុន ទើបបណ្ដាលឱ្យភ្លាត់ស្នៀតនាពេលនោះ ប៉ុន្តែគ្រូបង្វឹក និងអ្នកជំនាញភាគច្រើនអះអាងថា កីឡាកររូបនេះបរាជ័យដោយសារតែការភ្លាត់ស្នៀតប៉ុណ្ណោះ ដោយមន្ត្រីអ្នកជំនាញផ្នែកកីឡាជាច្រើននាក់ គឺទោះជាកីឡាករល្អ និងខ្លាំងប៉ុណ្ណា ក៏អាចជួបរឿងភ្លាត់ស្នៀត ហើយឈានដល់ការសន្លប់បែបនេះបានដែរ ដោយសារតែក្នុងពេលវាយលុកដាក់គ្នាទៅវិញទៅមក គឺអ្នកណាក៏វ៉ៃខ្លាំងទៅខ្លាំងមក ដែល អ្នកណារហ័សជាងនឹងមានឱកាសនោះដែរ។ អ្នកជំនាញនៅតែអះអាងថា ការបរាជ័យរបស់មាស ច័ន្ទមាន នៅតែបង្ហាញថា គេជាកីឡាករនៅល្អ បើមិនដូច្នោះគឺមិនអាចត្រឹមតែអុកគូទបែបហ្នឹងទេ៕