ក្នុងការជួយសង្គ្រោះក្រុមកីឡាករក្មេងៗ១៣នាក់ដែលជាប់ក្នុងល្អាង គឺមានស្ថានការណ៍ពិបាកក្នុងជួយ ដោយសារតែមានភ្លៀងធ្លាក់ជាបន្តបន្ទាប់ ធ្វើឱ្យមានទឹកជន់ឡើងខ្លាំង បណ្តាលឱ្យជាឧបសគ្គរបស់ក្រុមជួយសង្គ្រោះ ដើម្បីស្វែងរកអ្នកបាត់ខ្លួននោះ ។ ការបាត់ខ្លួននេះ នៅតែជាព័ត៌មានមួយល្បីល្បាញទូទាំងពិភពលោក ផ្តោតការចាប់អារម្មណ៍លើករណីក្រុមកីឡាករក្មេងៗដែលបាត់ខ្លួន…
ក្នុងការជួយសង្គ្រោះក្រុមកីឡាករក្មេងៗ១៣នាក់ដែលជាប់ក្នុងល្អាង គឺមានស្ថានការណ៍ពិបាកក្នុងជួយ ដោយសារតែមានភ្លៀងធ្លាក់ជាបន្តបន្ទាប់ ធ្វើឱ្យមានទឹកជន់ឡើងខ្លាំង បណ្តាលឱ្យជាឧបសគ្គរបស់ក្រុមជួយសង្គ្រោះ ដើម្បីស្វែងរកអ្នកបាត់ខ្លួននោះ ។
ការបាត់ខ្លួននេះ នៅតែជាព័ត៌មានមួយល្បីល្បាញទូទាំងពិភពលោក ផ្តោតការចាប់អារម្មណ៍លើករណីក្រុមកីឡាករក្មេងៗដែលបាត់ខ្លួន ព្រមទាំងគ្រូបង្វឹកសរុបចំនួន១៣នាក់នៅក្នុងល្អាងលួង-ខុនណាម ណាងណន ក្នុងស្រុកមេសាយ ខេត្តឈៀងរ៉ាយ ភាគខាងជើងប្រទេសថៃ ។ គិតមកទល់ថ្ងៃទី២៧ មិថុនា ការស្វែងរកពួកគេ (ជនរងគ្រោះ) បានប្រើរយៈពេលជាង១០០ម៉ោងទៅហើយ នៅតែមិនបានជួបប្រទះទៀត ។
តាមប្រភពពីកាសែតថៃរ៉ាត់ ប្រទេសថៃ បានសរុបភារកិច្ចជួយសង្គ្រោះជីវិតមនុស្សទាំង១៣នាក់ សម្រាប់ហេតុការណ៍ដែលកើតឡើងកន្លងមកថា ក្រុមជួយសង្គ្រោះបានពង្រាយខ្សែភ្លើង និងរៀបចំម៉ាស៊ីនបូមទឹក ប៉ុន្តែម៉ាស៊ីនបូមទឹក នៅមានបញ្ហាមិនអាចដំណើរការបាន ។ កងកម្លាំង ក៏បង្ខំធ្វើការត្រួតពិនិត្យម៉ាស៊ីនបូមទឹក ខណៈផ្នែកខាងក្រៅល្អាង មានភ្លៀងធ្លាក់គ្រប់ពេលវេលា ។
ភ្លៀងធ្លាក់ខ្លាំងជាបន្តបន្ទាប់ ដែលបង្កឲ្យមានទឹកជន់មកដល់តំបន់ទី៣ ធ្វើឲ្យក្រុមជួយសង្គ្រោះត្រូវផ្លាស់ប្តូរទីតាំងពីតំបន់ទី៣ មកតំបន់ទី២វិញ ។ ក្រុមស្វែងរកអ្នកបាត់ខ្លួនបានត្រៀមធ្វើដំណើរ ដើម្បីស្វែងរកផ្លូវចូលតាមច្រកផ្សេង បន្ទាប់ពីនោះ ក្រុមជួយអាសាបានត្រៀមធ្វើដំណើរចូលក្នុងតំបន់នោះម្តងទៀត ព្រមជាមួយឧបករណ៍ផ្សេងៗ ។
ក្រុមជួយសង្គ្រោះបានចូលទៅក្នុងល្អាងពិនិត្យមើលផ្នែកខាងក្នុងនៃល្អាង ។ ពួកគេបញ្ជាក់ថា នៅក្នុងល្អាងនេះ មានប្រហោងជម្រៅជ្រៅ ដែលអាចចូលទៅបាន ។ ក្រុមឧទ្យានជាតិសត្វព្រៃ និងរុក្ខជាតិ បានប្រើគ្រឿងចក្រជីកដីនៅក្បែរបរិវេណអាងស្តុកទឹក ចេញពីផ្លូវទឹកល្អាងលួង បង្ខំស្រូបទឹកចេញ ដើម្បីឲ្យក្រុមជួយសង្គ្រោះអាចចូលទៅដល់តំបន់គោលដៅបានឆាប់បំផុត ។
សម្តេចព្រះចៅផាចុឡាផាន់ វិល័យលក្ខណ៍ បានព្រះរាជទានប្រាក់ឧបត្ថម្ភការជួយសង្គ្រោះមនុស្សទាំង១៣នាក់ ដែលជាប់នៅក្នុងល្អាងលួង ខេត្តឈៀងរ៉ាយ ព្រមទាំងផ្តល់កម្លាំងចិត្តដល់អ្នកប្រតិបត្តិការងារ សូមឲ្យគ្រប់គ្នាមានសុវត្ថិភាព និងទទួលបានជោគជ័យ ។ ឧទ្ធម្ភាគចក្រដំបូង បានហោះពិនិត្យមើលលើកំពូលល្អាង ប៉ុន្តែផ្ទៃមេឃមិនអំណោយផល ជាពិសេស នៅលើកំពូលភ្នំណាងណន (នាងដេក) ដែលជាទីតាំងល្អាង
លួង ។
លោកឧត្តមសេនីយ៍ ឆាឡឺឆៃ សិទ្ធីសាថ (Chalermchai Sittisart) មេបញ្ជាការកងទ័ព បានមកដល់ឧទ្យានល្អាងលួង ដើម្បីតាមដានភារកិច្ចការងារស្វែងរកជីវិតមនុស្សទាំង១៣នាក់ ។ យោងតាមទំព័រហ្វេសប៊ុក Thai NavySEAL រាយការណ៍ថា បរិមាណទឹកនៅក្នុងល្អាងលួងបានកើនឡើងជាប្រចាំ មិនឈប់ឈរនៅតាមច្រកនៃរូង និងអាងទឹក ហើយមានទឹកពោរពេញហូរមកខ្លាំងឡើងស្ទើរគ្រប់ចំណុច ។ ក្រុមពង្រាយខ្សែភ្លើង និងក្រុមជួយសង្គ្រោះដែលទទួលខុសត្រូវខាងផ្នែកនេះ បានប្រឹងប្រែងធ្វើការងារ២៤ម៉ោងលើ២៤ម៉ោង ។
អ្នកថ្មើរជើងបានមកដល់ជិតចំណុចរូងដើម្បីរកច្រកជួយសង្គ្រោះកីឡាករទាំងនោះ ដែលនៅលើកំពូលល្អាងមានថ្មខ្ពស់ច្រើនជាន់ ហើយផ្លូវដើរ គឺជាផ្លូវដីរអិលដោយសារភ្លៀងធ្លាក់ ដែលត្រូវប្រុងប្រយ័ត្នបំផុត ។
ក្រុមអ្នកមុជទឹក និងអ្នកជំនាញមកពីប្រទេសអង់គ្លេស ចំនួន៣នាក់ រួមជាមួយឧបករណ៍មុជទឹក បានធ្វើដំណើរមកដល់ប្រទេសថៃហើយ និងត្រៀមធ្វើដំណើរទៅខេត្តឈៀងរ៉ាយភ្លាមៗ ។ អ្នកធ្វើការនៅព្រលានយន្តហោះខេត្តឈៀងរ៉ាយ ក៏បានត្រៀមទទួល និងផ្តល់ភាពងាយស្រួលដល់អ្នកជំនាញទាំង៣រូបបានទៅដល់ល្អាងនោះឲ្យបានលឿនបំផុត ។ក្រុមអាជ្ញាធរបានប្រកាសបិទឧទ្យានល្អាងលួងជាបណ្តោះអាសន្ន ដើម្បីផ្តល់ភាពងាយស្រួលដល់ក្រុមស្វែងរក និងជួយសង្គ្រោះក្រុមកីឡាករបាត់ខ្លួន ព្រមទាំងហាមឃាត់បុគ្គលពីខាងក្រៅចូលមកក្នុងតំបន់ផងដែរ ។
ទោះជាយ៉ាងណា នៅវេលាម៉ោង០៤និង៥០នាទីរសៀលថ្ងៃទី២៧ មិថុនា ដដែល លោកឧត្តមសេនីយ៍ Chalongchai Chaiyakum មេបញ្ជាការទ័ពរងទី៣បានថ្លែងថា ៖ « អាជ្ញាធរដែលដំឡើងម៉ាស៊ីនបូមទឹកប្រចាំក្រុងបាងកក បានត្រៀមខ្លួនរៀបចំរួចរាល់ហើយ ចំណែករឿងភ្លៀងធ្លាក់ នៅតែបង្កឲ្យមានទឹកជន់ឡើងជាប្រចាំ ប៉ុន្តែនៅតែអាចធ្វើការបាន» ។ លោកបញ្ជាក់ថា ពួកយើងមិនបានជួបក្រុមកីឡាករដែលបាត់ខ្លួនទាំង១៣នាក់នោះឡើយ ។
ចែករំលែកព័តមាននេះ