ទីក្រុងតេអេរ៉ង់៖ អ៊ីរ៉ង់ឱ្យសញ្ញាថាខ្លួននឹងប្រហារជីវិតជាបន្ទាន់នូវអ្នកជាប់ឃុំដែលពាក់ព័ន្ធនឹងចលនាបាតុកម្មទូទាំងប្រទេស។ ដូច្នេះទោះបីលោកដូណាល់ត្រាំចេញសេចក្ដីព្រមានយ៉ាងណាក៏ដោយក៏ជាការឥតប្រយោជន៍ដែរ។ ខាងលើនេះជាការថ្លែងរបស់ប្រធានផ្នែកយុត្តាធិការអ៊ីរ៉ង់ លោកហ្គោឡាមហ៊ូសេន ម៉ូសេនីអ៊ីជេ (Gholamhossein Mohseni-Ejei)។ ក្រុមសកម្មជនសិទ្ធិមនុស្សយល់ថាការប្រហារជីវិតដោយព្យួរកនឹងកើតមានឆាប់ៗនេះ។
ដូច្នេះចំនួនអ្នកស្លាប់នឹងកើនឡើងកាន់តែច្រើន។ មនុស្សស្លាប់កើនឡើងដល់ជាង២៥០០នាក់ដោយសារការហែបាតុកម្មត្រឹមតែប៉ុន្មានថ្ងៃប៉ុណ្ណោះ។ ស្លាប់លើកនេះច្រើនជាងពេលណាៗទាំងអស់បើប្រៀបធៀបនឹងការហែបាតុកម្ម ឬតវ៉ានៅប្រទេសអ៊ីរ៉ង់កាលពីពេលកន្លងមក។ លោកត្រាំនៅតែបញ្ជាក់ដដែលឡើងវិញថាលោកអាចនឹងធ្វើអន្តរាគមន៍យោធាបើសិនមានការបង្ក្រាបធ្ងន់ធ្ងរទៅលើហ្វូងបាតុករបណ្ដាលឱ្យស្លាប់។
នៅថ្ងៃនេះ អ៊ីរ៉ង់បានរៀបចំពិធីបុណ្យសពជូនកងសន្តិសុខ១០០នាក់ដែលបានស្លាប់នៅក្នុងការប្រទាំងប្រទើសគ្នាជាមួយហ្វូងបាតុករ។ មនុស្សរាប់ម៉ឺននាក់ចូលរួមពិធីកាន់ទុក្ខ។ ពួកគេកាន់ទង់ជាតិអ៊ីរ៉ង់ និងរូបថតអគ្គមគ្គុទ្ទេសក៍អ៊ីរ៉ង់ លោកអាយ៉ាតូឡា អាលី ខាមេនី (Ayatollah Ali Khamenei)។ នៅទីកន្លែងដទៃទៀត មនុស្សរស់នៅទាំងអារម្មណ៍ភិតភ័យ។ កងសន្តិសុខជាតិដែលស្លៀកពាក់ស៊ីវិលនៅតែបន្តឃ្លាំមើលសកម្មភាពរបស់ប្រជាជន។
លោកមូសេនី អ៊ីជេថ្លែងថាបើយើងចង់ធ្វើកិច្ចការអ្វីមួយ យើងគួរតែធ្វើភ្លាមដោយឥតបង្អង់។ បើសិនយើងចេះតែពន្យារពេលពីរខែ បីខែ ពេលនោះលទ្ធផលការងារមិនដូចគ្នាទេ។ បើយើងចង់ធ្វើអ្វីមួយត្រូវតែធ្វើឱ្យលឿន។ ការថ្លែងរបស់ប្រធានយុត្តាធិការរូបនេះជាការប្រឆាំងនឹងពាក្យសម្ដីរបស់លោកត្រាំដែលបានចេញសេចក្ដីព្រមានថាអ៊ីរ៉ង់នឹងមានបញ្ហាធំបើសិនពួកគេប្រហារជីវិតអ្នកជាប់ឃុំ។
លោកត្រាំថាយើងនឹងចាត់វិធានការដ៏ខ្លាំងក្លា។ បើពួកគេហ៊ានធ្វើដូច្នេះមែន (ប្រហារជីវិត) យើងនឹងចាត់វិធានការដ៏ខ្លាំងក្លាបំផុត។ យើងមិនចង់ឃើញព្រឹត្តិការណ៍ដែលកំពុងកើតឡើងនៅប្រទេសអ៊ីរ៉ង់ទេ។ បើពួកគេធ្វើបាតុកម្ម នោះជារឿងមួយ។ ប៉ុន្តែបើពួកគេសម្លាប់មនុស្សរាប់ពាន់នាក់ ហើយឈានដល់ការប្រហារជីវិតមនុស្សដោយព្យួរកថែមទៀតនោះ យើងរង់ចាំមើលទាំងអស់គ្នាថាតើនឹងមានអ្វីកើតឡើងចំពោះពួកគេ។ គ្មានលទ្ធផលល្អសម្រាប់ពួកគេទេ។
អ្នកការទូតម្នាក់ប្រាប់ថាក្រុមប្រទេសអារ៉ាប់ធំៗកំពុងនិយាយបញ្ចុះបញ្ចូលលោកត្រាំកុំវាយប្រហារអ៊ីរ៉ង់។ ពួកគេបារម្ភថាបើសិនលោកត្រាំវាយប្រហារមែន ពេលនោះអាចនឹងមានផលវិបាកយ៉ាងធំធេង។ ពោលគឺសង្គ្រាមនឹងផ្ទុះឡើងពេញតំបន់មជ្ឈិមបូព៌ា។ បន្ទាប់ពីរដ្ឋាភិបាលអ៊ីរ៉ង់ផ្ដាច់សេវាអ៊ីនធឺណិត ក្រុមហ៊ុនស្តាលីង (StarLink) របស់អ៊ីឡនម៉ាស់បានផ្ដល់សេវាដោយឥតគិតថ្លៃ។ អ៊ីរ៉ង់អនុញ្ញាតឱ្យហៅទូរស័ព្ទចេញទៅក្រៅប្រទេស។ ប៉ុន្តែអ្នកដែលចង់ហៅពីក្រៅប្រទេសចូលអ៊ីរ៉ង់មិនអាចទៅរួចទេ។ នេះបើយោងតាមការផ្សាយរបស់អេភី (AP) និងប្រភពដទៃទៀត៕
ចែករំលែកព័តមាននេះ