រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជណាចក្រកម្ពុជា បានធ្វើប្រទានកម្មដីធ្លីជូនប្រជាពលរដ្ឋ៣៨០គ្រួសារកំពុងរស់នៅភូមិព្រែកតាគង់១ សង្កាត់ចាក់អង្រែលើ ខណ្ឌមានជ័យ…
រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជណាចក្រកម្ពុជា បានធ្វើប្រទានកម្មដីធ្លីជូនប្រជាពលរដ្ឋ៣៨០គ្រួសារកំពុងរស់នៅភូមិព្រែកតាគង់១ សង្កាត់ចាក់អង្រែលើ ខណ្ឌមានជ័យ តាមការស្នើសុំរបស់ប្រជាពលរដ្ឋ ។
ពិធីប្រគល់ដីប្រទានកម្មសិទ្ធិពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ជូនប្រជាពលរដ្ឋចំនួន៣៨០គ្រួសាររស់នៅភូមិព្រែកតាគង់១ សង្កាត់ចាក់អង្រែលើ ខណ្ឌមានជ័យ បានធ្វើឡើង កាលពីព្រឹក ថ្ងៃទី២៧ ខែមិថុនា ឆ្នាំ២០១៨ នៅសាលាខណ្ឌមានជ័យ ស្ថិតក្នុងអធិបតីភាពលោក ឃួង ស្រេង អភិបាលរាជធានីភ្នំពេញ ដោយមានការចូលរួមពីប្រជាពលរដ្ឋយ៉ាងច្រើនកុះករ ។
លោក ឃួង ស្រេង បានលើកឡើងថា ការសម្រេចចិត្តរបស់អាជ្ញាធរប្រគល់ដីប្រទានកម្មជូនបងប្អូនដែលរងផលប៉ះពាល់ពីការអភិវឌ្ឍតំបន់បឹងជើងឯក នាពេលនេះគឺអនុវត្តន៍ទៅតាមការណែនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ដែលបងប្អូនបានស្នើសុំពីសម្តេចកន្លងមក ។
លោកបន្តថា ដោយពិនិត្យឃើញពីភាពលំបាករបស់បងប្អូនសម្តេចក៏បានប្រគល់ដីប្រទានកម្មនេះតាមរយៈរដ្ឋបាលសាលារាជធានីភ្នំពេញ ពីព្រោះបងប្អូនពិតជារស់នៅទីតាំងនេះជាយូរឆ្នាំមែនហើយក្នុងមានគណៈអភិបាលរាជធានីភ្នំពេញមានសេចក្តីរំភើបរីករាយមកផ្សព្វផ្សាយជូននេះគឺជាសំណើររបស់បងប្អូនទៅសម្តេចអគ្គមហាសេនាបតីតេជោ ហ៊ុន សែន ត្រូវបានសម្តេចធ្វើប្រទានកម្មក្នុងនាមជាប្រមុខរាជរដ្ឋាភិបាលកម្ពុជា និងក្នុងនាមជាថ្នាក់ដឹកនាំដែលតែងតែយកចិត្តទុកដាក់ជីវភាពទៅលើការរស់នៅរហូតដល់ពេលនេះកម្មសិទ្ធិនេះនឹងអាចបោះឆ្នោតហើយភ្លាមអាចទទួលបានកម្មសិទ្ធិតែម្តង ។
លោក ឃួង ស្រេង បានឲ្យដឹងទៀតថា ការប្រគល់ដីប្រទានកម្មដីជូនបងប្អូននេះគឺមានការចុះវាស់វែងពីមន្ត្រីជំនាញ និងអាជ្ញាធរបានច្បាស់លាស់ទើបឈានទៅដល់ការធ្វើប័ណ្ណកម្មសិទ្ធិ និងប្រគល់ប័ណ្ណកម្មសិទ្ធិស្របច្បាប់ ។ ការចែកវិញ្ញាបនបត្រសម្គាល់ម្ចាស់អចលនវត្ថុនេះគឺមានផលប្រយោជន៍ពីរយ៉ាងគឺប្រជាពលរដ្ឋក៏បានផលប្រយោជន៍ហើយរដ្ឋក៏ទទួលផលប្រយោជន៍ព្រោះពេលប្រជាពលរដ្ឋមានលំនឹងពិតប្រាកដមានលំនៅដ្ឋានផ្ទះនៅស្របច្បាប់អាចយកទៅដាក់ធនាគារយកលុយមកប្រើប្រាស់បានតាមតម្រូវការរស់នៅក្នុងជីវភាពប្រចាំថ្ងៃ តែសុំឱ្យបងប្អូនប្រើប្រាស់វា ជាប្រយោជន៍សម្រាប់ក្រុមគ្រួសារ រក្សាទុកឱ្យបានល្អ កុំឱ្យបាត់បង់ និងនាំគ្នាទៅបង់ពន្ធជូនរដ្ឋឱ្យបានគ្រប់ៗគ្នាតាមការកំណត់របស់រដ្ឋព្រោះវាជាកាតព្វកិច្ចរបស់ប្រជាពលរដ្ឋខ្មែរ ៕
ចែករំលែកព័តមាននេះ