ប្រទេសនីហ្សេរីយ៉ា ៖ បើតាមកងកម្លាំងសន្តិសុខនីហ្សេរីយ៉ា កាលពីថ្ងៃទី២៥ មិថុនា បានបញ្ជូនកម្លាំងបន្ថែមមកកាន់រដ្ឋ PLATEAU នាភាគកណ្ដាលប្រទេស ក្រោយចុងសប្ដាហ៍នៃអំពើហិង្សារវាងពួកអ្នកចិញ្ចឹមសត្វជាជនអ៊ិស្លាម និងពួកកសិករគ្រឹស្ត ដែលបណ្ដាលឲ្យមនុស្សយ៉ាងតិច៨៦នាក់ស្លាប់ ប៉ុន្តែប្រភពព័ត៌មានមូលដ្ឋានថា ចំនួនជនរងគ្រោះអាចមានច្រើនជាងនេះទៀត។
អង្គការក្រៅរដ្ឋាភិបាលគ្រឹស្តមួយ អះអាងថា បានជំរឿនឃើញអ្នកស្លាប់ដល់ទៅ១៦៩នាក់ក្នុងភូមិ៦។ ការវាយប្រហារដោយមានការសម្របសម្រួលគ្នា កើតមានកាលពីយប់ថ្ងៃទី២៣ មិថុនា ក្នុងភូមិជាច្រើននៃរដ្ឋ PLATEAU។ ក្រៅពីអ្នកស្លាប់មនុស្ស៦នាក់របួសធ្ងន់។ ចំណែកផ្ទះ៥០ខ្នង និងម៉ូតូ១៥គ្រឿងត្រូវដុតបំផ្លាញ។ ការវាយប្រហារទាំងនេះ កើតមាន ជាពិសេសនៅភូមិរ៉ាហ្សាត រូគូ នីយ៉ារ គូរ៉ានិងហ្គាណារ៉ូប ក្នុងតំបន់បាគីនឡាឌី។ ភូមិដែលកើតមានការវាយប្រហារមានសរុបដល់១១ភូមិ។
អាជ្ញាធរបានបញ្ជាក់ថា ការស៊ើបអង្កេតមួយត្រូវបានបើកធ្វើ រួចបម្រាមគោចរពេលយប់ត្រូវបានដាក់ក្នុងតំបន់មានការវាយប្រហារ។ រដ្ឋ PLATEAU នាភាគខាងជើងមានពួកអ៊ិស្លាមភាគច្រើនគឺភាគខាងត្បូងមានពួកគ្រឹស្តភាគច្រើន។ ជម្លោះសហគមន៍ទាំង២តែងកើតមាន៕
ចែករំលែកព័តមាននេះ