រាជធានីភ្នំពេញ ៖ អាជ្ញាធររាជធានីភ្នំពេញបានអះអាងថា ការរំលោភយកចិញ្ចើមផ្លូវធ្វើអាជីវ កម្មអាជ្ញាធរមូលដ្ឋានត្រូវតែមានវិធានជាប្រចាំដោយសូមកុំគិតថា ការរៀបចំបែបនេះធ្វើឲ្យប៉ះ ពាល់ដល់ការបោះឆ្នោតឡើយ គឺចាំបាច់ត្រូវរួមគ្នា ដើម្បីសោភណ្ឌភាព និងសណ្តាប់សាធារណៈក្នុងរាជធានីភ្នំពេញរបស់យើងទាំងអស់គ្នា ។
ក្នុងកិច្ចប្រជុំជាមួយអាជ្ញាធរសង្កាត់ខណ្ឌទូទាំងរាជធានីភ្នំពេញ និងភ្នាក់ងារប្រមូលសំរាមនៅរដ្ឋបាលរាជធានីភ្នំពេញព្រឹកថ្ងៃទី២១ មិថុនា ២០១៨នេះ លោកឃួង ស្រេង អភិបាលរាជធានីភ្នំពេញបានជម្រុញឱ្យភ្នាក់ងារប្រមូលសំរាម ថ្នាក់ដឹកនាំសង្កាត់ខណ្ឌទាំងអស់ត្រូវយកចិត្តទុកដាក់បន្ថែមទៀត លើការងារពង្រឹងការប្រមូលសំរាមឱ្យបានគ្រប់ទីកន្លែងនៅតាមមូលដ្ឋានដែលខ្លួនគ្រប់គ្រងឲ្យបានជាប្រចាំបើមានសំរាមគរចោលដែលក្រុមហ៊ុនស៊ិនទ្រីមិនបានទៅដឹកជញ្ជូននោះត្រូវរាយការណ៍តាមរចនាសម្ព័ន្ធមក រដ្ឋបាលរាជធានីភ្នំពេញ ដើម្បីចាត់ការទៅក្រុមហ៊ុនឱ្យទៅប្រមូលសំរាមទាំងនោះឱ្យបានទាន់ពេលចៀសវាងទុកសំរាមឱ្យនៅគរចោលស្អុយរលួយធ្វើឱ្យប៉ះពាល់បរិស្ថានអនាម័យ និងសោភណ្ឌភាពក្នុងរាជធានីភ្នំពេញដែលជាបេះដូងនៃប្រទេសកម្ពុជា ។
លោក ឃួង ស្រេង បានលើកឡើងទៀតថា រដ្ឋបាលរាជធានីនឹងធ្វើឡដុតសំរាមនៅតាមតំបន់ ជាយក្រុងមួយចំនួន ជាពិសេសទីតាំងណាដែលរថយន្តប្រមូលសំរាមរបស់ក្រុមហ៊ុនស៊ិនទ្រី ទៅមិនដល់ ដើម្បីកុំឱ្យមានសំរាមរាយប៉ាយ និងគរចោលកាន់តែច្រើនឡើងៗ ។ អាជ្ញាធរមូលដ្ឋានត្រូវចាត់វិធានការឱ្យបានតឹងរឹងបំផុតចំពោះរថយន្តដឹកដីដឹកខ្សាច់ដែលបង្កឱ្យមានជ្រុះ រាយប៉ាយតាមដងផ្លូវធ្វើឱ្យបាត់បង់សណ្តាប់ធ្នាប់ និងប៉ះពាល់សុខភាព សោភណ្ឌភាពក្នុងរាជធានីភ្នំពេញ ។
ចំណែកការដាក់របាំងថ្មបែងចែកទ្រូងផ្លូវវិញមានកន្លែងខ្លះខុសលក្ខណៈបច្ចេកទេសដែល ទាមទារឱ្យមានការកែសម្រួលឡើងវិញដូចជា កាត់ឱ្យមានចន្លោះខាងក្រោមឱ្យបានធំ ដើម្បី ឱ្យទឹកចៀសវាងការកកស្ទះសំរាម និងកំណកដីផងដែរ ។ ចំពោះការរំលោភយកចិញ្ចើមផ្លូវធ្វើ អាជីវកម្ម អាជ្ញាធរត្រូវតែមានវិធានជាប្រចាំដោយសូមកុំគិតថា ការរៀបចំបែបនេះធ្វើឲ្យប៉ះពាល់ដល់ការបោះឆ្នោតឡើយ គឺចាំបាច់ត្រូវរួមគ្នា ដើម្បីសោភណ្ឌភាព និងសណ្តាប់សាធារណៈក្នុងរាជធានីភ្នំពេញរបស់យើងទាំងអស់គ្នា ៕
ចែករំលែកព័តមាននេះ