រាជធានីភ្នំពេញ ៖ លោកកែប ជុតិមា អភិបាលរាជធានីភ្នំពេញនៅព្រឹកថ្ងៃទី២០ ធ្នូ ២០១០ បាននាំយកថវិកាជាអំណោយមនុស្សធម៌ពីប្រជាជនទីក្រុងហូជីមិញតាមរយៈសាលារាជធានីទៅចែកជូនដល់ជនរងគ្រោះដោយឧបទ្ទវហេតុលើស្ពានពេជ្រដែលកំពុងសំរាកព្យាបាលនៅមន្ទីរពេទ្យកាល់ម៉ែត ។ តំណាងមន្ទីរពេទ្យកាល់ម៉ែតឱ្យដឹងថា ជនរងគ្រោះដោយឧបទ្ទវហេតុលើស្ពានពេជ្រកំពុងសំរាកព្យាបាលនៅមន្ទីរពេទ្យកាល់ម៉ែតមានចំនួន២៧នាក់ ស្រី៨នាក់ បន្ទាប់ពីចាកចេញ៥នាក់កាលពីថ្ងៃទីសុក្រ ។ ក្នុងចំណោមអ្នករបួសទាំង២៧នាក់នេះមានរបួសធ្ងន់ចំនួន៤នាក់ កំពុងសង្គ្រោះបន្ទាន់ដូចជាលាងឈាម បែកប្លោកនោម និងបាក់ឆ្អឹងជាដើម ។
អំណោយពីទីក្រុងហូជីមិញប្រទេសវៀតណាមតាមរយៈលោកកែប ជុតិមា អភិបាលរាជធានីភ្នំពេញនោះបានចែកជូនដល់អ្នករបួសក្នុងម្នាក់ៗ៥០០ដុល្លារសហរដ្ឋអាមេរិក ។ ក្នុងឱកាសនោះដែរ លោកកែប ជុតិមា បានផ្តល់ថវិកាដល់មន្ទីរពេទ្យកាល់ម៉ែតចំនួន១ពាន់ដុល្លារជាការលើកទឹកចិត្តដល់ក្រុមគ្រូពេទ្យ ។ អ្នករងគ្រោះបានថ្លែងអំណរគុណដល់ប្រជាជនទីក្រុងហូជីមិញ ប្រទេសវៀតណាមដែលមានសមានចិត្តជួយឧបត្ថម្ភដល់ពួកគេ ។
អ្នករងរបួសដែលសំរាកព្យាបាលនៅមន្ទីរពេទ្យកាល់មែ៉តបានទទួលការ ពិនិត្យព្យាបាល និងថែទាំពីគ្រូពេទ្យមកពីវៀតណាមជាប្រចាំ រហូតមកដល់ពេលនេះ ៕
ចែករំលែកព័តមាននេះ