អ្នកម្នាង អ៊ុក ផល្លា ទទួលមរណភាពនៅម៉ោង១២និង២៣នាទីថ្ងៃត្រង់
- ព្រះសីហនុ
ខេត្តព្រះសីហនុ ៖ ដោយសារតែស្ថានភាពរបួសធ្ងន់ពេក អ្នកម្នាង អ៊ុក ផល្លា ដែលជាជាយាសម្តេចក្រុមព្រះនរោត្តម រណឫទ្ធិ បានទទួលមរណភាពនៅវេលាម៉ោងជិត១រសៀលថ្ងៃទី១៧ មិថុនា…
ខេត្តព្រះសីហនុ ៖ ដោយសារតែស្ថានភាពរបួសធ្ងន់ពេក អ្នកម្នាង អ៊ុក ផល្លា ដែលជាជាយាសម្តេចក្រុមព្រះនរោត្តម រណឫទ្ធិ បានទទួលមរណភាពនៅវេលាម៉ោងជិត១រសៀលថ្ងៃទី១៧ មិថុនា ក្រោយពីជួបឧបទ្ទវហេតុគួរឱ្យរន្ធត់ ជាមួយសម្ដេចក្រុមព្រះនរោត្តម រណឫទ្ធិ ដែលជាស្វាមីនៅចំណុចភូមិអូរតាសេក ឃុំអូរឧកញ៉ាហេង ស្រុកព្រៃនប់ ។ ស្នងការនគរបាលខេត្តព្រះសីហនុ លោកឧត្តមសេនីយ៍ទោ ជួន ណារិន្ទ បានឱ្យដឹងនៅរសៀលថ្ងៃដដែលថា អ្នកម្នាង អ៊ុក ផល្លា បានទទួលមរណភាពតាំងពីវេលាម៉ោង១២ និង២៣នាទីរសៀលដោយសាររបួសធ្ងន់ធ្ងរពេកហើយ ក៏ត្រូវបានបញ្ជូនតាមឧទ្ធម្ភាគចក្រ១គ្រឿងឆ្ពោះមករាជធានីភ្នំពេញ ។ ខណៈដែលសម្ដេចក្រុមព្រះ នរោត្តម រណឫទ្ធិ ជាស្វាមី ត្រូវបានដឹកតាមឧទ្ធម្ភាគចក្រ មកសង្គ្រោះបន្ដនៅរាជធានីភ្នំពេញហើយ ។
សូមបញ្ជាក់ថា សម្ដេចក្រុមព្រះ នរោត្ដម រណឬទ្ធិ ព្រះប្រធានគណបក្សហ្វុ៊នស៊ិនប៉ិច នៅព្រឹកថ្ងៃទី១៧ មិថុនា បានជួបគ្រោះថ្នាក់ចរាចរណ៍ដ៏រន្ធត់មួយ បណ្តាលឱ្យព្រះអង្គ និងអ្នកម្នាង អ៊ុក ផល្លា ជាភរិយារបួសធ្ងន់ ។ គ្រោះថ្នាក់ចរាចរណ៍នេះ បានកើតឡើងនៅអំឡុងម៉ោងជាង៩ព្រឹកថ្ងៃទី១៧ មិថុនា ខណៈដែលព្រះអង្គកំពុងយាងតាមក្បួនព្រះទីនាំង ទៅជួបសំណេះសំណាលជាមួយប្រជាពលរដ្ឋនៅក្នុងខេត្តព្រះសីហនុដែលបានរៀបចំធ្វើនៅក្នុងបុរីពិភពមង្គល នៅក្នុងសង្កាត់៣ ក្រុងព្រះសីហនុ ។
លោកឧត្តមសេនីយ៍ ជួន ណារិន្ទ ស្នងការនគរបាលខេត្តបានឱ្យដឹងថា គ្រោះថ្នាក់ចរាចរណ៍នេះ បង្កឡើងដោយរថយន្តឈ្នួលមួយគ្រឿង ម៉ាកហាយឡែនឌ័រ ពាក់ស្លាកលេខភ្នំពេញ 2L-9667 ធ្វើដំណើរពីខេត្ដព្រះសីហនុ ទៅកាន់រាជធានីភ្នំពេញ ហើយបានបុកចំរថយន្តដែលជាព្រះទីនាំងរបស់សម្តេចក្រុមព្រះតែ
ម្តង ។ រីឯភាគីរថយន្តឈ្នួលហាយឡែនឌ័រ ក៏មានរងរបួស៥នាក់ផងដែរ ។ ទោះជាកើតមានឧបទ្ទវហេតុស្មានមិនដល់បានកើតឡើង ក៏ពិធីនោះត្រូវបានដឹកនាំធ្វើរហូតដល់ចប់ដោយលោក យូ ហុកគ្រី និងមន្ត្រីមួយចំនួនទៀត ។
ចែករំលែកព័តមាននេះ