ប្រទេសយេម៉ែន ៖ កងទ័ពរដ្ឋាភិបាលយេម៉ែន ជួយទ្រទ្រង់ដោយអេមីរ៉ាត់អារ៉ាប់ រួមនិងអារ៉ាប៊ីសាអ៊ូឌីត បានធ្វើការវាយលុកមួយកាលពីថ្ងៃទី១៣ មិថុនា ទៅលើកំពង់ផែយុទ្ធសាស្ត្រ HODEIDA ដែលត្រួតត្រាដោយពួកឧទ្ទាមហ៊ូធី…
ប្រទេសយេម៉ែន ៖ កងទ័ពរដ្ឋាភិបាលយេម៉ែន ជួយទ្រទ្រង់ដោយអេមីរ៉ាត់អារ៉ាប់ រួមនិងអារ៉ាប៊ីសាអ៊ូឌីត បានធ្វើការវាយលុកមួយកាលពីថ្ងៃទី១៣ មិថុនា ទៅលើកំពង់ផែយុទ្ធសាស្ត្រ HODEIDA ដែលត្រួតត្រាដោយពួកឧទ្ទាមហ៊ូធី ទោះបីមានការអំពាវនាវឲ្យមានការអត់ធ្មត់ និងមានការភ័យខ្លាចរបស់ប្រជាជនក្ដី។
រីឯអង់គ្លេសបានស្នើឲ្យមានកិច្ចប្រជុំបន្ទាន់មួយរបស់ក្រុមប្រឹក្សាសន្តិសុខ អង្គការសហប្រជាជាតិ ដែលត្រូវធ្វើជាសម្ងាត់នាថ្ងៃទី១៤ មិថុនា ក្រោយការព្រមានរបស់អង្គការសហប្រជាជាតិប្រឆាំងការវាយលុកនេះ ដែលអាចកាត់ផ្ដាច់ការផ្ដល់ជំនួយដល់មនុស្សច្រើនលាននាក់ ក្នុងប្រទេសក្រីក្រនោះដែលមួយផ្នែកកំពុងធ្លាក់ក្នុងភាពទុរ្ភិក្ស។ ស្ថិតនៅភាគខាងលិចយេម៉ែនដែលកំពុងមានសង្គ្រាម ចាប់តាំងពីជាង៣ឆ្នាំមកហើយ កំពង់ផែធំHODEIDA នៅជាប់សមុទ្រក្រហម គឺជាចំណុចនៃការនាំចូលសំខាន់មួយ ព្រមទាំងជាច្រកបញ្ចូនជំនួយមនុស្សធម៌មកកាន់ដែនដីយេម៉ែន។
យោងតាមបណ្ដាអ្នកទទួលខុសត្រូវនៃកងទ័ពរដ្ឋាភិបាលយេម៉ែនថា ការវាយលុកនេះធ្វើឡើងក្រោយការផ្ដល់ភ្លើងខៀវរបស់ក្រុមយោធាចម្រុះ នាំមុខដោយអារ៉ាប៊ីសាអ៊ូឌីតដែលធ្វើអន្តរាគមន៍នៅយេម៉ែនចាប់ពីខែមីនា ឆ្នាំ២០១៥មក ដើម្បីជួយដល់រដ្ឋអំណាច បញ្ឈប់ការរុលទៅមុខរបស់ពួកឧទ្ទាមហ៊ូធី ដែលកាន់កាប់ដែនដីយ៉ាងធំរបស់ប្រទេស ព្រមទាំងរដ្ឋធានីសាណា។
តាមអ្នកទទួលខុសត្រូវទាំងនោះថា កងទ័ពរុលចូលដល់ច្រកចូលទាំងឡាយនៃព្រលានយន្តហោះ ស្ថិតនៅចម្ងាយប៉ុន្មានគីឡូម៉ែត្រខាងត្បូងកំពង់ផែ HODEIDA។ ហើយការវាយប្រហារតាមអាកាសមួយចំនួនបានធ្វើប្រឆាំងទីតាំងទាំងឡាយ របស់ពួកឧទ្ទាមជាការរៀបចំការវាយលុក។ ចំណែកនៅទីក្រុងកំពង់ផែនេះ ដែលមានប្រជាជនប្រមាណ៦០០០០០នាក់ ហើយបើតាមសាក្សីនានាថា ពួកហ៊ូធី បានពង្រឹងកិច្ចការពារ ដោយជីកលេណដ្ឋាន និងដោយដាក់ពង្រាយខ្មាន់កាំភ្លើងដៃត្រង់នៅតាមដំបូល។
យោងតាមប្រភពមន្ទីរពេទ្យថា ពួកឧទ្ទាម២២នាក់ និងទាហាន៣នាក់ស្លាប់ រយៈពេលតែ២៤ម៉ោងចុងក្រោយនេះ ខណៈការប្រយុទ្ធគ្នាកើតមានចាប់តាំងពីច្រើនថ្ងៃមកហើយនៅជុំវិញក្រុង HODEIDA៕
ចែករំលែកព័តមាននេះ