ទីក្រុងឥស្លាមម៉ាបាត៖ ប៉ាគីស្ថានអះអាងថាខ្លួនបាញ់ធ្លាក់យន្តហោះឥណ្ឌាយ៉ាងតិច៥គ្រឿងនៅក្នុងសង្គ្រាមដ៏បង្ហូរឈាមមិនធ្លាប់មានរយៈពេលជាង២ទសវត្សចុងក្រោយរវាងប្រទេសនុយក្លេអ៊ែរទាំង២។ ប្រភពខ្លះឱ្យដឹងថាចំណុចគោលដៅនៃការវាយប្រហាររបស់ឥណ្ឌាក៏រួមមានខេត្តផាន់ជេប (Punjab) របស់ប៉ាគីស្ថានដែលមានប្រជាជនរបស់នៅច្រើនជាងគេរហូតដល់ជាង១២០លាននាក់ផងដែរ។
នេះជាករណីដំបូងដែលឥណ្ឌាវាយខេត្តផាន់ជេបចាប់តាំងពីប្រទេសទាំង២ផ្ទុះសង្គ្រាមនឹងគ្នាកាលពីជាងកន្លះសតវត្សមុន។ ប៉ាគីស្ថានចោទប្រកាន់ថាឥណ្ឌាកំពុងបង្កាត់ភ្លើងសង្គ្រាមឱ្យឆាបឆេះកាន់តែខ្លាំងនៅក្នុងតំបន់។ ដូច្នេះ ប៉ាគីស្ថានថាខ្លួននឹងចាត់វិធានការឆ្លើយតបទៅឥណ្ឌាវិញទៅតាមពេលវេលា ទីកន្លែង និងទំហំនៃវាយប្រហារទៅលើប្រជាជនស្លូតត្រង់ដែលគ្មានកំហុស។ ប៉ាគីស្ថានថានេះជាការរំលោភយ៉ាងច្បាស់ក្រឡែតទៅលើអធិបតេយ្យភាពជាតិរបស់ខ្លួន។
នៅក្នុងការវាយប្រហារកាលពីព្រឹកមិញនេះ ឥណ្ឌាអះអាងថាខ្លួនបានវាយទីតាំង៩កន្លែងដែលសង្ស័យថាជាទីជម្រកលាក់ខ្លួនរបស់ក្រុមភេរវកម្ម។ ពួកជនប្រដាប់អាវុធដែលបាញ់ស្លាប់អ្នកទេសចរ២៦នាក់នៅតំបន់កាស់ស្មៀក៏ជាប់ពាក់ព័ន្ធនឹងទីតាំងទាំងនេះផងដែរ។ នៅក្នុងចំណោមទីតាំងទាំងនោះ ៤កន្លែងស្ថិតនៅខេត្តផាន់ជេប និង៥កន្លែងស្ថិតនៅតំបន់កាស់ស្មៀប៉ែកខាងប្រទេសប៉ាគីស្ថាន។
ប៉ាគីស្ថានថ្លែងថាទីតាំង៦កន្លែងរបស់ខ្លួនដែលឥណ្ឌាវាយប្រហារនោះជាទីតាំងស៊ីវិលទាំងអស់បណ្ដាលឱ្យស្លាប់មនុស្ស២៦នាក់ និងរបួស៤៦នាក់។ ចំណែកឥណ្ឌាវិញអះអាងថាកងទ័ពរបស់ខ្លួនវាយប្រហារសុទ្ធតែទីតាំងល្អៗដែលមានទំនាក់ទំនងជាមួយក្រុមភេរវកម្ម។ អ្នកនាំពាក្យឥណ្ឌាបញ្ជាក់បន្ថែមទៀតថាការវាយប្រហារនេះគឺសំដៅទៅលើជំរំរបស់ពួកភេរវកម្ម។
ទីនេះជាកន្លែងជ្រើសរើសសមាជិកថ្មីៗរបស់ពួកគេ, ជាទីតាំងចេញធ្វើសកម្មភាព និងបំពាក់បំប៉នមនោគមន៍វិជ្ជា។ ឥណ្ឌាថាពួកភេរវកម្មបានទុកដាក់គ្រឿងសព្វាវុធ និងហ្វឹកហ្វឺនក្បួនយុទ្ធសាស្ត្រផ្សេងៗនៅទីតាំងទាំងនោះ។ ឥណ្ឌាថ្លែងថាខ្លួនបានជ្រើសរើសគ្រាប់កាំភ្លើងយកមកប្រើប្រាស់ដោយប្រុងប្រយ័ត្នដើម្បីជៀសវាងការខូចខាតទ្រព្យសម្បត្តិ និងផ្ទះសម្បែងរបស់អ្នកស្រុក។
ជាលទ្ធផលនៃការប៉ះគ្នា១ប្រាវកាលពីព្រឹកមិញ ខុទ្ទកាល័យនាយករដ្ឋមន្ត្រីប៉ាគីស្ថានប្រកាសថាយន្តហោះចម្បាំងរបស់ឥណ្ឌា៥គ្រឿងត្រូវបានបាញ់ទម្លាក់ រួមទាំងដ្រូនផងដែរ។ ប៉ុន្តែឥណ្ឌាមិនទទួលស្គាល់សេចក្ដីប្រកាសនេះទេ។ អាជ្ញាធរមូលដ្ឋានរបស់ឥណ្ឌានៅតំបន់កាស់ស្មៀប្រាប់រ៉យទ័រថាយន្តហោះចម្បាំងបីគ្រឿងបានធ្លាក់នៅលើទីតាំងផ្សេងៗគ្នា។ ប៉ុន្តែសំណាងល្អ អាកាសយានិកទាំងបីនាក់អាចចុចគន្លឹះឆ័ត្រយោងដើម្បីជម្លៀសខ្លួនចេញមុនពេលយន្តហោះផ្ទុះឆេះ។ គ្រាន់តែថាពួកគេក៏រងរបួសខ្លះៗផងដែរ។ នេះបើយោងតាមការដកស្រង់ប្រភពពីរ៉យទ័រ៕
ចែករំលែកព័តមាននេះ