ទីក្រុងប៊ែឡាំង៖ នៅទីបំផុត បេក្ខជនអធិការបតីអាណត្តិថ្មីនៅប្រទេសអាល្លឺម៉ង់ លោកហ្វ្រ៊ីតរីច មើស (Friedrich Merz) បានទទួលបរាជ័យហើយបន្ទាប់ពីបញ្ជូនបេក្ខភាពទៅឱ្យរដ្ឋសភាអនុម័ត ប៉ុន្តែមិនបានសំឡេងគាំទ្រគ្រប់គ្រាន់។ បរាជ័យលើកនេះជាសេចក្ដីអាម៉ាស់ដ៏ធំសម្រាប់បេក្ខជនមកពីគណបក្សអភិរក្សនិយមរូបនេះ…
ទីក្រុងប៊ែឡាំង៖ នៅទីបំផុត បេក្ខជនអធិការបតីអាណត្តិថ្មីនៅប្រទេសអាល្លឺម៉ង់ លោកហ្វ្រ៊ីតរីច មើស (Friedrich Merz) បានទទួលបរាជ័យហើយបន្ទាប់ពីបញ្ជូនបេក្ខភាពទៅឱ្យរដ្ឋសភាអនុម័ត ប៉ុន្តែមិនបានសំឡេងគាំទ្រគ្រប់គ្រាន់។ បរាជ័យលើកនេះជាសេចក្ដីអាម៉ាស់ដ៏ធំសម្រាប់បេក្ខជនមកពីគណបក្សអភិរក្សនិយមរូបនេះ និងជាសញ្ញាមិនល្អសម្រាប់ប្រទេសអាល្លឺម៉ង់។ នេះបើតាមមតិប្រជាជនអាល្លឺម៉ង់នៅទីក្រុងហ្វ្រាងហ្វឺត (Frankfurt) ដែលចូលរួមផ្ដល់បទសម្ភាសឱ្យអ្នកសារព័ត៌មាន។
ជាគោលការណ៍ បើបេក្ខជនអធិការបតីបញ្ជូនទៅសភាមិនបានជោគជ័យ គណបក្សឈ្នះឆ្នោតអាចស្នើបេក្ខជនផ្សេងទៀតនៅពេលណាក៏បាន។ ឧបមាថាលោកហ្វ្រីតរីចមើសដកខ្លួនថយ គណបក្សត្រូវជ្រើសរើសបេក្ខជនថ្មី។ គណបក្សរបស់លោកត្រូវខិតខំចរចាសាជាថ្មីជាមួយគណបក្សដទៃទៀតដើម្បីបង្គ្រប់សំឡេង លើកលែងតែគណបក្សស្ដាំនិយមជ្រុល AfD ដែលមិនអាចយកចូលទៅក្នុងកញ្ចប់នយោបាយបានទេព្រោះមិនត្រូវធាតុគ្នា។
សម្រាប់សម័យអន្តរកាលនេះ ដោយសារមិនទាន់ជ្រើសរើសបានអធិការបតីថ្មី លោកអូឡាហ្វសូលដែលបានផុតអាណត្តិ និងប្រកាសបញ្ចប់តំណែងជាផ្លូវការថ្ងៃនេះនឹងបន្តកាន់តំណែងជាអធិការបតីស្ដីទីជាបណ្ដោះអាសន្ន។ លោកហ្វ្រីតរីចមើសត្រូវការសំឡេងគាំទ្រយ៉ាងតិច៣១៦ពីអ្នកតំណាងរាស្ត្រក្នុងចំណោមអាសនៈសរុប៦៣០។ ប៉ុន្តែជាក់ស្ដែងលោកទទួលបាន៣១០សំឡេង។ មានន័យថានៅខ្វះ៦សំឡេងទៀត។
តាមពិត បើគេបូកសរុបចំនួនអ្នកតំណាងរាស្ត្រនៅក្នុងគណបក្សសម្ព័ន្ធភាពជាមួយគ្នាគួរណាស់លោកជាប់ឆ្នោតនៅសភា។ ប៉ុន្តែនៅពេលបោះឆ្នោតជាក់ស្ដែងអ្នកតំណាងរាស្ត្រយ៉ាង១៨រូបនៅក្នុងសម្ព័ន្ធភាពជាមួយគ្នាបោះឆ្នោតប្រឆាំងនឹងបេក្ខភាពរបស់លោកមើស។ ជាបន្តទៅទៀតនេះ រដ្ឋសភាមានពេល១៤ថ្ងៃដើម្បីរៀបចំការបោះឆ្នោតជាថ្មីជ្រើសរើសលោកមើស ឬបេក្ខជនផ្សេង។ មិនទាន់បានអីផង គណបក្សស្ដាំនិយមជ្រុលស្នើសុំឱ្យរៀបចំការបោះឆ្នោតជ្រើសរើសអ្នកតំណាងរាស្ត្រឡើងវិញ។
យោងតាមរដ្ឋធម្មនុញ្ញអាល្លឺម៉ង់ បេក្ខជនអធិការបតីអាចបោះឆ្នោតប៉ុន្មានដងក៏បានដែរ។ ប៉ុន្តែបើក្នុងរង្វង់១៤ថ្ងៃគ្មានបេក្ខជនណាទទួលបានសំឡេងគ្រប់គ្រាន់ទេ បេក្ខជនអធិការបតីគ្មានជម្រើសអ្វីក្រៅពីឡើងកាន់អំណាចដោយសំឡេងភាគតិចនៅក្នុងសភា។ គេមិនរំពឹងថាសភានឹងរៀបចំការបោះឆ្នោតឆាប់ៗនេះទេ។ នៅពេលនេះ គណបក្សនៅក្នុងសម្ព័ន្ធភាពជាមួយគ្នាកំពុងតែមានអារម្មណ៍ច្របូកច្របល់យ៉ាងខ្លាំងនឹងលទ្ធផលឆ្នោតកាលពីល្ងាចមិញ។ នេះបើយោងតាមប្រភពពីរ៉យទ័រ ប៊ីប៊ីស៊ី និងប្រភពដទៃទៀត៕
ចែករំលែកព័តមាននេះ