ទីក្រុងអ៊ីស្លាម៉ាបាដ ៖ នាយករដ្ឋមន្ត្រីប៉ាគីស្ថាន លោក Shehbaz Sharif បានសរសើរកងកម្លាំងទ័ពអាកាស បន្ទាប់ពីមានការអះអាងពីប្រភពយោធាថា ខ្លួនបានបាញ់ទម្លាក់យន្តហោះចម្បាំងឥណ្ឌា ចំនួន០៥គ្រឿង…
ទីក្រុងអ៊ីស្លាម៉ាបាដ ៖ នាយករដ្ឋមន្ត្រីប៉ាគីស្ថាន លោក Shehbaz Sharif បានសរសើរកងកម្លាំងទ័ពអាកាស បន្ទាប់ពីមានការអះអាងពីប្រភពយោធាថា ខ្លួនបានបាញ់ទម្លាក់យន្តហោះចម្បាំងឥណ្ឌា ចំនួន០៥គ្រឿង នេះបើយោងតាមការចុះផ្សាយរបស់ CNN នៅយប់ថ្ងៃពុធ ទី៧ ខែឧសភា ឆ្នាំ២០២៥ ។
លោក Sharif បានសរសើរការត្រៀមខ្លួនរបស់យោធាប៉ាគីស្ថាន “ដើម្បីកម្ទេចយន្តហោះរបស់សត្រូវ” ។ ការសរសើរបែបនេះ ខណៈដែលលោកបានថ្លែងទៅកាន់សភា ក្នុងរដ្ឋធានីអ៊ីស្លាម៉ាបាដ ជាលើកដំបូង ចាប់តាំងពីមានការវាយប្រហាររបស់ប្រទេសឥណ្ឌា នៅព្រឹកថ្ងៃពុធនេះ ម៉ោងក្នុងស្រុក ។
លោកនាយករដ្ឋមន្ត្រី ក៏បានប្រាប់សមាជិកសភា បន្តថា ឥណ្ឌាបានប្រើប្រាស់យន្តហោះចម្បាំងរាប់សិបគ្រឿង ក្នុងការវាយប្រហាររបស់ខ្លួន។ ការវាយប្រហាររបស់ប្រទេសឥណ្ឌា បានសម្លា.ប់មនុស្សយ៉ាងហោចណាស់ ២៦នាក់ ក្នុងនោះមានក្មេងស្រីអាយុ ៣ឆ្នាំម្នាក់ និងមនុស្សយ៉ាងតិច ៤៦នាក់ផ្សេងទៀតរងរបួស ។
លោក Sharif មិនបានបញ្ជាក់លម្អិតអំពីរបៀប ដែលប៉ាគីស្ថានអាចតបតចំពោះការវាយប្រហាររបស់ប្រទេសឥណ្ឌានោះទេ ប៉ុន្តែលោកបានហៅការវាយប្រហាររបស់ប្រទេសឥណ្ឌា ថាវាជា “ទង្វើនៃសង្គ្រាម” ។
លោក Sharif បានប្រាប់សមាជិកសភា ទៀតថា “កាលពីប៉ុន្មានថ្ងៃមុន ប្រទេសឥណ្ឌា បានបង្ហាញមោទនភាពចំពោះការទិញយន្តហោះ Rafale ។ លោកថា “យន្តហោះទាំងនេះ បានហោះចេញ ក្នុងទម្រង់ប្រយុទ្ធ ប៉ុន្តែកម្លាំងទ័ពអាកាសរបស់យើង(ប៉ាគីស្ថាន) ក៏ត្រូវបានរៀបចំរួចផងដែរ” ។
សូមជម្រាបថា កាលពីព្រឹកថ្ងៃពុធ ប្រភពយោធាប៉ាគីស្ថាន បាននិយាយថា ពួកគេបានបាញ់ទម្លាក់យន្តហោះចម្បាំងឥណ្ឌា ចំនួន ៥គ្រឿង និងយន្តហោះគ្មានមនុស្សបើកមួយ នៅក្នុងសកម្មភាព នៃការការពារខ្លួន រួមទាំងយន្តហោះ Rafale ចំនួនបី ដែលជាយន្តហោះដ៏ទំនើបផលិតនៅប្រទេសបារាំង ៕
ចែករំលែកព័តមាននេះ