មុនឈានដល់ខួប៨០ឆ្នាំនៃការបញ្ចប់សង្គ្រា.ម លោកលើកទី២ រុស្ស៊ីអះអាងថា មិនឱ្យមានសង្គ្រា.មលោកកើតជាថ្មីទេ!
រាជធានីភ្នំពេញ ៖ លោក អាណាតូលី បូរូវីក (Anatoly BOROVIK) ឯកអគ្គរដ្ឋទូតវិសាមញ្ញ និងពេញសមត្ថភាពនៃសហព័ន្ធរុស្ស៊ីប្រចាំកម្ពុជា បានថ្លែងថា…
រាជធានីភ្នំពេញ ៖ លោក អាណាតូលី បូរូវីក (Anatoly BOROVIK) ឯកអគ្គរដ្ឋទូតវិសាមញ្ញ និងពេញសមត្ថភាពនៃសហព័ន្ធរុស្ស៊ីប្រចាំកម្ពុជា បានថ្លែងថា ប្រទេសរុស្ស៊ីនឹងមិនអនុញ្ញាតឱ្យសង្គ្រាមលោកលើកទី២ ដែលបានបញ្ចប់ទៅកាលពី៨០ឆ្នាំមុន កើតឡើងមកវិញម្តងទៀតបានទេ ដោយលោកសង្កត់ធ្ងន់ថា រុស្សីនឹងប្រឹងប្រែងធ្វើអ្វីគ្រប់បែបយ៉ាង ក្នុងការការពារកុំឱ្យសោកនាដកម្មកើតឡើងសារជាថ្មី ដើម្បីធានាសន្តិភាព ស្ថិរភាព និងវិបុលភាពដល់មនុស្សជាតិ ។
ឯកអគ្គរដ្ឋទូតរុស្ស៊ី បានថ្លែងបែបនេះ ប្រាប់អ្នកសារព័ត៌មានកម្ពុជា បន្ទាប់ពីរូបលោក និងភរិយា បានដឹកនាំប្រារព្ធពិធីដើរក្បួនដង្ហែមួយដែលមានឈ្មោះថា «កងវរសេនាធំអមតៈ» ដែលជាពិធីមួយ ដើម្បីបង្ហាញពីការគោរពទៅដល់វិញ្ញាណក្ខន្ធទាហានសូវៀតស្នេហាជាតិ ដែលបានពលីនៅក្នុងកំឡុងសង្គ្រាមលោកលើកទី២ពីឆ្នាំ១៩៤១ ដល់១៩៤៥ មុននឹងឈានដល់ការប្រារព្ធខួប៨០ឆ្នាំ នៃការផ្ដួលរំលំរបបហ្វាស៊ីសហ៊ីត្លែរ ៩ ឧសភា ១៩៤៥-៩ ឧសភា ២០២៥ ដែលឈ្មោះថា«ទិវាជ័យជម្នះនៃមហាសង្គ្រាមស្នេហាជាតិដ៏អស្ចារ្យ» កម្មវិធីដង្ហែក្បួន «កងវរសេនាធំអមតៈ» បានប្រារព្ធធ្វើនាព្រឹកថ្ងៃទី៧ ខែឧសភា ឆ្នាំ២០២៥ នៅក្នុងបរិវេណស្ថានទូតរុស្ស៊ីប្រចាំនៅក្នុងរាជធានីភ្នំពេញ ដោយមានវត្តមានប្រជាជនរុស្ស៊ី ដែលកំពុងរស់នៅក្នុងប្រទេសកម្ពុជា ក៏ដូចជា មន្ត្រីអ្នកមុខអ្នកការរុស្ស៊ីជាច្រើនរូបមកជួបជុំគ្នា គោរពវិញ្ញាណក្ខន្ធ និងចូលរួមដើរក្បួនដង្ហែ ដោយកាន់ថតរូបភាពរបស់ឪពុកម្តាយ ជីដូនជីតា និងវីរបុរសរុស្ស៊ីគេ ដើម្បីបង្ហាញពីការឧទិស្ទដឹងគុណ និងរំលឹកដល់ស្នាដៃមិនអាចកាត់ថ្លៃបានរបស់បុព្វបុរស ដែលនាំមកនូវជ័យជម្នះដ៏អស្ចារ្យ ក្នុងការបញ្ចប់សង្គ្រាមបង្ហូរឈាមជួយសង្គ្រោះពិភពលោក ដោយនាំមកនូវសេរីភាព និងសន្តិភាព ។
សូមជម្រាបថា ក្បួងដង្ហែរ«កងវរសេនាធំអមតៈ» ត្រូវបានផ្តួចផ្តើមធ្វើឡើងជាលើកដំបូង កាលពីឆ្នាំ២០១២ នៅទីក្រុង Tomsk ហើយរយៈពេល១៣ឆ្នាំមកនេះ ពិធីជាប្រពៃណីមួយនេះ ត្រូវបានរៀបចំធ្វើទូទាំងប្រទេសរុស្ស៊ី និងមានការចូលរួមពីប្រជាជនរុស្ស៊ីកាន់តែច្រើនឡើងៗពីមួយឆ្នាំទៅមួយឆ្នាំ ។
លោក អាណាតូលី បានបន្ថែមថា នៅថ្ងៃទី៩ ខែឧសភា យើងនឹងប្រារព្ធខួបលើកទី៨០ នៃទិវាជ័យជម្នះនៃមហាសង្គ្រាមស្នេហាជាតិដ៏អស្ចារ្យ ដែលត្រូវបានគេចាត់ទុកថា ពិធីបុណ្យជាតិដ៏មានសារៈសំខាន់មួយសម្រាប់ប្រជាជនរុស្ស៊ីគ្រប់ៗរូប ។ លោក អាណាតូលី បានរំលឹកថា សហភាពសូវៀតបានលះបង់ធំធេងណាស់ សម្រាប់ជ័យជម្នះ កាលពី៨០ឆ្នាំមុន ដែលបណ្តាលឱ្យពលរដ្ឋសូវៀតជាង២៦លាន៦សែននាក់ បានបាត់បង់ជីវិត ទីក្រុង និងហេដ្ឋារចនាសម្ព័ន្ធនានា ត្រូវបានបំផ្លាញស្ទើរគ្មានសល់ ។
លោកបន្តថា សង្គ្រាមលោកពោរពេញទៅ ដោយការឈ្លានពាន កា.ប់សម្លា.ប់ និងអំពើប្រល័យពូជសាសន៍ នៅតែបន្តលងបន្លាចដល់មនុស្សជាច្រើនជំនាន់ ។ លោក អាណាតូលី ក៏បានបង្ហាញការសោកស្ដាយដែលសម្ព័ន្ធមិត្តរបស់រុស្ស៊ីដែលធ្លាប់ប្រកៀកស្មាគ្នាក្នុងសង្គ្រាមលោកលើកទី២ ប្រយុទ្ធជាមួយពួកណាស៊ីស បែរជាបច្ចុប្បន្នព្យាយាមលុបបំបាត់ការពិតនៃប្រវត្តិសាស្ត្រ ដោយការបំភ្លេចគុណរបស់ទាហានសូវៀត ដែលនាំមកនូវសេរីភាព និងរំដោះអឺរ៉ុបចេញពីគ្រោះកាច ហើយពួកគេមិនត្រឹមតែមិនដឹងគុណទេ តែពួកគេថែមទាំងគាំទ្រទីក្រុងគៀវទៅវិញ ។
ឯកអគ្គរដ្ឋទូតរុស្ស៊ី សង្កត់ធ្ងន់ថា ការពលីរបស់បុព្វបុរសសូវៀត ទាំងជាង២៦លាននាក់ គឺបានជួយរំដោះអឺរ៉ុបចេញពីរបបណាស៊ី ដូចនេះយើងគ្រប់គ្នា គួរតែចងចាំថា សន្ដិភាពដែលយើងមាន៨០មកនេះបានមកពីការពលីសាច់ស្រស់ឈា.មស្រស់របស់វីរបុរសសូវៀត ។
លោក អាណាតូលី បូរូវីក ឯកអគ្គរដ្ឋទូតសហព័ន្ធរុស្ស៊ីប្រចាំកម្ពុជា បានផ្ញើសារជាចុងក្រោយយ៉ាងដូច្នេះថា «យើងមិនអនុញ្ញាតឱ្យសង្គ្រាមដែលបានបញ្ចប់កាលពី៨០ឆ្នាំមុនកើតឡើងម្តងទៀតនោះទេ ។ រុស្សីប្រឹងប្រែងបង្កើតប្រព័ន្ធសន្តិសុខ ដែលមិនអាចបំបែកបានសម្រាប់រដ្ឋទាំងអស់ ដើម្បីការពារកុំឱ្យសោកនាដកម្មដ៏គួរឱ្យភ័យខ្លាចកើតឡើងសារជាថ្មី ដើម្បីធានា សន្តិភាព ស្ថិរភាព និងវិបុលភាពដល់មនុស្សជាតិ ៕
ចែករំលែកព័តមាននេះ