ទីក្រុងម៉ូស្គូ៖ វិមានក្រឹមឡាំងចាត់ទុកថាការហែបាតុកម្មប្រឆាំងរដ្ឋាភិបាលនៅប្រទេសស៊ែប៊ីអាចជាបដិវត្តពណ៌។ រុស្ស៊ីមិនទាន់សន្និដ្ឋាន១០០%ទេ ប៉ុន្តែទង្វើនោះអាចចាត់ចូលទៅក្នុងទម្រង់ហ្នឹងហើយ។ ស៊ែប៊ីជាសម្ព័ន្ធមិត្តរបស់រុស្ស៊ី។ រុស្ស៊ីនៅតែមានជំនឿថាថ្នាក់ដឹកនាំស៊ែប៊ីអាចស្ដារស្ថានការណ៍ និងវិលទៅរកភាពស្ងប់ស្ងាត់ឡើងវិញ។
កាលពីថ្ងៃសៅរ៍ នគរបាលស៊ែប៊ីប៉ះទង្គិចគ្នាដោយអំពើហិង្សាជាមួយក្រុមបាតុករប្រឆាំងរដ្ឋាភិបាល។ ពួកបាតុករទាំងនេះទាមទារឱ្យរៀបចំការបោះឆ្នោតឡើងវិញមុនអាណត្តិ និងបិទបញ្ចប់ការកាន់អំណាចរយៈពេល១២ឆ្នាំរបស់ប្រធានាធិបតីអាឡិចសាន់ដឺ វូស៊ីក (Aleksandar Vucic)។ អ្នកនាំពាក្យវិមានក្រឹមឡាំង លោកប៉េស្កូស ថ្លែងថាយើងមិនអាចបដិសេធបានឡើយនៅក្នុងបញ្ហានេះ។ ក្រុមប្រឆាំងអាចនឹងប្រើប្រាស់បដិវត្តពណ៌។
លោកថ្លែងបន្ថែមទៀតថាយើងគ្មានអ្វីត្រូវសង្ស័យថាថ្នាក់ដឹកនាំស៊ែប៊ីបច្ចុប្បន្នអាចស្ដារនីតិរដ្ឋ និងសណ្ដាប់ធ្នាប់សាធារណៈឡើងវិញនៅពេលឆាប់ៗនេះ។ រុស្ស៊ីតែងតែចាត់ទុកលោកវូស៊ីកជាសម្ព័ន្ធមិត្តជិតស្និទ្ធរបស់ខ្លួន។ ប្រធានាធិបតីរូបនេះក៏ទើបតែចូលរួមទិវាជ័យជម្នះនៅទីក្រុងម៉ូស្គូកាលពីថ្ងៃទី៩ ខែឧសភាដើម្បីរំលឹកអំពីការវាយឈ្នះកងទ័ពអាល្លឺម៉ង់នៅក្នុងសង្គ្រាមលោកលើកទី២។
ចលនាបាតុកម្មដ៏ពុះកញ្ជ្រោលរយៈពេលជាច្រើនខែចុងក្រោយនេះនៅទូទាំងប្រទេសស៊ែប៊ី (រហូតដល់ថ្នាក់ពេលខ្លះបិទសាកលវិទ្យាល័យ) ធ្វើឱ្យលោកវូស៊ីកអង្គុយកៅអីប្រធានាធិបតីមិនស្រណុកខ្លួនប៉ុន្មានឡើយ។ លោកជាអ្នកនយោបាយប្រជានិយមដែលត្រូវកាន់អំណាចរហូតដល់ឆ្នាំ២០២៧ទើបចប់អាណត្តិ។ ទន្ទឹមនឹងនោះ ប្រទេសស៊ែប៊ីក៏ត្រៀមរៀបចំការបោះឆ្នោតសភាផងដែរ។
លោកវូស៊ីកថ្លែងថាប្រទេសរដ្ឋមហាអំណាចបរទេសខ្លះដែលលោកមិនបញ្ចេញឈ្មោះទេជាអ្នកនៅពីក្រោយចលនាបាតុកម្មកាលពីថ្ងៃសៅរ៍។ ពួកគេប៉ុនប៉ងផ្ដួលរំលំរដ្ឋាភិបាលស៊ែប៊ី។ ប៉ុន្តែត្រូវបរាជ័យ៕
ចែករំលែកព័តមាននេះ