ខេត្តប៉ៃលិន ៖ រហូតមកដល់ពេលនេះ ទោះបីជាគេសង្កេតឃើញនៅតាមច្រកទ្វារអន្តរជាតិព្រំ ស្ថិតក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ត្រូវបានបិទទ្វារអស់រយៈពេលយូរថ្ងៃកន្លងមក មិនអនុញ្ញាតឱ្យនាំចូលនូវបន្លែ…
ខេត្តប៉ៃលិន ៖ រហូតមកដល់ពេលនេះ ទោះបីជាគេសង្កេតឃើញនៅតាមច្រកទ្វារអន្តរជាតិព្រំ ស្ថិតក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ត្រូវបានបិទទ្វារអស់រយៈពេលយូរថ្ងៃកន្លងមក មិនអនុញ្ញាតឱ្យនាំចូលនូវបន្លែ និងទំនិញផ្សេងៗយ៉ាងណាក្តី ក៏ប្រជាពលរដ្ឋនៅក្នុងតំបន់ បាននាំគ្នាងាកមកគាំទ្រកសិផលក្នុងស្រុកវិញ ហើយក៏សុំឱ្យឈប់នាំចូលនូវបន្លែផ្លែឈើពីក្រៅប្រទេសបន្តទៀតដែរ គឺដើម្បីជួយលើកកម្ពស់តម្លៃទីផ្សារកសិផលខ្មែរ ហើយជួយកាត់បន្ថយការចំណាកស្រុកទៅធ្វើការក្រៅប្រទេស ព្រោះពួកគាត់អាចនាំគ្នាធ្វើកសិកម្មដាំដុះដំណាំផ្សេងៗដើម្បីលក់ដូរ ។
បើតាមទិដ្ឋភាពជាក់ស្តែងនៅថ្ងៃទី៣០ ខែមិថុនា ឆ្នាំ២០២៥នេះ នៅក្នុងផ្សារព្រំថ្មី ជាផ្សារដែលនៅជាប់នឹងព្រំដែនកម្ពុជាថៃ ស្ថិតនៅក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន មានសភាពអ៊ូរអរដូចធម្មតា ដោយសំបូរបងប្អូនប្រជាពលរដ្ឋចេញចូលទិញបន្លែផ្លែឈើ ដោយមិនខ្វល់ពីការបិទច្រកទ្វារអ្វីនោះឡើយ ដោយពួកគាត់ម្នាក់ៗ បានងាកមកគាំទ្រ និងជឿជាក់ទៅលើរដ្ឋាភិបាល ហើយបន្លែផ្លែឈើក៍មិនបានយកមកពីប្រទេសថៃដែរ ភាគច្រើនគឺជាបន្លែផ្លែឈើដែលប្រមូលផលនៅក្នុងស្រុកទាំងអស់តែម្តង ។
បើតាមការរៀបរាប់ពីលោក មាស វុធ ប្រធានគណៈកម្មការផ្សារសាមគ្គីប៉ៃលិន បានឱ្យដឹងថា ផ្សាររបស់លោកលក់ដូរតាមតម្លៃធម្មតា ពោលគឺមិនមានការឡើងថ្លៃខ្ពស់អ្វីនោះទេ គឺតម្លៃដូចមិនទាន់បិទច្រកទ្វារព្រំដែនអញ្ចឹងដែរ ។
លោកប្រធានគណៈកម្មការផ្សារ បានបន្តទៀតថា ក្រោមការណែនាំពីលោកជំទាវ បាន ស្រីមុំ អភិបាលខេត្តប៉ៃលិន និងលោក លី សុងហ៊ី អភិបាលក្រុងប៉ៃលិន ឱ្យខាងលោកដឹកនាំក្រុមការងារចុះណែនាំ និងពន្យល់ដល់អាជីវករ ពីសភាពការណ៍ផ្សេងៗ និងពីតម្លៃការលក់ដូរជូនបងប្អូនប្រជាពលរដ្ឋ ដោយមិនត្រូវតម្លើងថ្លៃហួសពីមុនឡើយ ត្រូវតែលក់ដូរក្នុងតម្លៃសមរម្យ ទោះបីជាគ្មានការនាំចូលបន្លែផ្លែឈើពីប្រទេសថៃក៏ដោយ ។
លោកក៍សូមអំពាវនាវឱ្យបងប្អូនប្រជាពលរដ្ឋ ដែលរស់នៅក្នុងខេត្តប៉ៃលិនទាំងអស់ នាំគ្នាដាំដុះបន្លែផ្លែឈើគ្រប់ប្រភេទ ឱ្យបានកាន់តែច្រើន ដើម្បីផ្គត់ផ្គង់តម្រូវការទីផ្សារនេះ ព្រោះឥឡូវពលរដ្ឋយើងបានងាកមកគាំទ្រកសិផលក្នុងស្រុកយ៉ាងខ្លាំង ព្រោះជាផលិតផលដែលប្រកបដោយធម្មជាតិ មិនសូវមានសារធាតុគីមីច្រើននោះឡើយ ៕
ចែករំលែកព័តមាននេះ