រាជធានីភ្នំពេញ ៖ រដ្ឋបាលខណ្ឌពោធិ៍សែនជ័យ និងរដ្ឋបាលសង្កាត់ចោមចៅទី៣ ដោយមានការចូលរួមពីកម្លាំងនគរបាលខណ្ឌ និងប៉ុស្តិ៍ផង បានចុះទៅធ្វើការត្រួតពិនិត្យទីតាំង«អាជីវកម្មកម្សាន្តGY9» ខណៈនោះបានរកឃើញថា ទីតាំងនោះគ្មានច្បាប់អនុញ្ញាតត្រឹមត្រូវឡើយ បន្ទាប់មកអាជ្ញាធរ…
រាជធានីភ្នំពេញ ៖ រដ្ឋបាលខណ្ឌពោធិ៍សែនជ័យ និងរដ្ឋបាលសង្កាត់ចោមចៅទី៣ ដោយមានការចូលរួមពីកម្លាំងនគរបាលខណ្ឌ និងប៉ុស្តិ៍ផង បានចុះទៅធ្វើការត្រួតពិនិត្យទីតាំង«អាជីវកម្មកម្សាន្តGY9» ខណៈនោះបានរកឃើញថា ទីតាំងនោះគ្មានច្បាប់អនុញ្ញាតត្រឹមត្រូវឡើយ បន្ទាប់មកអាជ្ញាធរ ក៏បានសម្រេចផ្អាកជាបណ្ដោះអាសន្នរង់ចាំឲ្យម្ចាស់សុំច្បាប់អនុញ្ញាតត្រឹមត្រូវជាមុនសិន ទើបឲ្យដំណើរការបន្ត ។
ទីតាំងអាជីវកម្មកម្សាន្តGY9 នេះស្ថិតនៅផ្ទះលេខ៩ ផ្លូវលេខ១១៣K ភូមិព្រៃទា១ សង្កាត់ចោមចៅទី៣ ខណ្ឌពោធិ៍សែនជ័យ ដែលមានម្ចាស់ឈ្មោះ YU NING ជនជាតិចិន ។ ដោយឡែកកម្លាំងអាជ្ញាធរខាងលើ បានចុះទៅត្រួតពិនិត្យ និងផ្អាកកាលពីវេលាម៉ោង៣និង៣០នាទីរសៀលថ្ងៃទី៣០ ខែមិថុនា ឆ្នាំ២០២៥ ។
អាជ្ញាធរបានប្រាប់ឲ្យដឹងថា ពេលកម្លាំងចុះទៅដល់ទីតាំងនោះ បានពិនិត្យឃើញមានសុទ្ធតែទូហ្គេម នៅក្នុងនោះ មានទូហ្គេមបាញ់ត្រីចំនូន២ទូ និងទូហ្គេមផ្សេងៗ សម្រាប់ឲ្យមនុស្សចាស់ និងក្មេងលេងជាច្រើនទូទៀតផងដែរ ។ ប៉ុន្តែពុំមានច្បាប់អនុញ្ញាតហ្គេមនោះឡើយ ហើយពេលនោះដែរ ហើយស្ត្រីម្នាក់ឈ្មោះ ម៉េង សេងហ៊ី តំណាងឲ្យម្ចាស់ទីតាំងម្ចាស់ទីតាំងខាងលើ ក៏បានយកវិញ្ញាបនបត្រចំនួន៣ច្បាប់បង្ហាញដល់អាជ្ញាធរ ។
ប្រភពដដែល បានប្រាប់ឲ្យដឹងបន្តទៀតថា ទី១, វិញ្ញាបនបត្រចុះបញ្ជីពន្ធដារ (អាករលើតម្លៃបន្ថែម អតប) ចេញដោយឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកជាអគ្គនាយក នៃអគ្គនាយកដ្ឋានពន្ធដារ ។ ទី២, វិញ្ញាបនបត្រ បញ្ជីកាសហគ្រាសគ្រឹះស្ថានចេញដោយលោក ម៉េង ហុង ប្រតិភូរាជរដ្ឋាភិបាល ទទួលបន្ទុកជាអគ្គនាយកបេឡាជាតិសន្តិសុខសង្គម ។ និងទី៣, វិញ្ញាបនបត្រ បញ្ជាការចុះឈ្មោះក្នុងបញ្ជីពាណិជ្ជកម្ម ក្រសួងពាណិជ្ជកម្ម ចេញដោយអគ្គនាយ ហូ ស៊ីវយ៉ុង ។
ប្រភពខាងលើបានប្រាប់បន្ថែមថា ដោយសារមិនទាន់មានច្បាប់អនុញ្ញាតហ្គេម ហើយហ្គេមសម្រាប់ក្មេងៗ ចូលលេងទៀតនោះ ទើបកម្លាំងសមត្ថកិច្ចខាងលើ សម្រចផ្អាកឲ្យម្ចាស់ទីតាំងនេះសុំច្បាប់ឲ្យបានត្រឹមត្រូវជាមុនសិន។ មិនតែប៉ុណ្ណោះ ក៏បានដាក់វិធានការ៣ចំណុចឲ្យម្ចាស់ទីតាំងអនុវត្តផងដែរ ទី១, ត្រូវស្នើរសុំច្បាប់អនុញ្ញាតប្រកបអាជីវកម្មឲ្យបានត្រឹមត្រូវ ទី២, ហាមមិនអនុញ្ញាតឲ្យក្មេងចូលលេងល្បែងហ្គេមនោះទេ និងទី៣, ម្ចាស់ត្រូវផ្អាកអាជីវកម្មជាបណ្ដោះអាសន្នសិន។ ខណៈនោះ ដែលកម្លាំងអាជ្ញាធរខាងលើមិនបានដកហូតយកសម្ភារៈពីទីនោះទេ ហើយក្រោយពីធ្វើកំណត់ហេតុចប់សព្វគ្រប់ អាជ្ញាធរក៏បានអានកំណត់ហេតុឲ្យស្ត្រីឈ្មោះម៉េង សេងហ៊ី ដែលជាតំណាងឲ្យម្ចាស់ទីតាំងជនជាតិចិននោះស្ដាប់ និងអនុវត្តតាម ៕
ចែករំលែកព័តមាននេះ