ទីក្រុងបាងកក៖ ប្រមុខការពារជាតិថៃ លោកភូមថាម វិឆាយ៉ាឆៃ (Phumtham Wechayachai) ចេញមកបញ្ជាក់ថាគ្មានអំពើរដ្ឋប្រហារយោធាដើម្បីផ្ដួលរំលំលោកស្រីផែថងថានពីតំណែងទេ។ បើសិនជាមានចលនានេះមែន មានន័យថាគ្រួសារត្រកូលស៊ីណាវ៉ាត់ដែលកាន់តំណែងនាយករដ្ឋមន្ត្រីចាប់តាំងពីឪពុកតទៅម្ដាយមីង និងធ្លាក់មកកូនស្រីនឹងត្រូវគេផ្ដួលរំលំដោយរដ្ឋប្រហារចំនួនបីដង។…
ទីក្រុងបាងកក៖ ប្រមុខការពារជាតិថៃ លោកភូមថាម វិឆាយ៉ាឆៃ (Phumtham Wechayachai) ចេញមកបញ្ជាក់ថាគ្មានអំពើរដ្ឋប្រហារយោធាដើម្បីផ្ដួលរំលំលោកស្រីផែថងថានពីតំណែងទេ។ បើសិនជាមានចលនានេះមែន មានន័យថាគ្រួសារត្រកូលស៊ីណាវ៉ាត់ដែលកាន់តំណែងនាយករដ្ឋមន្ត្រីចាប់តាំងពីឪពុកតទៅម្ដាយមីង និងធ្លាក់មកកូនស្រីនឹងត្រូវគេផ្ដួលរំលំដោយរដ្ឋប្រហារចំនួនបីដង។
ទោះជាយ៉ាងណាក្ដី រដ្ឋមន្ត្រីការពារជាតិថៃ លោកភូមថាមយល់ថាមេបញ្ជាការកំពូលៗនៅក្នុងជួរកងទ័ពប្ដេជ្ញាគាំទ្រការកាន់អំណាចតាមគន្លងប្រជាធិបតេយ្យ។ ការថ្លែងដូច្នេះនៅពេលមានចលនាបាតុកម្មដ៏ពុះកញ្ជ្រោលទាមទារឱ្យលោកស្រីផែថងថានចុះពីតំណែង។ បញ្ហានេះមើលស្រាលមិនបានទេ បើលោកស្រីផែថងថានធ្វើព្រងើយៗអាចនឹងមានរដ្ឋប្រហារកើតឡើងមែន។
លោកភូមថាមអះអាងថាទាហានលែងមានអារម្មណ៍ចង់ធ្វើរដ្ឋប្រហារដើម្បីឡើងកាន់អំណាចខ្លួនឯងដូចកាលពីមុនទៀតហើយ។ ដូច្នេះលោកយល់ថាទោះបីមានការប្រើភាសាអុជអាល ឬពន្យុះពីសំណាក់ក្រុមប្រឆាំងនឹងរដ្ឋាភិបាលឱ្យយោធាធ្វើទង្វើនេះយ៉ាងណាក្ដី ក៏ពួកគេមិនធ្វើតាមដែរ។ បន្ទាប់ពីមេចលនាបាតុកម្មព្រលយពាក្យថាយោធាអាចនឹងធ្វើអន្តរាគមន៍ លោកភូមថាមបញ្ជាក់ថាកងទ័ពប្ដេជ្ញាជួយជ្រោមជ្រែងប្រទេសជាតិដែលកំពុងពុះពារឧបសគ្គតាមបែបប្រជាធិបតេយ្យ។
ការថ្លែងសារនយោបាយរបស់រដ្ឋមន្ត្រីការពារជាតិរូបនេះនៅពេលមានចលនាតវ៉ាកាន់តែច្រើនឡើងៗទាមទារឱ្យលោកស្រីផែថងថានចុះពីតំណែង។ គណបក្សខ្លះដូចជាគណបក្សប្រជាជនទោះបីមិនគាំទ្ររដ្ឋប្រហារ ប៉ុន្តែពួកគេក៏ទាមទារឱ្យលោកស្រីរំលាយសភា និងរៀបចំការបោះឆ្នោតជាថ្មី។ ចំណែកចលនាដែលមានឈ្មោះថា «រួមកម្លាំងការពារអធិបតេយ្យ»មិនដល់ថ្នាក់អំពាវនាវឱ្យយោធាធ្វើរដ្ឋប្រហារដោយត្រង់ៗ ប៉ុន្តែពួកគេជំរុញឱ្យយោធាធ្វើអន្តរាគមន៍នៅក្នុងវិបត្តិនយោបាយនេះ។
បន្ទាប់ពីមេចលនាអាវលឿង លោកសុន្ធិ លីមថងគុល (Sondhi Limthongkul) វិលមករកទីលាននយោបាយសាជាថ្មីដើម្បី ដឹកនាំចលនាបាតុកម្មទម្លាក់នាយករដ្ឋមន្ត្រីពីតំណែង លោកភូមថាមមិនចាប់អារម្មណ៍នឹងបញ្ហានេះទេ។ លោកថ្លែងថាលោកសុន្ធិមិនទាន់ជ្រះស្រឡះពីរឿងក្ដីនៅតុលាការទេ។ គាត់មិនគួរសង្ឃឹមថាធ្វើឱ្យស្រុកទេសផ្លាស់ប្ដូរនយោបាយដើម្បីរួចចាកផុតពីទោសពៃរ៍នោះឡើយ។ កិច្ចនីតិវិធីទៅលើសំណុំរឿងរបស់គាត់ (សុន្ធិ) បានចាប់ផ្ដើមជាបណ្ដើរៗហើយ។
ថ្មីៗនេះ លទ្ធផលស្ទង់មតិបង្ហាញថាប្រជាប្រិយភាពរបស់លោកស្រីផែថងថានធ្លាក់ចុះដល់កម្រិតទាបបំផុត។ ពោលគឺទាបជាងលោកអនុទីនដែលធ្លាប់ជាឧបនាយករដ្ឋមន្ត្រី និងរដ្ឋមន្ត្រីមហាផ្ទៃដែលបានដកខ្លួនថយថ្មីៗនេះ។ លទ្ធផលបង្ហាញថាលោកស្រីផែថងថានមានអ្នកគាំទ្រត្រឹមតែជាង៩%ប៉ុណ្ណោះ។ ឆ្លើយតបនឹងបញ្ហានេះ លោកភូមថាមយល់ថាសំឡេងគាំទ្រវាបត់បែនចុះឡើងៗតែបែបហ្នឹងឯង។ វាជារឿងធម្មតាទេនៅក្នុងនយោបាយ៕
ចែករំលែកព័តមាននេះ