រដ្ឋមន្ត្រីក្រសួងការងារ ចុះពិនិត្យច្រកទ្វារអន្តរជាតិព្រំ ណែនាំពលករឱ្យបង្វែរមកធ្វើការនៅកម្ពុជាវិញ
ខេត្តប៉ៃលិន ៖ នៅព្រឹកថ្ងៃទី៣០ ខែមិថុនា ឆ្នាំ២០២៥ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ…
ខេត្តប៉ៃលិន ៖ នៅព្រឹកថ្ងៃទី៣០ ខែមិថុនា ឆ្នាំ២០២៥ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានដឹកនាំក្រុមការងារ ចុះទៅពិនិត្យមើលស្ថានភាពទូទៅ នៅច្រកទ្វារអន្តរជាតិព្រំ ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ជាប់នឹងច្រកទ្វារព្រំដែនបានផាកាត ស្រុកពោណាមរ៉ន ខេត្តចាន់ថាក់បុរី ប្រទេសថៃ ។
ប្រភពព័ត៌មានបានឱ្យដឹងថា គោលបំណងសំខាន់ នៃការចុះពិនិត្យនេះ គឺដើម្បីស្វែងយល់ដោយផ្ទាល់ពីស្ថានភាព ដែលពលករខ្មែរ ចេញ-ចូល ក្នុងប្រទេសថៃ ក៏ដូចជាការផ្តល់ការណែនាំ និងស្តាប់បញ្ហាប្រឈមនានា ដែលពលករកំពុងជួបប្រទះ ដោយធ្វើការណែនាំឱ្យបងប្អូនដែលកំពុងត្រឡប់មកខ្មែរវិញ ទទួលបានការងារថ្មីនៅតាមបណ្តាខេត្តរៀងៗខ្លួន ។
បើតាមការលើកឡើងរបស់ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ដែលបានជួបសំណេះសំណាលផ្ទាល់ ជាមួយពលករខ្មែរជាច្រើនរូប បានឱ្យដឹងថា នៅពេលនេះ ឯកឧត្តម និងក្រុមការងារសូមពន្យល់ណែនាំ ដល់ពលករឲ្យស្វែងរកការងារធ្វើក្នុងស្រុកវិញ ជាពិសេសក្នុងវិស័យឧស្សាហកម្ម សំណង់ និងកសិកម្ម ដែលកំពុងត្រូវការកម្លាំងពលកម្មជាច្រើននាក់ ។
ឯកឧត្តមរដ្ឋមន្ត្រី ក៏បានពន្យល់ណែនាំ យ៉ាងលម្អិតអំពីគោលនយោបាយរបស់រាជរដ្ឋាភិបាលកម្ពុជា ក្នុងការជំរុញឱ្យពលរដ្ឋស្វែងរកការងារធ្វើនៅក្នុងប្រទេស។ ជាមួយគ្នានេះ ឯកឧត្តមរដ្ឋមន្ត្រី ក៏បានសង្កត់ធ្ងន់ដែរថា ការធ្វើការងារក្នុងប្រទេសមានអត្ថប្រយោជន៍ជាច្រើនដូចជា ទៅចេញទៅឆ្ងាយពីក្រុមគ្រួសារ អាចមើលថែទាំក្រុមគ្រួសារ និងប្រពន្ធកូនចៅបានដោយជាប់លាប់ ហើយអាចសន្សំសំចៃការចំណាយថវិកា កាត់បន្ថយការចំណាយច្រើន លើការធ្វើដំណើរ ថ្លៃលិខិតឆ្លងដែន និងត្រូវទិញរបស់របរថ្លៃៗ នៅឯបរទេស ។
ម្យ៉ាងវិញទៀត ការងារនៅក្នុងស្រុកទទួលបានការការពារសុវត្ថិភាព ស្ថិតក្រោមការការពារផ្នែកច្បាប់ និងសិទ្ធិការងារពេញលេញ របស់កម្ពុជាផងដែរ។ ក្រៅពីនេះ ឯកឧត្តមក៏បានណែនាំពលករ ឱ្យពិចារណាលើវគ្គបណ្តុះបណ្តាលជំនាញវិជ្ជាជីវៈ ដែលក្រសួងកំពុងផ្តល់ជូនដោយឥតគិតថ្លៃ ដើម្បីបង្កើនសមត្ថភាព និងទទួលបានការងារសមរម្យ ដែលមានប្រាក់ឈ្នួលខ្ពស់មធ្យមនៅក្នុងប្រទេស ។
ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ថែមទាំងបានណែនាំ ឱ្យពលករទាំងអស់បង្កើនការប្រុងប្រយ័ត្នខ្ពស់ ក្នុងការថែរក្សាសុខភាពផ្ទាល់ខ្លួន ជាពិសេសនៅពេលធ្វើការងារ ក្នុងបរិយាកាសផ្សេងៗ ដោយរាជរដ្ឋាភិបាល តែងតែយកចិត្តទុកដាក់ ចំពោះសុខុមាលភាព និងសុវត្ថិភាព ដល់ពួកគាត់គ្រប់ៗរូប មិនថាកំពុងធ្វើការនៅទីណានោះទេ។
សូមបញ្ជាក់ផងដែរថា ដំណើរចុះពិនិត្យនេះ បានបង្ហាញពីការយកចិត្តទុកដាក់របស់រាជរដ្ឋាភិបាល និងក្រសួងការងារ និងបណ្តុះបណ្តាលវិជ្ជាជីវៈ ចំពោះសុខទុក្ខ របស់ប្រជាពលករ ដែលបាននិងកំពុងរួមចំណែកអភិវឌ្ឍន៍សេដ្ឋកិច្ចជាតិ ថែមទៀតផងដែរ។ ពួកគាត់ក៏នាំគ្នាថ្លែងអំណរគុណដល់រដ្ឋមន្ត្រីក្រសួងការងារ និងរាជរដ្ឋាភិបាលកម្ពុជា ដែលបានយកចិត្តទុកដាក់ចំពោះពួកគាត់ ទោះបីជាខាងថៃគេដេញលែងឱ្យស្នាក់នៅធ្វើការងារនៅប្រទេសគេទៀត ក៏នៅខាងខ្មែរ មានការងារធ្វើសម្រាប់ផ្គត់ផ្គង់ជីវភាពផងដែរ ៕
ចែករំលែកព័តមាននេះ