រាជធានីភ្នំពេញ ៖ ក្រុមអ្នកកាសែតបានទទួលរងនូវការដៀលត្មេះយ៉ាងចាស់ដៃពីសំណាក់បុរសចំណាស់ដែលជាអ្នកបើកបររថយន្តម្នាក់រួមជាមួយតារាចម្រៀងម្នាក់គឺលោក មាស សារិទ្ធ ដែលជាកូនប្រុសរបស់តារាចម្រៀង មាស សារ៉ាន់ ។
ខណៈដែលក្រុមអ្នកកាសែតខាងលើទៅថតរូបយកព័ត៌មាននូវឧប្បត្តិហេតុដែលបុរសចំណាស់ម្នាក់នោះបើកបរបោះពួយរថយន្តម៉ាក LEXUS GX-470 មួយគ្រឿងជ្រុលធ្លាក់ចូលទៅក្នុងប្រឡាយទឹកទាំងព្រឹក ។ ដោយខឹងអ្នកកាសែតចុះទៅថតរូបយកព័ត៌មានស្រាប់តែអ្នកបើកបររថយន្ត និងលោក មាស សារិទ្ធ ដែលស្ថិតក្នុងសម្លៀកបំពាក់ខោជើងខ្លី អាវយឺតពណ៍ក្រហម ស្បែកជើងផ្ទាត់ពាក់មួកយោធា ដៀលអ្នកកាសែតសុទ្ធតែជាពួកអាបង្ហិន(អាបំផ្លាញ)ទៅវិញ ។
ឧប្បត្តិហេតុរថយន្តធ្លាក់ទឹកនោះបានកើតឡើងកាលពីវេលាម៉ោងប្រហែល៥និង១០នាទីព្រឹកថ្ងៃទី១៣ ខែមិថុនា ឆ្នាំ២០១៨ នៅតាមផ្លូវបេតុង ខាងកើតវត្តពោធិ៍វ័ន ស្ថិតនៅក្នុងភូមិត្រពាំងអញ្ចាញ សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ។ រថយន្តម៉ាក LEXUS GX-470 មួយគ្រឿងខាងលើនោះ ពណ៍កាកអំពៅ ពាក់ស្លាកលេខ ភ្នំពេញ 2AJ-2902 បើកបរដោយបុរសចំណាស់មិនស្គាល់អត្តសញ្ញាណម្នាក់ មានអាយុប្រហែលជាង៦០ឆ្នាំ ។ ចំណែកតារាចម្រៀង មាស សារិទ្ធ ដែលជាកូនប្រុស តារាចម្រៀង មាស សារ៉ាន់ ស្ថិតក្នុងសម្លៀកបំពាក់ខោជើងខ្លី អាវយឺតពណ៍ក្រហម ស្បែកជើងផ្ទាត់ពាក់មួកយោធា មិនដឹងថា ត្រូវជាអ្វីជាមួយអ្នកបើកបររថយន្តនេះទេ បានស្ថិតនៅកន្លែងកើតហេតុនោះដែរ និងបញ្ចេញអាកប្បកិរិយា និងសម្ដីសម្ដៅមិនសមរម្យបញ្ចេញកំហឹងមកលើអ្នកកាសែតខ្លាំងជាងអ្នកបើកបររថយន្តទៅទៀត ។
ប្រជាពលរដ្ឋបានឲ្យដឹងថា នៅមុនពេលកើតហេតុបុរសចំណាស់ម្នាក់នោះបានបើកបររថយន្តធ្វើដំណើរតាមផ្លូវបេតុងវត្តពោធិ៍វ័ន ក្នុងទិសដៅពីលិចទៅកើតក្នុងល្បឿនលឿន ។ លុះពេលទៅដល់ត្រង់ចំណុចកើតហេតុខាងលើមិនដឹងថា យ៉ាងមិចស្រាប់តែរេចង្កូតធ្លាក់ផ្លូវចូលទៅក្នុងប្រឡាយទឹកលិចពាក់កណ្ដាលរថយន្តតែម្ដង ។ ប៉ុន្តែសំណាងណាស់ដែលបុរសដែលជាអ្នកបើកបរខាងលើមិនបានរងគ្តោះថ្នាក់នោះឡើយ និងបានបើកទ្វារចេញដោយសុវត្ថិភាព ។ បន្ទាប់មកបានហៅរថយន្តស្ទូចយករថយន្តរបស់ខ្លួនឡើងគោកយកទៅធ្វើការជួសជុលដោយខ្លួនឯង ។
ដោយឡែកក្រុមអ្នកកាសែតក្រោយពីទទួលបានព័ត៌មានថា មានរថយន្តធ្លាក់ទឹកក៏បានចុះទៅថតរូបយកព័ត៌មានត្រូវបុរសអ្នកបើករថយន្តខាងលើដែលកំពុងមួរម៉ៅក្នុងចិត្តរឿងផ្លូវធំប៉ុនណាណីបែរជាបើករថយន្តធ្លាក់ទឹកផងនោះ ក៏បានស្រែកជះកំហឹងដាក់អ្នកកាសែតថា«យីពួកអានេះវ៉ី អញឃាត់វាទៅអត់ស្ដាប់សោះពួកអាបង្ហិន(បំផ្លាញ)អត់គិតជួយគ្នាទេគិតតែពីឡាយ ហើយបែរមកបង្ហិនថែមពួកឯងគឺពួកអាបង្ហិន» មិនតែប៉ុណ្ណោះក្នុងនាមគាត់ជាខ្មែរដែរតែបែរជាដៀលទៀតថា«ខ្មែរវាបែបនឹង» ។
ដោយឡែកលោក មាស សារិទ្ធ ដែលត្រូវបានគេស្គាល់ថា ជាតារាចម្រៀងម្នាក់ និងត្រូវជាកូនប្រុសលោក មាស សារ៉ាន់ ដែលជាតារាចម្រៀងដែរនោះក៏ស្ថិតនៅកន្លែងកើតហេតុនោះដែរ ។ លោក មាស សារិទ្ធ បានចេញមកស្រែកឡូឡាយ៉ាងខ្លាំងបញ្ចេញកំហឹងថែមពីលើអ្នកបើករថយន្តដោយរារាំងមិនឲ្យថតព្រមទាំងប្រើពាក្យថា «ស្អីហ្អា គ្រាន់តែឡានចឹងសោះឯងថតធ្វើអីហ្អា ពួកអាឯងសុទ្ធតែពួកបង្ហិន» ៕
ចែករំលែកព័តមាននេះ