ខេត្តក្រចេះ ៖ «តាឃុតឬពុកៗឡើងមកសម្រាន្តលើផ្ទះ» នេះជាសម្តីរបស់គ្រួសារមួយ ដែលនៅតែនាំគ្នាហៅគោស្ទាវមួយក្បាលឱ្យឡើងទៅដេកលើផ្ទះតាមទម្លាប់ជារៀងរាល់ល្ងាច រយៈពេលជាង២ឆ្នាំមកហើយ ។ ពួកគាត់នៅតែជឿថា គោឈ្មោលមួយក្បាលដែលពួកគាត់គោរពស្រឡាញ់និងមើលថែថ្នាក់ថ្នមរហូតក្រាលកន្ទេលដាក់ពូកដាក់កង្ហារឱ្យដេកនៅលើផ្ទះដូចមនុស្សនេះ គឺជាឪពុកក៏ដូចជាប្តីរបស់គាត់ដែលស្លាប់ទៅ ហើយបានមកចាប់ជាតិកំណើតថ្មីវិញ ជាគោឈ្មោលមួយក្បាលនេះអបិយជំនឿនេះ ត្រូវគេមើលឃើញថា នៅតែដក់ជាប់ក្នុងអារម្មណ៍របស់ពលរដ្ឋខ្មែរគ្រប់ស្រទាប់ បើទោះបីជាបច្ចេកវិទ្យាឬក៏វិទ្យាសាស្ត្រ កំពុងបោះជំហានកាន់តែជឿនលឿនបែបណាក្តី ។
យ៉ាងណាមិញ គ្រួសារមួយនៅគីឡូ៦ក្នុងឧបសម្ព័ន្ធ ភូមិកញ្ជរ ឃុំកញ្ជរ ស្រុកឆ្លូង នៅតែនាំគ្នាប្រតិបត្តិគោរពស្រឡាញ់គោ និងចាត់ទុកគោដូចជាមនុស្សរស់ ។ ទាំងកូនៗនិងម្តាយ បានហៅគោឈ្មោលនេះថា «ពុកៗឬក៏ឪវា» ពេញៗមាត់ ក៏ព្រោះតែគ្រួសារមួយនេះមានជំនឿថា ប្តីរបស់គាត់ក៏ដូចជាឪពូករបស់ពួកគេ ដែលស្លាប់ទៅហើយនោះ បានចាប់ជាតិជាថ្មីជាសត្វគោ ទើបធ្វើឱ្យពួកគាត់នៅតែគោរពស្រឡាញ់ប្រតិបត្តិលើសត្វគោមើលថែដូចកាលនៅរស់ ។
ក្នុងអាយុ៧៤ឆ្នាំ ស្ត្រីឈ្មោះ ឃឹម ហង្ស ដែលត្រូវជាម្តាយ និងជាប្រពន្ធរបស់បុរសឈ្មោះតុល ឃុត អាយុ៧៧ឆ្នាំ ដែលបានទទួលមរណភាពរយៈពេលជាង២ឆ្នាំមកហើយនោះ រៀបរាប់ថា ប្តីរបស់គាត់បានទទួលមរណភាពដោយសារជំងឺ ។ ក្រោយពីមរណភាពបានជាង១ឆ្នាំ ប្តីគាត់ក៏បានចាប់ជាតិថ្មីមកជាគោឈ្មោលមួយក្បាលនេះ ។ ស្ត្រីចំណាស់ជាប្រពន្ធបន្តថា ដើមឡើយគាត់មិនបានដឹងថាប្តីរបស់គាត់ដែលស្លាប់ទៅបានមកចាប់ជាតិមានកំណើតថ្មី ជាមួយមេគោរបស់គាត់នោះទេ ។
គាត់បានរំឭកថា មានថ្ងៃមួយនៅពេលមេគោគាត់កើតកូនឈ្មោល១ក្បាល បានរយៈពេលជាង១០ថ្ងៃ ស្រាប់តែកូនគោនោះឡើងតាមកាំជណ្តើរទៅលើផ្ទះ និងបានលិទ្ធថើបគាត់ និងកូនចៅ ដែលនៅផ្ទះជាមួយ ព្រមទាំងបញ្ចេញអាកប្បកិរិយា និងមានវិញ្ញាណស្តាប់និយាយស្តី ដូចប្តីគាត់កាលនៅរស់ ។ ស្ត្រីចំណាស់ជាប្រពន្ធរូបនេះ រៀបរាប់ទៀតថា ក្រោយពីមានការសង្ស័យលើការបញ្ចញអាកប្បកិរិយា និងវិញ្ញាណរបស់កូនគោដូចប្តីបែបនេះ ទើបរូបគាត់ និងកូនៗនាំគ្នាទៅរកគ្រូបញ្ជាន់រូបមើល និងបានប្រាប់ថា កូនគោនេះជាប្តីរបស់គាត់មកចាប់ជាតិដើម្បីបង្គ្រប់ជាតិ ។
តាមពិត ខ្មោចប្តីគាត់មិនចង់មកចាប់ជាតិជាសត្វគោនោះទេ គឺចង់ទៅចាប់ជាតិជាមួយកូនស្រីគាត់ តែដោយសារកូនស្រីពន្យារកំណើត មិនអាចចាប់ជាតិជាមនុស្សបាន ក៏មកចាប់ជាតិជាគោ ឬជាសត្វអី្វក៏ដោយ ឱ្យតែបានមកនៅជាមួយនឹងក្រុមគ្រួសាររបស់គាត់ដូចកាលពីមុនវិញ ។ សព្វថ្ងៃ គោឈ្មោលមួយក្បាលនេះមានអាយុជាង២ឆ្នាំហើយ តែគ្រួសារនេះ មិនបានចាក់ក្រឡុះដូចគោដទៃទៀតឡើយ ដោយសារតែពួកគាត់អាណិតមិនធ្វើបាបឪពុករបស់ខ្លួនទេ គឺបណ្តោយឱ្យគោឈ្មោលមួយក្បាលនេះ ដើរពាសវាលពាសកាលពេញភូមិ ។ ពួកគាត់ជឿថា ការដើររបស់គោនេះ គឺដូចទម្លាប់របស់ឪពុកគាត់ ដែលកាលនៅរស់តែងតែដើរលេងតាមផ្ទះញាតិមិត្តក្នុងភូមិបែបនេះ ។
ចំណែកកូនស្រីឈ្មោះ សុខ គុណ អាយុ៤៧ឆ្នាំ រៀបរាប់ថា បើទោះបីជាឪពុកគាត់ចាប់ជាតិជាសត្វអ្វីក៏ដោយ ក៏ពួកគាត់នៅតែគោរពស្រឡាញ់ និងមើលថែដូចមនុស្សដែរ ។ ជារៀងរាល់ល្ងាច ពួកគាត់តែងតែហៅគោនោះថា «ពុកៗឡើងទៅសំរាន្តនៅលើផ្ទះ» ដែលផ្ទះរបស់គាត់ជាផ្ទះឈើប្រក់ក្បឿង សង់ខ្ពស់ពីដី និងមានជណ្តើរថ្មកាំធំៗ ហើយគោនោះ ក៏តែងតែឡើងទៅតាមការហៅរបស់ពួកគាត់ ។ កូនស្រីរូបនេះរៀបរាប់ទៀតថា ពេលឡើងទៅដល់លើផ្ទះ គោដែលជាឪពុករបស់គាត់បានដើរលិទ្ធតាមជញ្ជាំង គ្រែដេក ដែលសញ្ញានេះបញ្ជាក់ថា ពិតជាឪពុក ព្រោះកាលពីនៅរស់មុនពេលសម្រាន្ត គឺគាត់តែងតែដើរជូតផ្ទះសម្បែង ។ការលិទ្ធនិងហិតមនុស្សម្នានៅក្នុងគ្រួសារនេះ ជាសញ្ញាមួយដែលកូនស្រីរូបនេះបញ្ជាក់ថា ជាការដឹងកូន ដឹងចៅរបស់ឪពុក បើទោះជាគាត់ចាប់ជាតិ ជាសត្វតែមានវិញ្ញាណជាមនុស្ស ។ កូនស្រីរូបនេះបន្តថា ជារៀងរាល់ថ្ងៃ កូនចៅតែងតែប្រតិបត្តិមើលថែឪពុកជាសត្វគោនេះ មិនលស់មួយថ្ងៃទេ ដូចជាចាប់លាងទឹកដុសសាប៊ូ ទិញនំចំណីផ្លែឈើឲ្យ និងក្រាលពួកកន្ទេលឱ្យសម្រាកនៅលើផ្ទះជាដើម ។
បើទោះបីជាគ្រួសារមួយនេះ មានជំនឿស៊ប់ថា ឪពុកដែលស្លាប់បានចាប់ជាតិជាសត្វគោយ៉ាងណាក្តី តែអ្នកនៅក្រៅភូមិខ្លះ ហាក់មិនជឿនោះទេ ដោយពួកគាត់លើកហេតុផលថា ធម្មតាសត្វបើយើងទម្លាប់បង្ហាត់បង្ហាញតាំងពីតូចមក គឺសត្វនោះនឹងអនុវត្តធ្វើតាម ដូចជាការឡើងកាំជណ្តើរជាដើម ។ ចំណែកឯការលិទ្ធ ហិត វាគ្រាន់តែជាញាណរបស់សត្វគោប៉ុណ្ណោះ ៕
ចែករំលែកព័តមាននេះ