រាជធានីភ្នំពេញ ៖ ក្រសួងការងារ និងបណ្ដុះបណ្ដាលវិជ្ជាជីវៈ នឹងប្រកាសការបង្កើតក្រុមប្រឹក្សាជំនាញតាមវិស័យ និងបើកចំហរទទួលសមាជិកបន្ថែមដើម្បីធ្វើឱ្យក្រុមប្រឹក្សាជំនាញ តាមវិស័យ (SSCs) ក្លាយជាតំណាងតាមវិស័យយ៉ាងរឹងមាំ ។…
រាជធានីភ្នំពេញ ៖ ក្រសួងការងារ និងបណ្ដុះបណ្ដាលវិជ្ជាជីវៈ នឹងប្រកាសការបង្កើតក្រុមប្រឹក្សាជំនាញតាមវិស័យ និងបើកចំហរទទួលសមាជិកបន្ថែមដើម្បីធ្វើឱ្យក្រុមប្រឹក្សាជំនាញ តាមវិស័យ (SSCs) ក្លាយជាតំណាងតាមវិស័យយ៉ាងរឹងមាំ ។
លោក ពេជ្រ សោភ័ណ្ឌ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈបានប្រាប់អ្នកសារព័ត៌មានក្រោយបញ្ចប់ពិធីចុះហត្ថលេខាលើអនុស្សរណៈយោគយល់ ក្រសួងការងារ និងបណ្តុះបណ្តាលវិជ្ជាជីវៈជាមួយសហព័ន្ធនិយោជក និងសមាគមពាណិជ្ជកម្មកម្ពុជាកាលពីរសៀលថ្ងៃទី១១ ខែមិថុនា នៅទីស្ដីការក្រសួងថា គោលនយោបាយជាតិអប់រំបណ្តុះបណ្តាលបច្ចេកទេស និងវិជ្ជាជីវៈបានអនុម័តដោយរាជរដ្ឋាភិបាលកម្ពុជា នៅថ្ងៃទី១៦ ខែមិថុនា ឆ្នាំ២០១៧ ។
លោកបន្តថា គោលនយោបាយនេះផ្តល់នូវក្របខ័ណ្ឌសម្រាប់ការអភិវឌ្ឍន៍រយៈពេលវែងនៃវិស័យ TVET នៅក្នុងប្រទេសដើម្បីធានានូវការឆ្លើយតបទៅនឹងតម្រូវការទីផ្សារពលកម្មជំនាញថ្នាក់ជាតិ និងអន្តរជាតិ ។ យុទ្ធសាស្ត្រគន្លឹះក្នុងការអនុវត្តគោលនយោបាយ គឺការចូលរួមយ៉ាងសកម្មរបស់វិស័យឯកជនជាពិសេសឧស្សាហកម្មតាមរយៈក្រុមប្រឹក្សាជំនាញតាមវិស័យ (SSCs) ។
ផ្អែកលើបទពិសោធន៍ និងការអនុវត្តរបស់បណ្តាប្រទេសផ្សេងៗ SSCs គឺជាវេទិកាសម្រាប់កំណត់នូវតម្រូវការជំនាញរបស់វិស័យនីមួយៗ និងផ្តល់ឱកាសដល់សមាជិករបស់ខ្លួនក្នុងការចូលរួមយ៉ាងសកម្មនៅក្នុងការអភិវឌ្ឍន៍ និងការអនុវត្តគោលនយោបាយ និងកម្មវិធីយ៉ាងច្បាស់លាស់ ដើម្បីឆ្លើយតបទៅនឹងតម្រូវការជំនាញរបស់ពួកគេ ។
លោកបន្ថែមថា ក្រុមប្រឹក្សាជំនាញតាមវិស័យនឹងជាដៃគូរក្នុងការអភិវឌ្ឍន៍កម្លាំងពលកម្មជំនាញវាងវិស័យសាធារណៈ និងឯកជន ។ ក្នុងការផ្តួចផ្តើមបង្កើតក្រុមប្រឹក្សាជំនាញតាមវិស័យ (SSCs) នៅគ្រប់វិស័យនឹងជួយក្នុងប្រតិបត្តិការរបស់ខ្លួន ហើយបង្ហាញពីបញ្ហាប្រឈមដោយសារជាគំនិតនេះសម្រាប់បរិបទកម្ពុជា ៕
ចែករំលែកព័តមាននេះ