រាជធានីភ្នំពេញ ៖ លោក សម រង្ស៊ី អតីតប្រធានគណបក្សសង្គ្រោះជាតិកំពុងរស់នៅនិរទេសខ្លួន នៅក្រៅប្រទេស បាននៅតែអះអាងរាព្រះរាជសារព្រះមហាក្សត្រអំពាវនាវឲ្យពលរដ្ឋទៅបោះឆ្នោតកុំឲ្យមានការភ័យក្លាយ និងព្រួយបារម្មណ៍ក្លែ ងក្លាយដដែលទោះបីជាក្រសួងព្រះបរមរាជវាំងអះអាងថាពិតក្តី។ លោក សម រង្ស៊ី បានសរសេរលើបណ្តាញសង្គម យ៉ាងដូច្នេះថាលិខិតនេះបើមិនក្លែងក្លាយទាំងស្រុងទេ(កុំជឿអាម៉ីអាថោងភូតភរ) ក៏ក្លែងក្លាយត្រង់កាលបរិច្ឆេទដែរ ពីព្រោះលិខិតនេះត្រូវគេច្នៃថា ចុះថ្ងៃ១៨ ឧសភា ២០១៨ តែគេចាំដល់ថ្ងៃ០៥ មិថុនា ២០១៨ ទើបផ្សព្វផ្សាយ។ តាមការពិត គេដាក់ថ្ងៃក្លែងក្លាយ១៨ ឧសភា នេះ ដើម្បីបន្លំឲ្យបានមុនលិខិតរបស់ខ្ញុំ ផ្ញើថ្វាយព្រះមហាក្សត្រតាំងពីថ្ងៃ ២៣ ឧសភា។ លោកបញ្ជាក់ថា «ពួកនេះច្បាស់ជាខ្មាស់គេពេកបើដាក់កាលបរិច្ឆេទពិតប្រាកដគឺថ្ងៃ ០៥ មិថុនា តែម្តងឃើញថា ធ្វើឡើងក្រោយលិខិតខ្ញុំដែលក្នុងនោះខ្ញុំបានទូលព្រះមហាក្សត្រពីការពិតគ្រប់ជ្រុងជ្រោយអស់ហើយ ពីការបោះឆ្នោត ថ្ងៃ២៩ កក្កដា។ ចម្លែកណាស់! សព្វដងលិខិតព្រះមហាក្សត្រចេញផ្សាយតែ៤-១០ថ្ងៃប៉ុណ្ណោះមុនថ្ងៃបោះឆ្នោត។ តែលើកនេះ ចុះហត្ថលេខាជាង២ខែ និងចេញផ្សាយជិត២ខែ មុនថ្ងៃបោះឆ្នោត»។
ជាមួយគ្នានោះដែរលោក សម រង្ស៊ី ក៏បានលើកឡើងថា តាមការពិត សម្តេច ហ៊ុន សែន យកឈ្មោះព្រះមហាក្សត្រទៅប្រើដើម្បីផ្ចាញ់ផ្ចាលជាមួយខ្ញុំ និងបោកបញ្ឆោតប្រជារាស្ត្រ ម្តងទៀត ដោយសារតែគាត់ដឹងថា ប្រជារាស្ត្រចំនួនច្រើនលើសលប់ ត្រៀមខ្លួនមិនទៅបោះឆ្នោត តាមសេចក្តីអំពាវនាវ របស់ចលនាសង្គ្រោះជាតិ ពីព្រោះប្រជារាស្ត្រយល់ច្បាស់អំពីសារៈសំខាន់ និងសារៈប្រយោជន៍នៃការធ្វើពហិការមិនចូលរួមក្នុ ងការបោះឆ្នោតក្លែងក្លាយ និងលេងសើចនៅថ្ងៃ២៩ កក្កដា ខាងមុខនេះ។ លោកបញ្ជាក់ថា«ទោះជាយ៉ាងណាក៏ដោយ ខ្ញុំនៅតែជឿជាក់ថា លិខិតណាមួយពីព្រះមហាក្សត្រ ពេលនេះ គឺធ្វើឡើងក្រោមការគំរាមកំហែង ហើយលិខិតបែបនេះអត់មា នតម្លៃអ្វីទេតាមផ្លូវច្បាប់។ ដូចកាលពីឆ្នាំ២០០៥ សម្តេច ហ៊ុន សែន ពេលនេះច្បាស់ជាគំរាមព្រះមហាក្សត្រទៀតហើយ ថាគាត់នឹងរំលាយរបបរាជានិយម បើព្រះមហាក្សត្រមិនធ្វើតាមបញ្ជារបស់គាត់»។ សូមជម្រាបថា កាលពីថ្ងៃទី៨ មិថុនា ២០១៨ ក្រសួងព្រះបរមរាជវាំងបំភ្លឺថា ព្រះរាជសាររបស់ព្រះមហាក្សត្រដែលឡាយព្រហស្តលេខា ថ្ងៃទី១៨ ខែឧសភា គឺជា ព្រះរាជសារពិត មិនមានការក្លែងក្លាយនោះឡើយ។
សេចក្តីប្រកាសព័ត៌មាន ពីព្រះបរមរាជវាំងចេញនៅថ្ងៃទី៨ ខែមិថុនា ធ្វើ ឡើងក្រោយពេលដែលមជ្ឈដ្ឋានទូទៅដាក់ការសង្ស័យអំពីភាពមិនប្រក្រតី នៃព្រះរាជសារដែលអំពាវនាវឲ្យប្រជាពលរដ្ឋ គ្រប់គ្នាចេញទៅបោះឆ្នោត នាថ្ងៃទី២៩ ខែកក្កដា ខាងមុខ ក្នុងស្ថានភាព ដែលពលដ្ឋម្ចាស់ឆ្នោតជាងបីលាននាក់ ដែលគាំ ទ្រគណបក្សសង្គ្រោះជាតិ បាត់បង់ឱកាស និងសិទ្ធិក្នុងការជ្រើសរើសមេដឹកនាំ និងគណបក្សនយោបាយដែលខ្លួនពេញ ចិត្ត។ សេចក្តីប្រកាសព័ត៌មានបានបញ្ជាក់ថា«ក្រសួងព្រះបរមរាជវាំងសូមប្រកាសជាព័ត៌មាន ជូនសាធារណៈជនជ្រាបថា ព្រះរាជសាររបស់ព្រះករុណាព្រះមហាក្សត្រ នៃព្រះរាជណាចក្រកម្ពុជា ជាទីគោរពសក្តារៈដ៏ខ្ពងខ្ពស់បំផុត មិនមែនក្លែងក្លាយ និងមិនមែនមានការគំរាមកំហែងឡើយ គឺព្រះរាជសារពិតប្រាកដ»»។ សូមរំលឹកថា ព្រះករុណាព្រះមហាក្សត្រ សម្តេចព្រះបរមនាថនរោត្តមសីហមុនី កាលពេលថ្មីៗកន្លងមកបានចេញព្រះរាជសារជូនជនរួមជាតិ ដោយព្រះអង្គបានអំពាវនាវដល់ ប្រជារាស្ត្រខ្មែរ ដែលមានសិទ្ធិបោះឆ្នោតទាំងអស់ សូមអញ្ជើញទៅបោះឆ្នោតឲ្យបានគ្រប់ៗគ្នា នៅថ្ងៃអាទិត្យ ទី២៩ ខែកក្កដា ឆ្នាំ២០១៨។ ព្រះអង្គបានមានព្រះរាជឱង្ការទៅកាន់ប្រជារាស្ត្រជាម្ចាស់ឆ្នោតថា ការបោះឆ្នោតនេះ ជាការបោះឆ្នោតសម្ងាត់ សេរីត្រឹមត្រូវ ហើយសូមកុំព្រួយបារម្ភពីការគាបសង្កត់ ការគំរាមកំហែង ឬសម្លុតពីជនណាម្នាក់ ឬបក្សនយោបាយណាមួយឲ្យសោះ។
ព្រះរាជសាររបស់ព្រះករុណា ព្រះមហាក្សត្រ បានធ្វើឡើងកាលពីថ្ងៃទី១៨ ខែឧសភា ឆ្នាំ២០១៨ ហើយទើបត្រូវបានផ្សព្វផ្សាយកាលពីល្ងាចថ្ងៃទី០៥ ខែមិថុនា ឆ្នាំ២០១៨នេះ។ ព្រះករុណាព្រះមហាក្សត្រ សម្តេចព្រះបរមនាថ នរោត្តម សីហមុនី បានមានព្រះរាជបន្ទូលជូនជនរួមជាតិទៀតថា “ការបោះឆ្នោតជ្រើសតាំងតំណាងរាស្ត្រ នីតិកាលទី៦ នឹងប្រព្រឹត្តនៅថ្ងៃអាទិត្យ ទី២៩ ខែកក្កដា ឆ្នាំ២០១៨ ខាងមុខនេះ។ ក្នុងឱកាសនេះ ខ្ញុំសូមអំពាវនាវជាឱឡារិកជូនជនរួមជាតិ អ្នកមានសិទ្ធិបោះឆ្នោតទាំងអស់ សូមអញ្ជើញទៅបោះឆ្នោតឲ្យបានគ្រប់ៗគ្នា ជ្រើសរើសអ្នកដឹកនាំប្រទេសជាតិ ដើម្បីការអភិវឌ្ឍ និងការរីកចម្រើនរុងរឿងថ្កើងថ្កានលើគ្រប់វិស័យ”។ ការបោះឆ្នោតនៅថ្ងៃអាទិត្យ ទី២៩ ខែកក្កដា ឆ្នាំ២០១៨ គឺជាការបោះឆ្នោតជាទូទៅជាសកល ដោយសេរី ត្រឹមត្រូវ យុត្តិធម៌ ស្មើភាព និងដោយសម្ងាត់ ស្របតាមគោលការណ៍លទ្ធិប្រជាធិបតេយ្យ សេរីពហុបក្ស។ ដូចនេះ សូមកុំឲ្យមានការព្រួយបារម្ភពីការគាបសង្កត់ ការគំរាមកំហែង ឬសម្លុតពីជនណាម្នាក់ ឬបក្សនយោបាយណាមួយឲ្យសោះ”។ ព្រះករុណា ព្រះមហាក្សត្រ សម្តេចព្រះបរមនាថនរោត្តមសីហមុនី មានព្រះរាជឱង្ការបញ្ជាក់ក្នុង ព្រះរាជសារថា “ខ្ញុំសូមជូនជនរួមជាតិទាំងអស់ មេត្តាប្រើសិទ្ធិសេរីភាព បោះឆ្នោតទៅតាមសិតសម្បជញ្ញៈរបស់ខ្លួនម្នាក់ៗ ដែលមានទំនុកចិត្តទៅលើបេក្ខជនណាម្នាក់ គណបក្សនយោបាយណាមួយដោយសេរី”៕
ចែករំលែកព័តមាននេះ