ខេត្តប៉ៃលិន ៖ ជនសង្ស័យប្រើកាំភ្លើងខ្លីម៉ាកកា៥៤ អត់គ្រាប់ ដែលធ្វើសកម្មភាពប្លន់អ្នកដឹកសារាយ និងការ៉េមលក់តាមផ្លូវ បានត្រូវនគរបាលព្រហ្មទណ្ឌកម្រិតធ្ងន់ខេត្ត ចាប់ឃាត់ខ្លួន និងកសាងសំណុំរឿងបញ្ជូនទៅកាន់អយ្យការអមសាលាដំបូងខេត្ត ដើម្បីចាត់ការតាមផ្លូវច្បាប់ ។
ខេត្តប៉ៃលិន ៖ ជនសង្ស័យប្រើកាំភ្លើងខ្លីម៉ាកកា៥៤ អត់គ្រាប់ ដែលធ្វើសកម្មភាពប្លន់អ្នកដឹកសារាយ និងការ៉េមលក់តាមផ្លូវ បានត្រូវនគរបាលព្រហ្មទណ្ឌកម្រិតធ្ងន់ខេត្ត ចាប់ឃាត់ខ្លួន និងកសាងសំណុំរឿងបញ្ជូនទៅកាន់អយ្យការអមសាលាដំបូងខេត្ត ដើម្បីចាត់ការតាមផ្លូវច្បាប់ ។
ជនសង្ស័យម្នាក់នេះឈ្មោះ រិទ្ធ គឹមរុម ភេទប្រុស អាយុ១៧ឆ្នាំ មានស្រុកកំណើតនៅភូមិតាឡំចុង ឃុំតាឡំ ស្រុកមង្គលបុរី ខេត្តបន្ទាយមានជ័យ មុខរបរមិនពិតប្រាកដ សព្វថ្ងៃស្នាក់នៅបណ្តោះអាសន្នក្នុងភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន ។ ហេតុការណ៍យកកាំភ្លើងខ្លីអត់គ្រាប់ប្លន់យកលុយនេះ កើតឡើងកាលពីវេលាម៉ោង១១ និង២០នាទីព្រឹក ថ្ងៃទី២៣ កុម្ភៈ នៅភូមិស្រែអន្ទាក់ ឃុំសាលាក្រៅ ស្រុកសាលាក្រៅ ហើយត្រូវបានចាប់ឃាត់ខ្លួនក្នុងរយៈពេល១០នាទីក្រោយមក ។ ឯជនរងគ្រោះឈ្មោះ ម៉ុក លី ហៅរីម ភេទប្រុស អាយុ២៧ឆ្នាំ ជាអ្នកដឹកសារាយ និងការ៉េម លក់តាមម៉ូតូ រស់នៅភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន។
ប្រភពព័ត៌មានពីជនរងគ្រោះឈ្មោះ ម៉ុក លី ហៅរីម ឱ្យដឹងថា នៅមុនពេលកើតហេតុរូបគេបានលើកសារាយ និងការ៉េមពីថៅកែម្នាក់នៅក្រុងប៉ៃលិន ដឹកតាមម៉ូតូយកទៅលក់នៅតាមភូមិក្នុងស្រុកសាលាក្រៅ ដោយជិះម៉ូតូក្នុងទិសដៅពីត្បូងទៅជើង ។ លុះទៅដល់ភូមិស្រែអន្ទាក់ នៅតាមផ្លូវជាកន្លែងស្ងាត់ ស្រាប់តែជួបនឹងយុវជនម្នាក់កំពុងដើរតាមផ្លូវស្រែកឃាត់ម៉ូតូរបស់ខ្លួនដើម្បីទិញសារាយ ។ ក្រោយពីឈប់ម៉ូតូ ជនសង្ស័យប្រាប់ថា ទិញសារ៉ាយចំនួន១០ចាន ហើយរូបគេជាអ្នកលក់ប្រាប់ថា មួយចាន១ពាន់រៀល ។ ពេលនោះជនសង្ស័យដកលុយមកមានតែ៣.៥០០រៀលប៉ុណ្ណោះ និងបានរូតហោប៉ៅកាបូបបញ្ចេញកាំភ្លើងខ្លីមួយដើម ម៉ាកកា៥៥ ភ្ជង់គំរាមទារលុយពីរូបគេទៅវិញ ។
ប្រភពដដែលបន្តទៀតថា ក្នុងសភាពបែបនេះធ្វើឱ្យរូបគេភ័យស្លន់ស្លោយ៉ាងខ្លាំង មិនដឹងធ្វើយ៉ាងម៉េចព្រោះនៅតាមផ្លូវស្ងាត់អត់មានអ្នកដំណើរឆ្លងកាត់ ក៏ស្ទុះទៅទាញកាំភ្លើងចេញពីដៃជនម្នាក់នោះ និងប្រវាយប្រតប់គ្នា ធ្វើឱ្យកាំភ្លើងខ្លីអត់គ្រាប់មួយដើមនេះធ្លាក់ទៅលើដី របូតបង់ចេញពីកាំភ្លើង ។ ជាមួយនេះរូបគេបានដេញទាត់ធាក់យុវជនរូបនោះ រួចក៏ចាប់បានកាំភ្លើងខ្លីគប់ចូលក្នុងគុម្ពោតព្រៃ រួចក៏ប្រញាប់ជិះម៉ូតូទៅប្តឹងសមត្ថកិច្ចស្រុកសាលាក្រៅ តែជួនពេលរូបគេជួបនឹងមន្ត្រីសាលាខេត្តម្នាក់ឈ្មោះ ជ័យ បូរ៉ា កំពុងជិះម៉ូតូឆ្លងកាត់ទីនោះក៏យកកាំភ្លើងនោះប្រគល់ជូនគាត់ភ្លាម ។ ចំណែកជនសង្ស័យបម្រុងរត់គេចខ្លួន ក៏ត្រូវសមត្ថកិច្ចនៅក្បែរនោះមកចាប់ឃាត់ខ្លួនភ្លាមៗតែម្តង ។
ទាក់ទិនទៅនឹងបញ្ហាប្រើកាំភ្លើងអត់គ្រាប់ប្លន់គំរាមយកលុយអ្នកលក់សារាយ និងការ៉េមនេះ លោក ឆម វ៉ាន់ធី នាយការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តឱ្យដឹងថា ក្រោយពីការចាប់ឃាត់ខ្លួន ជនសង្ស័យត្រូវបានឃុំខ្លួនបណ្តោះអាសន្ននៅក្នុងបន្ទប់ស្នងការដ្ឋាននគរបាលខេត្តសិន ដើម្បីកសាងសំណុំរឿងបញ្ជូនទៅសាលាដំបូងខេត្ត ពីបទប្រើអាវុធខ្លីខុសច្បាប់ និងគំរាមប្លន់អ្នកលក់សារាយ និងការ៉េមយកលុយ ។ រីឯកាំភ្លើងខ្លីដែលអត់គ្រាប់នេះ ត្រូវបានជនសង្ស័យសារភាពថា ទិញពីមិត្តភក្តិមកពីប្រទេសថៃ ៕
ចែករំលែកព័តមាននេះ