រាជធានីភ្នំពេញ ៖ មកទល់ពេលនេះ ប្រាក់ប្រចាំខែរបស់កីឡាករកីឡាការិនីជម្រើសជាតិត្រូវគេកត់សម្គាល់ថា មានការកើនឡើងខុសពីមុនដាច់ឆ្ងាយ ដោយបន្ថែមពីលើប្រាក់ខែ ក៏មានប្រាក់ធ្វើដំណើរ ប្រាក់បេសកកម្ម និងប្រាក់ថ្ងៃអាហារប្រចាំថ្ងៃផងដែរ ស្របគ្នាដែលកីឡាករ-កីឡាការិនីជម្រើសជាតិក៏ត្រូវបានបង្កើនចំនួនតម្រូវទៅតាមការរីកចម្រើនរបស់វិស័យកីឡា។ ទោះបីយ៉ាង ណា បញ្ហាប្រាក់ខែនេះ នៅតែជាចំណោទចំពោះកីឡាករ-កីឡាការិនីនៅ ឡើយទេ ដោយសារតែប្រាក់ខែដែលត្រូវដំឡើងឱ្យពួកគេនៅតែមិនគ្រប់ការចំណាយចំពោះតម្លៃទំនិញដែលចេះតែឡើងថ្លៃនោះដែរ។
យោងតាមការទម្លាយពីមន្ត្រីគណៈកម្មាធិការជាតិអូឡាំពិកកម្ពុជា បានអះអាងថា កាលពីប៉ុន្មានឆ្នាំមុន ប្រាក់ខែកីឡាករ-កីឡាការិនី និងគ្រូបង្វឹក មានចំនួនតែប៉ុន្មានម៉ឺនរៀលប៉ុណ្ណោះ ប៉ុន្តែពេលនេះកើនដល់ជាងមួយលានរៀល ដោយកីឡាករ-កីឡាការិនីជម្រើសជាតិម្នាក់ៗទទួលបានប្រាក់ខែជាប្រចាំចំនួន៦០ម៉ឺនរៀល ដោយបូកទាំងថ្លៃអាហារ និងថ្លៃធ្វើដំណើរ គឺទទួលបាន១លាន៨០ម៉ឺនរៀល ខណៈដែលគ្រូបង្វឹក ក្រោយពីបូកថ្លៃអាហារ និងថ្លៃធ្វើដំណើរដូចគ្នា គឺបានមួយខែ១លាន៩០ម៉ឺនរៀល ។ ប៉ុន្តែលក្ខខណ្ឌនៃការទទួលបានប្រាក់នេះ គឺលុះត្រាតែកីឡាករ-កីឡាការិនី និងគ្រូបង្វឹក មកបំពេញការងារនៅក្នុងសហព័ន្ធដែលខ្លួនស្ថិតនៅទៀងទាត់យ៉ាងហោចព្រឹក២ម៉ោង និងល្ងាច២ម៉ោងជាកំហិត ដោយមិនអាចចេះតែឈប់បានទេទើបអាចបន្តតំណែងជាជម្រើសជាតិបាន ដែលនោះជារឿងលំបាកសម្រាប់អ្នកគ្មានការងារពីខាងក្រៅមកទប់ ។
ប្រភពដដែលបានទម្លាយថា ចំនួនប្រាក់ខែនេះត្រូវបានបើកឱ្យជាប្រចាំ ប៉ុន្តែនៅក្នុងខែខ្លះក៏បើកយឺតយ៉ាវផងដែរ ទើបឱ្យតែមុនពេលទទួលបានប្រាក់ខែម្ដងៗ កីឡាករភាគច្រើនរមែងថ្ងូរថាពិបាករស់។
អតីតកីឡាការិនី ចូវ សុធារ៉ា ដែលក្នុងពេលនេះបានក្លាយជាគ្រូបង្វឹកជម្រើសជាតិ បានអះអាងថា សម្រាប់រូបនាងចំនួនប្រាក់ខែដែលបានផ្ដល់ឱ្យគឺមិនចោទនោះទេ ដោយសារតែនាងក៏ជាគ្រូនៅក្នុងសាលារដ្ឋដែលមានប្រាក់ខែមួយកន្លែងផ្សេងទៀតមកទប់ ។ ប៉ុន្តែសម្រាប់កីឡាករ-កីឡាការិនីដែលពឹងតែលើប្រាក់ខែ គឺនឹងលំបាក ដោយសារតែការជាប់ជម្រើសជាតិមិនអាចឱ្យពួកគេធ្វើការមួយផ្សេងបានទេ ដោយសារតែលក្ខខណ្ឌតម្រូវឱ្យមកហ្វឹកហាត់ព្រឹក២ម៉ោង និងល្ងាច២ម៉ោង ដែលមិនអាចឱ្យពួកគេទទួលការងារផ្សេងបានដូចនាងដែលជាគ្រូសាលារដ្ឋ ហើយរង់ចាំតែចាយប្រាក់ខែពីសហព័ន្ធតែមួយមុខ ។
នាងថា ប្រាក់សរុបមួយខែ១លាន៨សែន មិនគ្រប់តម្រូវការរបស់កីឡាករនោះទេ ដោយសារតែទឹកប្រាក់នេះ គឺតម្រូវឱ្យកីឡាករ-កីឡាការិនីចំណាយលើការធ្វើដំណើររាល់ថ្ងៃ និងថ្លៃអាហារប្រចាំថ្ងៃផងដោយមិនទាន់បូកបញ្ចូលថ្លៃសាំង និងអាហារបន្ទាប់បន្សំផងទេ ។ នាងថា កូនសិស្សរបស់នាងច្រើននាក់ថ្ងូរពីការលំបាក ប៉ុន្តែសម្រាប់រូបនាងគឺអត់បញ្ហានោះទេ អ៊ីចឹងហើយទើបនាងតស៊ូហ្វឹកហាត់នៅក្នុងសហព័ន្ធចំបាប់បានជាប់ជាកីឡាការិនីជម្រើសជាតិរហូតមកដោយបានទាំងក្លាយជាកីឡាការិនីដែលមានមេដាយជូនជាតិច្រើនគ្រឿងផង ។ ប៉ុន្តែសម្រាប់កីឡាករ-កីឡាការិនីខ្លះ គឺត្រូវបង្ខំចិត្តមកហាត់ខ្លះអត់ខ្លះហើយភាគីលោកគ្រូអ្នកគ្រូក៏បិទភ្នែក ដោយសារតែស្ដាយសមត្ថភាពពួកគាត់ មិនចង់ឱ្យបាត់បង់អ្នកល្អទេ ។
អ្នកនាងថា គឺជារឿងពិបាកបន្ទោសដោយសារតែកីឡាករ-កីឡាការិនីខ្លះគាត់មានសមត្ថភាព ប៉ុន្តែដល់ពេលតម្រូវឱ្យពួកគេមកហ្វឹកហាត់ព្រឹក២ម៉ោងល្ងាច២ម៉ោង ហើយ
មិនអាចធ្វើការកន្លែងផ្សេងយកលុយមកទប់បាន ដោយពឹងតែប្រាក់ជាងមួយលានរៀលនោះ គឺមិនអាចឱ្យពួកគាត់មកហ្វឹកហាត់ដោយបេះដូងទេ ។ ទោះបីយ៉ាងណា អ្នកនាងថា ចំនួនប្រាក់ខែគឺខ្ពស់ជាងចំនួនដែលនាងធ្លាប់ទទួលបានកាលពីនៅជាកីឡាការិនីជម្រើសជាតិឆ្ងាយណាស់ទើបនាងយល់ថា ភាពខ្លាំងរបស់កីឡាករកម្ពុជាលើឆាកអន្តរជាតិ គឺជារឿងមិនធម្មតា បើធៀបនឹងកីឡាករបរទេស ដែលគេមានប្រាក់ខែរាប់រយដុល្លារ ហើយរស់យ៉ាងស្រួលដោយរង់ចាំតែហ្វឹកហាត់ ដែលផ្ទុយពីកីឡាករកម្ពុជាត្រូវស្វះស្វែងរកការងារផ្សេងដូចជានាងត្រូវបង្រៀននៅសាលារដ្ឋផង ហើយខ្លះត្រូវទទួលបង្ហាត់សិស្សផង ដើម្បីបានចំណូលច្រើនមកទប់។ ម្យ៉ាង អាជីពកីឡាករមិនអាចហូបចុកធម្មតាៗដូចជាមនុស្សធម្មតានោះទេ គឺត្រូវហូបសាច់ៗ ហូបប៉ូវៗទើបនាងបញ្ជាក់ថា បើឱ្យនាងគិតគឺប្រាក់ខែ១លានជាងសរុបទាំងថ្លៃបាយ មិនគ្រប់គ្រាន់សម្រាប់កីឡាករជម្រើសជាតិកម្ពុជាទេ។
លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាពិកកម្ពុជា ធ្លាប់ថ្លែងបញ្ជាក់ថា ប្រាក់ខែកីឡាករ-កីឡាការិនីដ្បិតថាមិនទាន់ល្អប្រសើរ ក៏ជួយសម្រួលការលំបាករបស់កីឡាករជម្រើសជាតិបានច្រើនផងដែរ ។ ប៉ុន្តែលោកថា ប្រាក់ខែជម្រើសជាតិនេះ មិនមែនកីឡាករទទួលបានពេញមួយឆ្នាំនោះទេ គឺបានត្រឹមតែពេលរដូវកាលប្រមូលផ្ដុំជម្រើសជាតិម្ដងៗ ដែលមានរយៈពេល៨ខែក្នុងមួយឆ្នាំប៉ុណ្ណោះសម្រាប់ជម្រើសជាតិឈុតតូចនិង១០ខែសម្រាប់ជម្រើសជាតិឈុតធំដើម្បីប្រមូលយកមកបំប៉ន។
លោកថា ការប្រមូលកីឡាករមិនត្រូវបានកំណត់ខែដដែលៗក្នុងឆ្នាំនីមួយៗនោះទេ ដោយក្នុងឆ្នាំខ្លះចាប់ផ្ដើមប្រមូលខែ២ ហើយឆ្នាំខ្លះក៏ប្រមូលខែផ្សេងពោលគឺអាស្រ័យទៅលើព្រឹត្តិការណ៍កីឡា តែធ្វើយ៉ាងម៉េចគឺរាប់ពីការប្រមូល ការហាត់បំប៉ន រហូតដល់ចេញប្រកួតចប់សព្វគ្រប់ គឺមានរយៈពេល៨ខែ និង១០ខែ ដែលបានកំណត់ ដោយសារតែអូឡាំពិកកម្ពុជា ក៏មិនមានលុយច្រើនដើម្បីចំណាយ ។ លោកធ្លាប់បង្ហើបថា កីឡាករជម្រើសជាតិប្រចាំឆ្នាំមានចំនួនជាង៣០០នាក់ និងគ្រូជាង៣០រូប ទើបជាបន្ទុកដ៏ធំក្នុងការចំណាយបើទោះជាកីឡាករ និងគ្រូបង្វឹកម្នាក់ៗទទួលបានប្រាក់ខែត្រឹមតែជាង១លានរៀលជាថ្នូរនឹងការមកហាត់២ម៉ោងព្រឹក និង២ម៉ោងល្ងាច ។
លោកថា គណៈកមា្មធិការជាតិអូឡាំពិកកម្ពុជាកំពុងស្វះស្វែងរកជំនួយជាច្រើនជួយដល់កីឡាករជម្រើសជាតិ ដោយភាពជាក់ស្ដែងគឺកីឡាករជម្រើសជាតិល្បីៗក៏មានក្រុមហ៊ុនជួយឧបត្ថម្ភបន្ថែមផងដែរ ដើម្បីជំរុញឱ្យកីឡាករទាំងនោះកាន់តែមានកម្លាំងចិត្តក្នុងការហ្វឹកហាត់ ៕
ចែករំលែកព័តមាននេះ