រាជធានីភ្នំពេញ ៖ រដ្ឋសភាបានកំណត់យកថ្ងៃទី៧ ខែមិថុនា ឆ្នាំ២០១៨ បើកសម័យប្រជុំពេញអង្គ រដ្ឋសភាលើកទី១០ នីតិកាលទី៥ ដើម្បីពិភាក្សា និងអនុម័តលើសេចក្តីព្រាងច្បាប់ ស្តីពីប្រាក់ឈ្នួលអប្បបរមា និងរបៀបវារៈមួយចំនួនទៀតមុននឹងបញ្ចប់អាណត្តិទី៥ រដ្ឋសភា។ លោក ឡេង ប៉េងឡុង អ្នកនាំពាក្យរដ្ឋសភា បានឲ្យដឹងក្រោយកិច្ចប្រជុំ គណៈក ម្មាធិការអចិន្ត្រៃយ៍រដ្ឋសភាក្រោមអធិបតីភាព សម្តេច ហេង សំរិន ប្រធានរដ្ឋសភា នាព្រឹកថ្ងៃទី៥ ខែមិថុនា ឆ្នាំ២០១៨ ថាអចិន្ត្រៃយ៍ រដ្ឋសភាបានលើកដៃកំណត់យកថ្ងៃទី៧ មិថុនា ខាងមុខនេះដើម្បីពិភាក្សា និងអនុម័តលើសេចក្តីព្រាងច្បាប់ ស្តីពីប្រាក់ឈ្នួលអប្បបរមា និងសេចក្តីព្រាងវិសោធនកម្មចំនួនពីរទៀត។ អ្នកនាំពាក្យរដ្ឋសភាក៏បានលើកឡើងថា របៀបវារៈនៃសម័យប្រជុំរដ្ឋសភាលើកទី១០ នីតិកាលទី៥ នូវ៖ ទី១-សេចក្តីព្រាងច្បាប់ស្តីពី ប្រាក់ឈ្នួលអប្បបរមា។ ទី២- សេចក្តីព្រាងច្បាប់ស្តីពីវិសោធនកម្មមាត្រា៨៧ ចំណងជើងចំណុច “គ” ផ្នែកទី៣ នៃជំពូកទី៤ មាត្រា៨៩ មាត្រា៩០ មាត្រា៩១ មាត្រា៩៤ មាត្រា១១០ មាត្រា១២០ និងមាត្រា១២២ នៃច្បាប់ស្តីពីការងារ។
និងទី៣-សេចក្តីព្រាងច្បាប់ស្តីពី វិសោធនកម្ម មាត្រា៣ មាត្រា៦ មាត្រា៧ មាត្រា៨ មាត្រា៩ មាត្រា១១ មាត្រា១២ ចំណងជើងជំពូកទី៤ មាត្រា១៦ មាត្រា១៩ មាត្រា២៦ ដល់ មាត្រា៥៩ មាត្រា៦៥ ដល់មាត្រា៦៨ នៃច្បាប់ស្តីពីស្តង់ដាកម្ពុជា។ ជាមួយគ្នានោះដែរ លោក ឡេង ប៉េងឡុង ក៏បានឲ្យដឹងថា យោងតាមរដ្ឋធម្មនុញ្ញនៃ ព្រះរាជាណាចក្រកម្ពុជាបានចែងក្នុងសម័យប្រជុំនីមួយៗ រដ្ឋសភាមានរយៈពេល ៣ខែ ដែលគិតទៅរដ្ឋសភានឹងបិទនៅថ្ងៃទី៨ ឬ៩ ខែកក្កដា ឆ្នាំ២០១៨ ខាងមុខនេះ។ លោកបញ្ជាក់ថា« សម័យប្រជុំរដ្ឋសភា មិនទាន់បិទការប្រជុំសម្រាប់អាណត្តិទី៥ នៅថ្ងៃទី៧ មិថុនា បានទេ។ គឺទាល់តែរយៈពេលយ៉ាងយូរបីខែ ទើបបិទបាន អ៊ីចឹងប្រសិនបើសម័យប្រជុំ ពិនិត្យច្បាប់ទាំងបី រដ្ឋសភានឹងផ្អាកសម័យប្រជុំសិន ក្នុងការរងចាំថាតើមានច្បាប់ថ្មី មកជូន រដ្ឋសភាមកអនុម័តទៀតទេ ? បើអត់មានទេ យើងក៏នៅរងចាំរហូតដល់ថ្ងៃទី៨ កក្កដាបើប្រកាស បិទសម័យប្រជុំតែម្តង»។
សូមជម្រាបថា សេចក្តីព្រាងច្បាប់ និងសេចក្តីវិសោធនកម្មច្បាប់ ខាងលើត្រូវ បានគណៈរដ្ឋមន្ត្រីបានអនុម័តកាលពីថ្ងៃទី២៥ ខែឧសភា ឆ្នាំ២០១៨។ ក្នុងនោះខ្លឹមសារនៃ សេចក្តីព្រាងច្បាប់ស្តីពីប្រាក់ឈ្នួលអប្បរមា រៀបចំឡើងមាន គោលបំណង
ច្បាប់នេះមានគោលបំណ ងដូចតទៅ៖ លើកកម្ពស់ជីវភាពរស់នៅសមរម្យ ថ្លៃថ្នូរ បង្កើតឱកាសការងារ និងបង្កើនផ លិតភាពរបស់កម្មករ និយោជិត។ ជម្រុញឲ្យមានបរិយាកាសវិនិយោគ និងធុរកិច្ចកាន់តែប្រសើរប្រកបដោយ ភាពទាក់ទាញ។ ជាងនេះ គោលដៅច្បាប់នេះមានគោលដៅ ធានាការកំណត់ប្រាក់ឈ្នួល អប្បបរ មាសម្រាប់ជនទាំងឡាយ ដែលស្ថិតនៅក្រោមបទប្បញ្ញត្តិ នៃច្បាប់ស្តីពីការងារ។ បង្កើតនីតិវិធីកំណត់ប្រាក់ឈ្នួល អប្បបរមាតាមបែបវិទ្យាសាស្ត្រ ដោយផ្អែកលើលក្ខណៈវិនិច្ឆ័យបែបសង្គម និងសេដ្ឋកិច្ច។
បង្កើតក្រុមប្រឹក្សាជាតិ ប្រាក់ឈ្នួលអប្បបរមា ដើម្បីជាយន្តការត្រីភាគីសម្រាប់សិក្សាស្រាវជ្រាវ និងផ្តល់អនុសាសន៍អំពីប្រាក់ឈ្នួលអប្បបរមា និងអត្ថប្រយោជន៍ផ្សេងៗ របស់ជនទាំងឡាយដែលស្ថិតនៅក្រោមបទប្បញ្ញត្តិ នៃច្បាប់ស្តីពីការងារ។ វិសាលភាព
ច្បាប់នេះមានវិសាលភាពគ្របដណ្ដប់លើសសហគ្រាស ឬគ្រឹះស្ថាន និងជនទាំងឡាយដែលស្ថិតនៅក្រោមបទប្បញ្ញត្តិ នៃច្បាប់ស្តីពីការងារ។ សេចក្តីព្រាងច្បាប់ស្តីពីប្រាក់ឈ្នួលអប្បបរមានេះ គឺជាសមិទ្ធផលថ្មីមួយទៀតក្នុងការអភិវឌ្ឍ ក្របខណ្ឌគតិយុត្ត ដើម្បីគាំទ្រការអនុវត្តយុទ្ធសាស្ត្រចតុកោណដំណាក់កាលទី៣ របស់រាជរដ្ឋាភិបាល នីតិកាលទី៥ នៃរដ្ឋសភា។ ការបង្កើតឲ្យមានក្របខណ្ឌគតិយុត្តមួយច្បាស់លាស់ ដើម្បីធានាដំណើរការ យន្តការ កំណត់ប្រាក់ឈ្នួល អប្បបរមា គឺពិតជាមានសារប្រយោជន៍ខ្លាំងណាស់ ក្នុងការធានាភាពសុខដុមរមនានៃទំនាក់ទំនងវិជ្ជាជីវៈ ក៏ដូចជាការលើកកម្ពស់កម្រិតជីវភាពរបស់កម្មករនិយោជិត ព្រមទាំងធានានូវស្ថិរភាព និរន្តភាព នៃវិស័យពាណិជ្ជកម្មអន្តរជាតិ និងការទាក់ទាញការវិនិយោគមកកម្ពុជា៕
ចែករំលែកព័តមាននេះ