រាជធានីភ្នំពេញ ៖ ប្រធានគណៈកម្មាធិការជាតិរៀបចំការបោះឆ្នោតលោក ស៊ិក ប៊ុនហុក បានស្នើដល់គ្រូបង្គោលប្រចាំរាជធានី-ខេត្ត តំណាងគណបក្សនយោបាយ និងតំណាងសង្គមស៊ីវិលត្រៀមឯកសារបណ្តុះបណ្តាលធ្វើការផ្សព្វផ្សាយដល់អ្នកបោះឆ្នោតដើម្បីងាយស្រួលអប់រំដល់អ្នកបោះឆ្នោត ។
ថ្លែងនៅក្នុងពិធីបិទវគ្គបណ្តុះបណ្តាលស្តីពីការ ឃោសនាបោះឆ្នោតសម្រាប់ការបោះឆ្នោតជ្រើសរើស តំណាងរាស្ត្រនីតិកាលទី៦ កាលពីរសៀលថ្ងៃទី៣១ ខែឧសភា ឆ្នាំ២០១៨ នៅក្រសួងមហាផ្ទៃលោក ស៊ិក ប៊ុនហុក បានឲ្យដឹងថា ការផ្សព្វផ្សាយឯកសារអប់រំសាធារណជនដូចជា ព្រះរាជសាររបស់ព្រះមហាក្សត្រ ស្ប៉តវិទ្យុ ស្ប៉តវិដេអូ Poster ខិតប័ណ្ណ សេចក្ដីអំពាវនាវនានា ត្រូវធ្វើឡើងឲ្យបានទូលំទូលាយដល់ពលរដ្ឋ នៅក្នុងរាជធានី-ខេត្តរៀងៗខ្លួន ធ្វើយ៉ាងណាឲ្យពលរដ្ឋយល់អំពីសារសំខាន់នៃការប្រើសិទ្ធិរបស់ពួកគាត់ក្នុងការសំដែងមតិតាមឆន្ទ:របស់ពួកគាត់ក្នុងការជ្រើសរើសតំណាងរបស់ពួកគាត់ ។
លោក ស៊ិក ប៊ុនហុក ប្រធានគណៈកម្មាធិការជាតិរៀបចំការបោះឆ្នោតបានបន្ថែមថា ប័ណ្ណព័ត៌មានអំពីអ្នកបោះឆ្នោតមានសារសំខាន់ណាស់សម្រាប់ប្រជាពលរដ្ឋដូចច្នេះតាមប្រតិទិនការចែកប័ណ្ណនេះត្រូវចាប់ផ្ដើមពីថ្ងៃទី៦ ខែមិថុនា ឆ្នាំ២០១៨ ខាងមុខនេះដើម្បីធ្វើយ៉ាងណាឲ្យពលរដ្ឋកាន់តែយល់ដឹងអំពីសារៈសំខាន់នៃការបោះឆ្នោតនេះ ។ ការបោះឆ្នោតជ្រើសរើសតំណាងរាស្ដ្រ អាណត្តិទី៦ នាថ្ងៃទី២៩ ខែកក្ដដា ឆ្នាំ២០១៨ ខាងមុខនេះមានគណបក្សនយោបាយចូលរួមចំនួន២០គណបក្ស និងអ្នកចូលរួមបោះឆ្នោតមានចំនួន ៨,៣៨០,២១៧នាក់ ៕
ចែករំលែកព័តមាននេះ