ខេត្តកណ្តាល ៖ សពបុរសម្នាក់ត្រូវបានអ្នកនេសាទត្រីប្រទះឃើញនៅក្រោមកំប្លោក និងមានលបដាក់គ្របពីលើមានសភាពហើមស្អុយទៅហើយ នៅក្នុងប្រឡាយទឹកមួយ កាលពីរសៀលថ្ងៃទី២៩ ខែឧសភា ក្នុងទំនប់៩៤ ភូមិប្រាសាទ ឃុំព្រែកស្លែង ស្រុកកណ្ដាលស្ទឹង ។សមត្ថកិច្ចសន្និដ្ឋានថា ករណីនេះជាអំពើឃាតកម្មដែលប្រព្រឹត្តដោយជនមិនស្គាល់មុខ ។
មន្ត្រីនគរបាលស្រុកកណ្ដាលស្ទឹងបានឱ្យដឹងថា ក្រោយពីទទួលព័ត៌មានពីការប្រទះឃើញសពភ្លាម ក៏បានបង្កើតគណៈកម្មការទៅពិនិត្យសពនៅកន្លែងកើតហេតុ ។ តាមការធ្វើកោសល្យវិច័យ គឺជនរងគ្រោះស្លាប់ប្រហែល៥ ទៅ៦ថ្ងៃមកហើយ មិនទាន់ស្គាល់អត្តសញ្ញាណ ទេ គឺជាបុរសម្នាក់មានអាយុចន្លោះពី៣០ទៅ៤០ឆ្នាំ ។ ប្រភពដដែលឲ្យដឹងទៀតថា តាមការបំភ្លឺរបស់បុរសឈ្មោះ ម៉ុក ស្រីុន គឺនៅវេលាម៉ោងប្រហែល១២ថ្ងៃត្រង់ថ្ងៃទី២៩ ឧសភា នោះ រូបគាត់និងឈ្មោះ ផន ផាត បានទៅបង់សំណាញ់នៅចំណុចខាងលើ ។ ពេលទៅដល់ ស្រាប់ប្រទះឃើញសពនៅក្នុងប្រឡាយទឹកដោយមានកំប្លោក និងលបដាក់ត្រីគ្របពីលើ ក៏រាយការណ៍ទៅសមត្ថកិច្ច ។
ស្ថានភាពសពគឺអត់មានពាក់អាវ ស្លៀកខោខូវប៊យជើងវែងពណ៌ខៀវ ខោទ្រនាប់ពណ៌ខ្មៅ ក្បាលមានស្នាមបែកនៅលើចិញ្ចើមខាងឆ្វេង តែមិនដល់ឆ្អឹង មានស្នាមជាំក្រោមថ្គាម ក្រោមទងត្រចៀក បាក់ឆ្អឹងថ្គាមផ្នែកខាងឆ្វេង បែកឆ្អឹងក្បាលជង្គង់(បែកអង្គញ់)ខាងស្ដាំ ស្នាមមុតដាច់លើក្បាលជង្គង់ ដោយការប៉ះទង្គិចនឹងវត្ថុរឹងមុខមុតដែលសង្ស័យកាំបិត ។ ជនរងគ្រោះមានកម្ពស់១,៦០ម៉ែត្រ នៅក្នុងហោប៉ៅអាវមានប្រាក់ក្រដាស៥០០០មួយសន្លឹក និងក្រដាស៥០០រៀល៣សន្លឹក ។
ក្រោយពេលពិនិត្យរួច សមត្ថកិច្ចបានប្រគល់សពជូនលោកមេឃុំកប់ រង់ចាំប្រកាសរកសាច់ញាតិមកទទួលយក ។ ដូច្នេះ ប្រសិនបើមានក្រុមគ្រួសារណាមានបាត់បងប្អូនដូចភិនភាគខាងលើ សូមធ្វើការទាក់ទងមកអធិការដ្ឋាននគរបាលស្រុកកណ្ដាលស្ទឹង ។ អ្នកតាមដាននិយាយថា បើអត្តសញ្ញាណសពត្រូវបានគេ
ស្គាល់នោះ ឃាតករក៏អាចរកឃើញនៅពេលក្រោយដែរ ៕
ចែករំលែកព័តមាននេះ