រាជធានីភ្នំពេញ ៖ កម្លាំងនាយកដ្ឋានស៊ើបអង្កេត និងអនុវត្តនីតិវិធីសហការជាមួយ និងកម្លាំងស្នងការនគរបាលខេត្តសៀមរាប កាលពីវេលាម៉ោង១១និង០៥នាទីព្រឹកថ្ងៃទី៣០ ខែឧសភា ឆ្នាំ២០១៨ ដោយមានការសម្របសម្រួលអំពីសំណាក់ព្រះរាជអាជ្ញាខេត្តសៀមរាបបានធ្វើការចាប់ឃាត់ខ្លួនបុរសជនជាតិអាមេរិកាំងម្នាក់ ពីបទរំលោភសេពសន្ធវៈទៅលើកក្មេងស្រីមិនទាន់គ្រប់អាយុម្នាក់…
រាជធានីភ្នំពេញ ៖ កម្លាំងនាយកដ្ឋានស៊ើបអង្កេត និងអនុវត្តនីតិវិធីសហការជាមួយ និងកម្លាំងស្នងការនគរបាលខេត្តសៀមរាប កាលពីវេលាម៉ោង១១និង០៥នាទីព្រឹកថ្ងៃទី៣០ ខែឧសភា ឆ្នាំ២០១៨ ដោយមានការសម្របសម្រួលអំពីសំណាក់ព្រះរាជអាជ្ញាខេត្តសៀមរាបបានធ្វើការចាប់ឃាត់ខ្លួនបុរសជនជាតិអាមេរិកាំងម្នាក់ ពីបទរំលោភសេពសន្ធវៈទៅលើកក្មេងស្រីមិនទាន់គ្រប់អាយុម្នាក់ ហើយរត់គេចមកលាក់ខ្លួននៅក្នុងប្រទេសកម្ពុជានោះ ។
តាមប្រភពព័ត៌មានពីនគរបាលអន្តោប្រវេសន៍បានប្រាប់ឱ្យដឹងថា បុរសដែលបានចាប់ឃាត់ខ្លួននេះមានឈ្មោះ GILBERT MICHAEL GREENWOOD អាយុ៦៣ឆ្នាំ មុខរបរជាភ្ញៀវទេសចរណ៍ កាន់លិខិតឆ្លងដែនលេខ៤៨៨០៤៣១៦០ ។
ដោយយោងទៅតាមសំណើររបស់កម្លាំងផ្នែកសន្តិសុខការទូតរបស់សហរដ្ឋអាមេរិកប្រចាំនៅប្រទេសកម្ពុជារបស់យើងនោះឲ្យធ្វើការស្រាវជ្រាវរកចាប់ខ្លួនបុរសជនជាតិអាមេរិកម្នាក់ខាងលើ ដែលបានប្រព្រឹត្តបទល្មើស ដោយបានធ្វើសកម្មភាពរំលោភទៅលើកុមារីម្នាក់ មិនទាន់គ្រប់អាយុ កាលពីពេលកន្លងទៅ នៅឯសហរដ្ឋអាមេរិកនោះ ។ ទើបក្នុងពេលនេះដែរកម្លាំងនាយកដ្ឋានស៊ើបអង្កេត និងអនុវត្តនីតិវិធីធ្វើការសហការជាមួយ និងកម្លាំងនគរបាលអន្តោប្រវេសន៍ខេត្តសៀមរាប ដោយមានការដឹកនាំអំពីសំណាក់ព្រះរាជអាជ្ញានៃអយ្យការអមសាលាដំបូងខេត្តសៀមរាបធ្វើការចាប់ឃាត់ខ្លួនបានតែម្តង ។
ក្រោយពីធ្វើការចាប់ឃាត់ខ្លួនបានបុរសជនជាតិអាមេរិកជាជនសង្ស័យម្នាក់ខាងលើដែលជាប់ចោទពីបទរំលោភលើអនិតិជននោះរួចហើយក៏បានបញ្ជូនខ្លួនមកកាន់អគ្គនាយកដ្ឋានអន្តោប្រវេសន៍នៃក្រសួងមហាផ្ទៃ ដើម្បីរង់ចាំធ្វើការបណ្តេញចេញ និងអនុវត្តន៍ទៅតាមនីតិវិធីច្បាប់របស់សហរដ្ឋអាមេរិកជាបន្តទៅទៀត ៕
ចែករំលែកព័តមាននេះ