រាជធានីភ្នំពេញ ៖ មកទល់ពេលនេះ អតីតកីឡាការិនីជើងខ្លាំងអ្នកនាង ចូវ សុធារ៉ា បានក្លាយជាគ្រូបង្វឹកផ្នែកចំបាប់ និងជាគ្រូបង្ហាត់មុខវិជ្ជាកីឡាប្រចាំវិទ្យាល័យប៊ុនរ៉ានីហ៊ុនសែនផ្សារដើមថ្កូវ ។ ប៉ុន្តែបើក្រឡេកទៅមើលអតីតកាល…
រាជធានីភ្នំពេញ ៖ មកទល់ពេលនេះ អតីតកីឡាការិនីជើងខ្លាំងអ្នកនាង ចូវ សុធារ៉ា បានក្លាយជាគ្រូបង្វឹកផ្នែកចំបាប់ និងជាគ្រូបង្ហាត់មុខវិជ្ជាកីឡាប្រចាំវិទ្យាល័យប៊ុនរ៉ានីហ៊ុនសែនផ្សារដើមថ្កូវ ។ ប៉ុន្តែបើក្រឡេកទៅមើលអតីតកាល អ្នកនាងគឺជាកីឡាការិនីដែលមានស្នាដៃមិនធម្មតាក្នុងពិភពកីឡា ជាពិសេសគឺការទទួលបានមេដាយពីការប្រកួតអន្តរជាតិរាប់មិនអស់មុនពេលចូលនិវត្តន៍ពីក្រុមជម្រើសជាតិ ផ្នែកកីឡាចំបាប់កាលពីខែកញ្ញា ឆ្នាំ២០១៦។
អ្នកនាង ចូវ សុធារ៉ា និយាយថា អ្នកនាងកើតថ្ងៃទី១០ ខែតុលា ឆ្នាំ១៩៨៣ នៅរាជធានីភ្នំពេញ ដោយនាងគឺជាកូនទី៥ក្នុងចំណោមបងប្អូន៦នាក់(ប្រុស៣នាក់ ស្រី៣នាក់)។ បន្ទាប់ពីរៀនចប់ថ្នាក់មធ្យមសិក្សាទុតិយភូមិនៅវិទ្យាល័យសន្ធរម៉ុក កាលពីឆ្នាំ២០០៥ អ្នកនាងបានបន្តការសិក្សារយៈពេល២ឆ្នាំ នៅនាយកដ្ឋានយុវជន និងកីឡា ហើយបានក្លាយជាគ្រូកីឡាក្របខ័ណ្ឌនៅវិទ្យាល័យប៊ុន រ៉ានី ហ៊ុន សែន ផ្សារដើមថ្កូវ ដែលមកទល់ពេលនេះអ្នកនាងបានក្លាយជាគ្រូបង្ហាត់កីឡានៅក្នុងសាលារដ្ឋប្រមាណជា១២ឆ្នាំហើយ។ អ្នកនាងបានអះអាងថា អ្នកនាងមានដំណើរដើមទងច្រើនដំណាក់កាលទម្រាំបានក្លាយជាកីឡាការិនីអាជីពកាលពីប៉ុន្មានឆ្នាំមុន ។ អ្នកនាងបានស្ម័គ្រចិត្តចូលហាត់កីឡាយូដូ កាលពីវ័យ១៤ឆ្នាំ ដោយក្នុងពេលនោះមានការណែនាំពីគ្រូនៅសាលារដ្ឋរបស់អ្នកនាង បន្ទាប់ពីអ្នកនាងក៏ត្រូវគេកត់សម្គាល់ថាមានចំណូលចិត្តផ្នែកកីឡាក្នុងពេលសិក្សា ។
អ្នកនាងបានប្រឡូកក្នុងអាជីពជាសិស្សយូដូប្រមាណ៣ឆ្នាំ ដោយក្នុងអំឡុងពេលនោះ អ្នកនាងទទួលបានខ្សែក្រវាត់១ដាន់ ទទួលបានមេដាយសំរឹទ្ធ១ក្នុងប្រភេទទម្ងន់៤៥គីឡូក្រាម និងមេដាយមាសផ្នែកយូដូកាតា១គ្រឿង។ ដោយសារតែអ្នកនាងមានស្នាដៃទាំងនោះហើយ ទើបអ្នកនាងត្រូវបានលោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា ស្នើឱ្យអ្នកនាងប្ដូរអាជីពពីកីឡាយូដូ ទៅហាត់ចំបាប់វិញ ដោយបានទាំងផ្ដល់ឱកាសនាងបានក្លាយជាកីឡាការិនីជម្រើសជាតិទៀតផង ។
អ្នកនាងទទួលការបង្ហាត់បង្រៀនយ៉ាងផ្ចិតផ្ចង់ពីគ្រូបង្វឹក ហើយក្នុងរយៈពេលខ្លីប៉ុណ្ណោះ អ្នកនាងក៏បានចូលប្រកួតក្នុងព្រឹត្តិការណ៍នានាហើយដណ្ដើមបានមេដាយជាច្រើនក្នុងការប្រកួតថ្នាក់ជាតិទៀតផង ។ ខាងក្រោមនេះជាស្នាដៃគួរកត់សម្គាល់របស់នាងមុនពេលចូលនិវត្តិន៍ពីក្រុមជម្រើសជាតិ ៖
– ក្នុងឆ្នាំ២០០៣ នាងត្រូវបានបញ្ជូនឱ្យទៅចូលរួមប្រកួតនៅក្នុងព្រឹត្តិការណ៍ស៊ីហ្គេម
ប្រទេសវៀតណាមជាលើកដំបូង ដោយទទួលបានមេដាយសំរឹទ្ធ និងប្រាក់រង្វាន់៥០ម៉ឺនរៀល។
– ក្នុងឆ្នាំ២០០៣ដដែល អ្នកនាងក៏ត្រូវបានបញ្ជូនឱ្យចេញប្រកួតនៅក្នុងប្រទេសបារាំង ក្នុងចំណោមបណ្ដាប្រទេសនិយាយភាសាបារាំងទាំងអស់ ដោយការប្រកួតចំបាប់ពេលនោះ អ្នកនាងដណ្ដើមបានមេដាយសំរឹទ្ធ។
– ក្នុងឆ្នាំ២០០៥ អ្នកនាងត្រូវបានបញ្ជូនឱ្យទៅចូលរួមប្រកួតកីឡាស៊ីហ្គេមនៅប្រទេសហ្វីលីពីន ដោយក្នុងពេលនោះអ្នកនាងដណ្ដើមបានមេដាយសំរឹទ្ធក្នុងប្រភេទទម្ងន់៤៨គីឡូក្រាម និងទទួលប្រាក់រង្វាន់លើកទឹកចិត្តប្រមាណជាង២ពាន់ដុល្លារ។
- ក្នុងឆ្នាំ២០០៩ អ្នកនាងចេញប្រកួតកីឡាស៊ីហ្គេមជាថ្មីម្ដងទៀតនៅប្រទេសឡាវ ដោយដណ្ដើមបានមេដាយមាស និងទទួលបានប្រាក់រង្វាន់លើកទឹកចិត្តចំនួនជាង៦ពាន់ដុល្លារ។ ការទទួលបានមេដាយមាសនេះ ធ្វើឱ្យអ្នកនាងក្លាយជាកីឡាការិនីល្បីល្បាញ និងមានកេរ្តិ៍ឈ្មោះកាន់តែខ្ទរខ្ទារនៅក្នុងវិស័យចំបាប់។
- ក្នុងឆ្នាំ២០១០ អ្នកនាងចេញប្រកួតក្នុងព្រឹត្តិការណ៍កីឡាអាស៊ីនៅប្រទេសចិន ហើយទទួលបានចំណាត់ថ្នាក់លេខ៥ក្នុងចំណោមប្រទេសជាច្រើនដែលចូលរួមប្រកួត។
- ក្នុងឆ្នាំ២០១៣ អ្នកនាងដណ្ដើមបានមេដាយមាសជាថ្មីម្ដងទៀតនៅក្នុងព្រឹត្តិការណ៍កីឡាស៊ីហ្គេមនៅប្រទេសមីយ៉ាន់ម៉ា ដោយការប្រកួតពេលនោះក្នុងប្រភេទទម្ងន់៤៤គីឡូក្រាម ដែលជាគីឡូស្រាល ។ អ្នកនាងចូវ សុធារ៉ា និយាយថា បើការប្រកួតក្នុងស្រុកវិញ គឺអាចនិយាយបានថាទទួលបានពាន និងមេដាយរាប់មិនអស់។
អ្នកនាងបានប្រកាសសុំឈប់ពីកីឡាការិនីជម្រើសជាតិនៅអំឡុងខែកញ្ញា ឆ្នាំ២០១៦ ក្រោយពីបញ្ចប់ការប្រកួតនៅក្នុងព្រឹត្តិការណ៍អូឡាំពិកនៅប្រេស៊ីល បន្ទាប់ពីអ្នកនាងយល់ថា ខ្លួនក៏មានវ័យចាស់មិនអាចបន្តធ្វើជាកីឡាការិនីបានល្អដូចមុន ។ អ្នកនាងបានជាប់ជាគ្រូជម្រើសជាតិប្រចាំសហព័ន្ធចំបាប់កម្ពុជាដោយការលាឈប់ពីកីឡាការិនី ដោយក្នុងពេលនេះ អ្នកនាងទទួលបានការងារជាអ្នកបង្វឹកដល់សិស្សនៅក្នុងសហព័ន្ធស្ទើររកពេលសម្រាកមិនបាន ។ អ្នកនាងទើបតែបានរៀបការកាលពីពេលថ្មីៗក្នុងប៉ុន្មានខែមុននេះ ដោយស្វាមីរបស់អ្នកនាងក៏ជាអ្នកមានការងារធ្វើ និងមានមុខមាត់នៅក្នុងសង្គមផងដែរ ។
អ្នកនាងថា ខ្លួនមិនចោលអាជីពកីឡានោះទេ ទើបចាប់អាជីពជាគ្រូកីឡានៅសាលារដ្ឋផង និងជាគ្រូចំបាប់នៅក្នុងសហព័ន្ធផង ហើយអ្នកនាងក៏ជាអ្នកដឹកនាំអត្តពលិកចេញប្រកួតនៅក្រៅប្រទេសដើម្បីដណ្ដើមមេដាយយកមកជូនជាតិផងដែរ៕
ចែករំលែកព័តមាននេះ