រាជធានីភ្នំពេញ ៖ អាជីវករនាំចូលម៉ូតូជជុះពីប្រទេសជប៉ុន កំពុងត្អូញត្អែរពីការធ្លាក់ចុះនូវការលក់ម៉ូតូជជុះយ៉ាងខ្លាំងក្នុងរយៈពេលប៉ុន្មានឆ្នាំចុងក្រោយនេះ ដោយសារម៉ូតូនាំចូលថ្មី និងការដំឡើងក្នុងស្រុកកើនឡើង និងមានតម្លៃប្រហាក់ប្រហែលប្រកួតប្រជែង ។
លោក អួន ចាន់លី អ្នកលក់ម៉ូតូនៅឃ្លាំងរំសេវ សង្កាត់ទឹកល្អក់៣ ខណ្ឌទួលគោក បានឲ្យកាលពីព្រឹកថ្ងៃទី២៣ ឧសភា ថា លោកបានចាប់ផ្តើមលក់ម៉ូតូជជុះរយៈពេលប្រមាណ២០ឆ្នាំមកហើយ ប៉ុន្តែក្នុងប៉ុន្មានឆ្នាំចុងក្រោយនេះ ការលក់បានធ្លាក់ចុះខ្លាំង ។ បើគិតចាប់ពីឆ្នាំ២០០៧ ដល់ឆ្នាំ២០១៨នេះ ទីផ្សារម៉ូតូជជុះបានថយចុះចន្លោះពី៧០ទៅ៨០% ។
លោកបន្តថា ៖ « ការថយចុះនេះ ដោយសារអ្នកប្រើប្រាស់ប្តូរទៅប្រើម៉ូតូថ្មីច្រើនជាង ហើយប្រជាជនកាន់តែយល់ដឹងជាងមុនទាក់ទងនឹងការប្រើប្រាស់យានយន្ត » ។
អ្នកលក់ម៉ូតូនៅឃ្លាំងលេខ៣១ ស្ថិតក្នុងតំបន់ដូចគ្នា គ្រាន់តែប្រាប់ថា ឈ្មោះឃាង បានលើកឡើងស្រដៀងគ្នាថា កាលពីពេលកន្លងទៅ ក្នុងឃ្លាំងរបស់លោក អាចលក់ម៉ូតូចេញបានប្រមាណ៥គ្រឿងក្នុង១ថ្ងៃ ប៉ុន្តែសព្វថ្ងៃនេះ អាចលក់ចេញបានតែ១គ្រឿងប៉ុណ្ណោះក្នុងរយៈពេល៥ថ្ងៃ ។
លោកបន្តថា ៖« ការប្រកួតប្រជែងពីម៉ូតូនាំចូលថ្មីៗ និងមានការផ្សព្វផ្សាយពាណិជ្ជកម្ម បានទាក់ទាញអ្នកទិញម៉ូតូឲ្យចាប់អារម្មណ៍កាន់តែច្រើនលើផលិតផលថ្មី » ។ លោកបន្តថា ៖« អាជីវកម្មរបស់ពួកយើងជាអាជីវកម្មបែបប្រពៃណី យើងគ្មានលុយសម្រាប់ផ្សព្វផ្សាយពាណិជ្ជកម្មដូចគេទេ » ។
ទោះជាយ៉ាងណា លោក សុខ ម៉េង ប្រជាពលរដ្ឋរស់នៅក្នុងខេត្តកណ្តាល និងបានមកទិញម៉ូតូជជុះយកទៅប្រើប្រាស់សម្រាប់ដឹកទំនិញ បានឲ្យដឹងថា ក្នុងគ្រួសាររបស់លោកនៅតែប្រើប្រាស់ និងជឿជាក់លើគុណភាពម៉ូតូជជុះនេះ បន្ទាប់ពីលោកបានប្រើប្រាស់អស់រយៈពេលប្រមាណ១០ឆ្នាំមកឃើញថា ម៉ូតូជជុះពិតជាមានគុណភាពល្អ ជាពិសេស តម្លៃម៉ូតូអាចទទួលយកបាន ។
លោកបន្តថា ៖« លោកទុកចិត្តម៉ូតូជជុះថាមានគុណភាពល្អជាងម៉ូតូថ្មី ព្រោះវាធន់ក្នុងការដឹកជញ្ជូនធ្ងន់ៗ និងធានាការប្រើប្រាស់បានរយៈពេលយូរផងដែរ » ។
យោងតាមរបាយការណ៍របស់អង្គភាពចុះបញ្ជីទោចក្រយានយន្ត នៃមន្ទីរសាធារណការ និងដឹកជញ្ជូនរាជធានីភ្នំពេញបានឲ្យដឹងថា គិតចាប់ពីឆ្នាំ២០០០ រហូតដល់ឆ្នាំ២០១៧ ការចុះបញ្ជីមធ្យោបាយយានជំនិះ រួមមាន ម៉ូតូ ម៉ូតូកង់បី និងម៉ូតូសណ្តោងរ៉ឺម៉ក មានចំនួនប្រមាណ១លាន៣សែនគ្រឿង ៕
ចែករំលែកព័តមាននេះ