ក្រោយបាត់មុខអស់រយៈពេល១២ឆ្នាំរួចមក ទុយនីស៊ី ក៏បានវិលមក World Cup សាជាថ្មី ប៉ុន្តែការបោះពួយមុនមកដល់វគ្គនេះ ពួកគេនៅតែមិនសូវរឹងមាំដដែល ។ វាជាការបង្ហាញខ្លួនលើកទី៥របស់ក្រុមជម្រើសជាតិមកពីទ្វីបអាហ្រិ្វកមួយនេះ ចាប់តាំងពីពួកគេចូលរួមប្រកួតលើកដំបូងនៅឆ្នាំ១៩៧៨ តែខកខានវិញអស់ជាច្រើនរដូវកាលរហូតដល់ឆ្នាំ១៩៩៨, ២០០២ និង២០០៦ ។
ទោះជាយ៉ាងណា វត្តមានទាំង៤លើកកន្លងមកនេះ ទុយនីស៊ីពុំធ្លាប់ឆ្លងផុតវគ្គចែកពូលនោះទេ ។ បច្ចុប្បន្ន ទុយនីស៊ីកំពុងស្ថិតនៅចំណាត់ថ្នាក់លេខ១៤ ក្នុងតារាង FIFA ដែលនេះបញ្ជាក់ថា សមត្ថភាព និងទម្រង់លេងរបស់ពួកគេមានការរីកចម្រើនខ្លាំងជាងមុន ស្របពេលដែលការប្រកួតជម្រុះបឋមក្នុងតំបន់កន្លង ទៅ ពួកគេធ្វើបានយ៉ាងល្អ និងស្ថិតនៅកំពូលតារាងទៀតផង ។
ក្តីរំពឹង ៖ ក្រុមជម្រើសជាតិទុយនីស៊ី ពុំមានកីឡាករណាម្នាក់លេចធ្លោលើឆាកអន្តរជាតិនោះទេ ប៉ុន្តែកម្លាំងសាមគ្គីភាពរបស់កូនក្រុមនីមួយៗ គឺជាទ័ពស្រួចដ៏គ្រោះថ្នាក់សម្រាប់គូប្រកួត ។ ពួកគេមិនរំពឹងថានឹងអាចឆ្លងដល់វគ្គផ្តាច់ព្រ័ត្រឡើយ ប៉ុន្តែប្រសិនបើមានឱកាសលេងនៅវគ្គ១៦ក្រុម វាគឺជាជ័យជម្នះដ៏ធំធេងក្នុងប្រវត្តិសាស្ត្រ ។ នៅពូលG វគ្គចែកពូល៣២ក្រុមនេះ ទុយនីស៊ីហាក់កំពុងស្ថិតនៅពូលមរណៈនៃកំណត់ត្រាចាស់ដដែល ដោយសារតែត្រូវប្រឈមជាមួយអង់គ្លេស បែលហ្ស៊ិក និងប៉ាណាម៉ា ។
គ្រូបង្វឹក ៖ ក្រោយសម្លឹងឃើញសមត្ថភាពដឹកនាំដ៏ប៉ិនប្រសប់របស់លោក Nabil Maaloul រួចមក ទុយនីស៊ីក៏សម្រេចជ្រើសតាំងជាគ្រូបង្គោលក្រុមជម្រើសជាតិខ្លួនកាលពីឆ្នាំ២០១៧ ។ ក្រោមចំណាត់ការគ្រូបង្វឹកវ័យ៥៥ឆ្នាំរូបនេះ ទុយនីស៊ីក៏មានកៅអីលេង World Cup ជាថ្មីម្តងទៀត ។ លោក Nabil Maaloul ទើបតែបានដឹកនាំទុយនីស៊ីតែ៧លើកប៉ុណ្ណោះ ដោយឈ្នះ៥ប្រកួត និងស្មើ២ប្រកួត ។
កីឡាករ Super Star ប្រចាំក្រុម ៖ ខ្សែបម្រើប្រយុទ្ធ Youssef Msakni បានដើរតួយ៉ាងសំខាន់អំឡុងប្រកួតជម្រុះនាពេលកន្លងមក ។ កីឡាករវ័យ២៧ឆ្នាំរូបនេះ ក៏ជាអ្នកស៊ុត៣គ្រាប់ម្នាក់ឯងក្នុងជំនួបក្រៅផ្ទះប៉ះហ្គីណេផងដែរ ដែលជួយទុយនីស៊ីឈ្នះការប្រកួតចុងក្រោយវគ្គជម្រុះក្នុងតំបន់ ។ វត្តមាននៅក្រុមជម្រើសជាតិ៤៧ប្រកួតចាប់តាំងពីឆ្នាំ២០១០មក Youssef Msakni ស៊ុតបាន៩គ្រាប់ ខណៈបង្ហាញខ្លួន២២លើកនៅក្លិប Al-Duhail ស៊ុតបាន២៥គ្រាប់ ។
បញ្ជីឈ្មោះសមាសភាពកីឡាករសរុប(បណ្តោះអាសន្ន) ៖
-អ្នកចាំទី ៖ ប្រធានក្រុម Aymen Mathlouthi (Al-Batin), Ben Cherifia (Espérance), Ben Mustapha (Al-Shabab), Mouez Hassen (Châteauroux) ។
-ខ្សែការពារ ៖ Ali Maâloul (Al Ahly),
Ben Youssef (Kasımpaşa), Khalil Chemmam (Espérance), Yassine Meriah (Sfaxien), Hamdi Nagguez (Zamalek), Rami Bedoui (Étoile du Sahel), Oussama Haddadi (Dijon), Bilel Mohsni (Dundee United), Dylan Bronn (Gent), Benalouane (Leicester) ។
-ខ្សែបម្រើ ៖ Wahbi Khazri (Rennes), Amine Ben Amor (Al-Ahli), Naïm Sliti (Dijon), Mohamed Larbi (Tour), Eddine Khaoui (Troyes), Ellyes Skhiri (Montpellier), Bassem Srarfi (Nice), Karim Laribi (Cesena) ។
-ខ្សែប្រយុទ្ធ ៖ Youssef Msakni (Al-Duhail ), Saber Khalifa (Club Africain), Ben Youssef (Al-Ettifaq), Ahmed Akaïchi (Al-Ittihad), Anice Badri (Espérance) ៕
ចែករំលែកព័តមាននេះ