រៀបចំផែនការរក្សាសន្តិសុខសណ្តាប់ធ្នាប់ ក្នុងការបោះឆ្នោតខាងមុខនេះ

ថ្ងៃទី ៣០ ខែ ឧសភា ឆ្នាំ ២០១៨
ម៉ោង ២០:៣៧
ចន ណារិទ្ធ

រាជធានីភ្នំពេញ ៖ គណៈបញ្ជាការឯកភាពរាជធានីភ្នំពេញ នៅរសៀលថ្ងៃទី៣០ ឧសភា ២០១៨នេះ បានបើកកិច្ចប្រជុំ ដើម្បីពង្រឹងសន្តិសុខសុវត្ថិភាពជូនប្រជាពលរដ្ឋ ការពង្រឹងលើការរៀបចំសណ្តាប់ធ្នាប់សាធារណៈនៅលើផ្លូវធំៗទាំង១១ខ្សែ ពិសេសគឺផ្តោតសំខាន់លើកិច្ចការពារសន្តិសុខ សុវត្ថិភាពក្នុងការបោះឆ្នោត ដែលនឹងប្រព្រឹត្តទៅនាពេលខាងនេះ។ កិច្ចប្រជុំនេះធ្វើឡើងក្រោមអធិបតីភាពលោក ឃួង ស្រេង ប្រធានគណៈបញ្ជាការឯកភាពរាជធានីភ្នំពេញ ដោយមានការចូលរួមពីអភិបាលរងរាជធានី អភិបាលខណ្ឌទាំង១២, លោក រ័ត្ន ស្រ៊ាង មេបញ្ជាការកងរាជអាវុធហត្ថរាជធានីភ្នំពេញ លោក ជួន សុវណ្ណស្នងការរាជធានីភ្នំពេញ អភិបាលខណ្ឌទាំង១២ និងមន្ត្រីក្រោមឱវាទជាច្រើនរូបទៀត។

លោក ឃួង ស្រេង បានលើកឡើងថា កិច្ចប្រជុំនេះដើម្បីពង្រឹងបន្ថែមទៅលើបញ្ហាកិច្ចការពារសន្តិសុខ សុវត្ថិភាពជូនប្រជាពលរដ្ឋនៅក្នុងរាជធានីភ្នំពេញឲ្យកាន់តែប្រសើរឡើង និងការផ្ទៀងផ្ទាត់ឡើងវិញ ជុំវិញលើការរៀបចំសណ្តាប់ធ្នាប់សាធារណៈនៅលើផ្លូវធំៗទាំង១១ខ្សែ ដែលរដ្ឋបាលរាជធានីភ្នំពេញបានដាក់ចេញជាផែនការជាអាទិភាពនាពេលកន្លងមកនេះ។ លោក ជួន សុវណ្ណ ស្នងការនគរបាលរាជធានីភ្នំពេញ បានរាយការណ៍អំពីផែនការដើម្បីត្រៀមការពារសន្តិសុខ សុវត្ថិភាព សណ្តាប់ធ្នាប់ ក្នុងការបោះឆ្នោតជ្រើសរើសតំណាងរាស្ត្រនីតិកាលទី៦ នៅក្នុងរាជធានីភ្នំពេញ។

ចំណែកឯ លោកអភិបាលខណ្ឌទាំង១២ ក៏បានលើកឡើងពីសភាពការណ៍ចោរ លួច ឆក់ ប្លន់ ល្បែងស៊ីសងនៅក្នុងមូលដ្ឋានរបស់ខ្លូននីមួយៗផងដែរ ដើម្បីរួមគ្នារិះរកវិធីធ្វើយ៉ាងណាឲ្យភូមិសង្កាត់មានសុវត្ថិភាព និងផ្តល់ភាពកក់ក្តៅជូនប្រជាពលរដ្ឋតែម្តង៕