ខេត្តបាត់ដំបង៖ បុរសម្នាក់ត្រូវខ្សែចរន្តអគ្គិសនីឆក់ស្លាប់ កាលពីវេលាម៉ោង១រសៀលថ្ងៃទី៣០ ឧសភា នេះ ខណ:កំពុងរៀបចំផ្សាដែកធ្វើពិដានផ្ទះមួយកន្លែងនៅក្នុងភូមិដូង ឃុំបឹងរាំង ស្រុកកំរៀង ។ មន្ត្រីមូលដ្ឋានបានឱ្យដឹងថា…
ខេត្តបាត់ដំបង៖ បុរសម្នាក់ត្រូវខ្សែចរន្តអគ្គិសនីឆក់ស្លាប់ កាលពីវេលាម៉ោង១រសៀលថ្ងៃទី៣០ ឧសភា នេះ ខណ:កំពុងរៀបចំផ្សាដែកធ្វើពិដានផ្ទះមួយកន្លែងនៅក្នុងភូមិដូង ឃុំបឹងរាំង ស្រុកកំរៀង ។
មន្ត្រីមូលដ្ឋានបានឱ្យដឹងថា ជនរងគ្រោះឈ្មោះទឹម ហៀង ភេទប្រុស អាយុ៣៤ឆ្នាំ ជាជាងសំណង់ រស់នៅភូមិដូង ឃុំបឹងរាំង ស្រុកកំរៀង ។ បើតាមមន្ត្រីដដែលបញ្ជាក់ថា ដំបូងជនរងគ្រោះ គ្រាន់តែរងរបួសធ្ងន់ លុះពេលក្រុមជាងព្យាយាមដឹកទៅកាន់មណ្ឌលសុខភាព ជនរងគ្រោះក៏ដាច់ខ្យល់ស្លាប់តែម្ដង។
ក្រុមជាងសំណង់ដែលធ្វើការជាមួយគ្នាបាននិយាយថា ដំបូង ជនរងគ្រោះបានអូសខ្សែភ្លើងឡើងលើ
រន្ទាដែកពិដាន ដើម្បីផ្សាដែក ស្រាប់តែតំណខ្សែត្រង់ឌុយប៉ះនឹងដែកទើបឆក់តែម្ដង ។ កម្មករដដែលបានបញ្ជាក់ថា ពេលឆក់ភ្លាមជនរងគ្រោះបានរងរបួសធ្ងន់ហើយក្រុមជាងបានព្យាយាមដឹកទៅកាន់មណ្ឌលសុខភាពភ្លាមៗដែរ តែអកុសលពេលបញ្ជូនដល់ពាក់កណ្ដាលផ្លូវជនរងគ្រោះក៍ដាច់ខ្យល់ស្លាប់តែម្ដងទៅ។
សមត្ថកិច្ចក៏បានចុះទៅកាន់កន្លែងកើតហេតុដើម្បីពិនិត្យកន្លែងកើតហេតុ និងពិនិត្យសាកសពជនរងគ្រោះ។ សមត្ថកិច្ចបាននិយាយថា ករណីនេះបានកើតឡើងដោយសារការធ្វេសប្រហែសរបស់ក្រុមជាងទាំងនោះដែលមិនបានពិនិត្យខ្សែភ្លើងមុនពេលធ្វើការងារទើបបណ្ដាលឲ្យមានគ្រោះថ្នាក់ដល់ជីវិតបែបនេះ។ ទោះយ៉ាងណាមន្ត្រីជំនាញបានធ្វើកំណត់ហេតុប្រគល់សពជនរងគ្រោះជូនក្រុមគ្រួសារធ្វើបុណ្យតាមប្រពៃណីហើយ ក្រោយពេលបញ្ចប់ការសាកសួរនិងធ្វើកំណត់ហេតុ៕
ចែករំលែកព័តមាននេះ