ខេត្តសៀមរាប ៖ ទីបំផុត ឃាតករដៃដល់ត្រូវបានកងរាជអាវុធហត្ថខេត្ត ដឹកនាំដោយលោកវរសេនីយ៍ឯក ស្រី យូរ៉ា មេបញ្ជាការរងទទួលការងារយុត្តិធម៌ សហការជាមួយកងរាជអាវុធហត្ថលើផ្ទៃប្រទេស កងរាជអាវុធហត្ថរាជធានីភ្នំពេញ…
ខេត្តសៀមរាប ៖ ទីបំផុត ឃាតករដៃដល់ត្រូវបានកងរាជអាវុធហត្ថខេត្ត ដឹកនាំដោយលោកវរសេនីយ៍ឯក ស្រី យូរ៉ា មេបញ្ជាការរងទទួលការងារយុត្តិធម៌ សហការជាមួយកងរាជអាវុធហត្ថលើផ្ទៃប្រទេស កងរាជអាវុធហត្ថរាជធានីភ្នំពេញ និងកងរាជអាវុធហត្ថខណ្ឌច្បារអំពៅ ចាប់ខ្លួនបានហើយ ។
ការចាប់ខ្លួននេះ ជាការអនុវត្តដីកាបញ្ជាឱ្យចូលខ្លួនដែលចេញដោយលោក កើត វណ្ណារ៉េតព្រះរាជអាជ្ញាអមសាលាដំបូងខេត្ត ចុះថ្ងៃទី២១ ខែឧសភា ឆ្នាំ២០១៨ ។ ជនសង្ស័យជាឃាតករនេះ ត្រូវបានចាប់ខ្លួន កាលពីវេលាម៉ោង៦ព្រឹកថ្ងៃទី២៩ ខែឧសភា នៅបរិវេណក្រុមហ៊ុនស្រ៊ុនមុំ ក្នុងភូមិបឹងឈូក សង្កាត់និរោធ ខណ្ឌច្បារអំពៅ រាជធានីភ្នំពេញ ។ ក្រោយពីចាប់ខ្លួន ក៏បញ្ជូនទៅការិយាល័យជំនាញដើ ម្បីសាកសួរ រួចបញ្ជូនបន្តទៅសាលាដំបូងខេត្ត ។
លោកវរសេនីយ៍ត្រី អ៊ុយ ចយ នាយការិយាល័យបទល្មើសព្រហ្មទណ្ឌកងរាជអាវុធហត្ថខេត្តបានឱ្យដឹងថា ជនសង្ស័យនេះ ក្រោយពីសម្លាប់ស្រីសេ្នហ៍របស់ខ្លួននៅស្រុកស្រីស្នំរួចមក ក៏គេចទៅសម្ងំលាក់ខ្លួននៅខេត្តកណ្តាល ខេត្តកំពត ខេត្តតាកែវ ក្រុងព្រះសីហនុ និងខេត្តកោះកុង ហើយសមត្ថកិច្ចបានតាមរហូតអស់រយៈពេលកន្លះខែ ទើបចាប់ខ្លួនបាននៅរាជធានីភ្នំពេញ ។
លោកនាយការិយាល័យបញ្ជាក់ថា ជនសង្ស័យឈ្មោះ ម៉ៅ សុខថៃ ភេទប្រុស អាយុ២៦ឆ្នាំ ជាអ្នកបើកបររថយន្តកងវិស្វកម្ម មានទីលំនៅក្នុងឃុំបន្ទាយដែក ស្រុកកៀនស្វាយ ខេត្តកណ្តាល ។ ចំណែកនារីរងគ្រោះជាសង្សារដែលជននេះ សម្លាប់ឈ្មោះ ស៊ុន ស្រីនាង អាយុ២៦ឆ្នាំ មានស្រុកកំណើតនៅភូមិមណ្ឌល៣ សង្កាត់ស្លក្រាម ក្រុងសៀមរាប បច្ចុប្បន្នស្នាក់នៅក្នុងភូមិជ្រោយនាងងួន ឃុំជ្រោយនាងងួន ស្រុកស្រីស្នំ ខេត្តសៀមរាប ជានារីបម្រើការនៅខារ៉ាអូខេយីហោ«កម្សាន្តរីករាយ» ។
ក្រោយពីសម្លាប់រូបនាងជាសង្សាររួច ជនសង្ស័យបានយកសពនាងទៅប្លុងចោលនៅខាងត្បូងជាប់ជើងភ្នំតាប៉ែន ខាងកើតភូមិដំណាក់ដំរីប្រមាណ៥០០ម៉ែត្រ ក្នុងឃុំស្លែងស្ពាន ស្រុកស្រីស្នំ ។ មូលហេតុនៃការសម្លាប់នារីជាសង្សារ ត្រូវបានជនសង្ស័យឆ្លើយថា ដោយសារខ្លួនខឹងនឹងនាងដែលសុំទៅនៅជាមួយ ខណៈដឹងថា ខ្លួនត្រូវផ្លាស់ប្ដូរការដ្ឋានទៅធ្វើនៅស្រុកអូរជ្រៅ ខេត្តបន្ទាយមានជ័យ ។
តាមការសារភាពពីមូលហេតុនៃការសម្លាប់ គឺជនបាតដៃប្រឡាក់ឈាមនេះ យកនាងជាសង្សារគ្រាន់តែជិះក្របីចម្លងភក់ប៉ុណ្ណោះ លុះនាងតាមស្អិតបែបនេះក៏សម្លាប់តែម្តង ហើយយកសពទៅប្លុងចោលដោយស្មានថា គ្មានអ្នកណាដឹង ។ ប៉ុន្តែការពិត ដោយសារតែអត្តសញ្ញាណនារីរងគ្រោះត្រូវបានគេស្គាល់ ទើបដឹងថានាងមានទំនាក់ទំនងស្នេហាជាមួយឃាតកររូបនេះ ដូច្នេះហើយទើបសមត្ថកិច្ចស្រង់ក្លិននិងតាមប្រមាញ់ដោយស្រមោលអន្ទោលតាមប្រាណបែបនេះ ។
គួររំលឹកថា កាលពីវេម៉ោង៦ព្រឹកថ្ងៃទី១៤ខែឧសភាកន្លងទៅ នៅខាងត្បូងជាប់ជើងភ្នំតាប៉ែន ខាងកើត
ភូមិដំណាក់ដំរីចម្ងាយប្រមាណ៥០០ម៉ែត្រ ក្នុងឃុំស្លែងស្ពាន ស្រុកស្រីស្នំ គេបានប្រទះឃើញសពស្ត្រីរងគ្រោះត្រូវគេយកទៅប្លុងចោលនៅទីនោះ ។ ជនសង្ស័យ ត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងខេត្តនាសៀលថ្ងៃទី២៩ ខែឧសភា ៕
ចែករំលែកព័តមាននេះ