ខេត្តបាត់ដំបង ៖ បើតាមសេចក្ដីរាយការណ៍បឋមបានឲ្យដឹងថា អគ្គិភ័យបានឆាបឆេះយ៉ាងសន្ធោសន្ធៅលេបត្របាក់អគារការិយាល័យមួយខ្នងរបស់យោធានៅក្នុងកងពលលេខ៥៣ មានទីតាំងស្ថិតនៅភូមិកំប្រង់ ឃុំតាក្រី ស្រុកកំរៀង កាលពីម៉ោងជាង៧ព្រឹក ថ្ងៃទី៣០ ឧសភា ដែលគេសង្ស័យថា បណ្ដាលមកពីការទុស្សេខ្សែភ្លើង។
បើតាមព័ត៌មានបឋមដែលទទួលបានមុននេះថា គឺអគ្គិភ័យនោះបានឆេះអគារការិយាល័យទី៥ នៅក្នុងបន្ទាយកងពលលេខ៥៣។ ភ្លាមៗនោះគេមិនទាន់ឃើញមានការជួយអន្តរាគមន៍ពីរថយន្តពន្លត់អគ្គិភ័យរបស់អង្គភាពនគរបាលនៅឡើយទេ ខណៈពេលអគ្គិភ័យកំពុងឆាបឆេះកាន់តែខ្លាំង។ នេះដោយសារតែមូលដ្ឋានយោធាដែលកើតហេតុនេះស្ថិតនៅឆ្ងាយ ទើបរថយន្តពន្លត់អគ្គិភ័យពីតាមបណ្ដាស្រុកឬ ខេត្តពិបាកក្នុងការជួយអន្តរាគមន៍។
ម្យ៉ាងវិញទៀតកម្លាំងយោធាដែលនៅក្នុងបន្ទាយក៏មិនហ៊ានចូលជិតដែរ ព្រោះនៅក្នុងការិយាល័យដែលឆាបឆេះនោះមានអាវុធ និងគ្រាប់កាំភ្លើងផង។ ហើយបើតាមការសន្និដ្ឋានជាបឋម គេសង្ស័យអគ្គិភ័យនោះបណ្ដាលមកពីការទុស្សេខ្សែភ្លើង ប៉ុន្តែគេមិនទាន់ដឹងអំពីសម្ភារៈដែលខូចខាតនៅឡើយទេ តែបើតាមប្រភពពីមន្ត្រីនៅទីនោះថា មានការខូចខាតច្រើនណាស់ ក្នុងនោះមានទាំងអាវុធ និងរថយន្តផងដែរ។
ទោះយ៉ាងណាក៏ដោយ ពេលនេះសមត្ថកិច្ចកំពុងចុះជួយអន្តរាគមន៍ហើយ តែទំនងគ្មានសេសសល់អ្វីទេ៕
ចែករំលែកព័តមាននេះ