រាជធានីភ្នំពេញ ៖ គណៈកម្មាធិការជាតិរៀបចំការបោះឆ្នោត ហៅកាត់ថា គជប គម្រោង ធ្វើការបោះពុម្ពសន្លឹកឆ្នោតជាង១០សន្លឹក និងបម្រុងជាង២សែនសន្លឹកសម្រាប់ការបោះឆ្នោត ជ្រើសតាំងតំណាងរាស្ត្រអាណត្តិទី៦ ឆ្នាំ២០១៨នេះ។ នេះបើតាមអ្នកនាំពាក្យ គជប។ លោក ឌឹម សុវណ្ណារុំ សមាជិក និងជាអ្នកនាំពាក្យគណៈកម្មាធិការជាតិរៀបចំការ បោះឆ្នោត បានផ្តល់បទសម្ភាសន៍ជាមួយក្រុមអ្នកសារព័ត៌មានថា កាលពេលកន្លងមកថ្មីៗនេះ គជប បាន កំណត់ទម្រង់សម្រាប់ការបោះពុម្ពរួចហើយសម្រាប់ធ្វើការបោះពុម្ព។ ក្នុងនោះ គជប គ្រោងនឹងបោះពុម្ពសន្លឹកឆ្នោតចំនួន១០លាន៥សែន ២ម៉ឺន៥ ពាន់៦រយ ៥០សន្លឹក។ សន្លឹកឆ្នោតគំរូមានចំនួន ៣២៩.២០០សន្លឹក។ លោកក៏បានឲ្យដឹងដែរថា «សន្លឹកដែលយើងបោះពុម្ពមានចំនួនច្រើនជាងឈ្មោះអ្នកបោះឆ្នោត ដោយសន្លឹកឆ្នោតមួយសន្លឹក មានតម្លៃ៩០០រៀល។ ក្នុងចំណោមឈ្មោះអ្នកបោះឆ្នោតមានចំនួនជាង៨.៣០០.០០០នាក់។ យើ ងបោះពុម្ពសន្លឹកច្រើននោះដោយសារយើងត្រូវការប្រើប្រាស់សម្រាប់មន្ត្រីបោះឆ្នោត និងអប់រំអ្នកបោះឆ្នោត។
លើសពីនេះទៀត ក្នុង ការិយាយល័យបោះឆ្នោតនីមួយៗ គឺត្រូវមានសន្លឹកបម្រុងសម្រាប់បម្រើ ហើយធានាយ៉ាងណាឲ្យការបោះឆ្នោតមានគ្រប់គ្រាន់ »។ លោកបន្ថែមថា ការបោះឆ្នោតមានចំនួនលើសបែបនេះក៏ត្រូវបានអនុញ្ញាតតាមច្បាប់ផងដែរ ព្រោះថា នៅពេលពលរដ្ឋណាមួយបានគូស ឬមានបញ្ហាសន្លឹកឆ្នោត អាចធ្វើការទាមទារដើម្បីដូរសន្លឹកបាន។ ជាមួយគ្នានោះដែរ អ្នកនាំពាក្យ គជប ក៏បានគូសបញ្ជាក់ថា« គជប គម្រោងសន្លឹកឆ្នោតជាង១០លាន ៥សែនសន្លឹក ហើយសន្លឹកគំរូជាង៣សែនសន្លឹក។ យើងមានអ្នកបោះឆ្នោតជាង៨លាននាក់ ដូច្នេះសន្លឹកឆ្នោតដែលសល់ពីចំនួនឈ្មោះអ្នក ចូលរួមបោះឆ្នោតគឺ ជាសន្លឹកឆ្នោតបម្រុង ដែលមានជាង២សែនសន្លឹក»។ សម្រាប់ការបោះឆ្នោត ជ្រើសតាំងតំណាងរាស្ត្រអាណត្តិទី៦នេះដែរ ត្រូវបាន គជប បានអះអាងថា ទោះបីជាអត្រាអ្នកទៅ បោះឆ្នោតមានចំនួនតិចក៏ដោយក៏មិនបានប៉ះពាល់ដល់ដំណើរការបោះឆ្នោត និងការប្រកាសលទ្ធផលបោះឆ្នោតនោះទេ ព្រោះថាក្នុងច្បាប់មិនបានចែងនោះទេ។ លោកបញ្ជាក់ថា «ក្នុងច្បាប់មិនបានចែងថាទាល់តែអ្នកបោះឆ្នោតមានអត្រាប៉ុណ្ណេះ ទើ បទទួលយកបាន…មានអត្រាប៉ុណ្ណោះ…ទើបទទួលយកបាននោះទេ ។
អ្វីដែល គជប បានធ្វើ និងកំពុងធ្វើគឺឈរលើច្បាប់ គោរពរដ្ឋធម្មនុញ្ញ។ ប្រទេសណាមិនទទួលស្គាល់ជារឿងរបស់គេ រឿង គជប ដំណើរការទៅមុខ ក្នុងនាមជាខ្មែរ អ្នកធ្វើជារឿងរបស់គេ រឿងកម្ពុជា និង គជប ជារឿងគោរពច្បាប់តែមួយ »។ សម្រាប់ការបោះឆ្នោតជ្រើសតាំងតំណាងរាស្ត្រអាណត្តិទី៦នេះ បើឈរតាមយុទ្ធសាស្ត្រនិងគោលការណ៍ច្បាប់នោះ ទោះបីជាអត្រាអ្នកបោះឆ្នោតមានចំនួនប៉ុន្មាន ក៏ដោយក៏ គជប នៅតែទទួលស្គាល់។ កម្ពុជាបានឆ្លងកាត់ការបោះឆ្នោតចំនួន៨លើកមកហើយ សុទ្ធតែជាការបោះឆ្នោតសាកលដែលរៀបចំដោយ គជប ក្នុងនោះប្រជាពលរដ្ឋតែងតែមកបញ្ចេញ សិទ្ធិរបស់ខ្លួន តាមរយៈការមកបោះឆ្នោតបានចំនួនច្រើន មិនក្រោម៧០%នោះទេ។ លោកសង្កត់ធ្ងន់ថា « យើងសង្ឃឹមថាការបោះឆ្នោតនៅពេលខាងមុខនេះ ចំនួនអ្នកទៅ បោះឆ្នោតមិនក្រោយចំនួន៦០ %ទៅ៧០%នោះទេ។ ចំនួននេះយើងមានបទពិសោធន៍រួចមក ហើយប្រជាពលរដ្ឋមានសិទ្ធិបញ្ចេញឆន្ទៈរបស់ខ្លួនក្នុងការគូសគាំទ្រគណបក្សនយោបាយ ដែលខ្លួនស្រឡាញ់ពេញចិត្ត»។ សូមជម្រាបការបោះឆ្នោតជ្រើសតាំងតំណាងរាស្ត្រ អាណត្តិទី៦ នឹងប្រព្រឹត្តទៅនាថ្ងៃទី២៩ ខែកក្កដា ឆ្នាំ២០១៨ ដោយមានគណបក្សនយោបាយចំនួន២០ ចូលរួមប្រកួតប្រជែង៕
ចែករំលែកព័តមាននេះ