ទៀតហើយ ! វិវាទរវាងនគរបាល និងប្រជាពលរដ្ឋ
- ប៉ៃលិន
ខេត្តប៉ៃលិន ៖ រហូតមកដល់ព្រឹកថ្ងៃទី២៩ ខែឧសភា ឆ្នាំ២០១៨នេះ លោក សុទ្ធ សំអោក ចៅក្រមជម្រះក្តី នៃអយ្យការអមសាលាដំបូងខេត្តប៉ៃលិន…
ខេត្តប៉ៃលិន ៖ រហូតមកដល់ព្រឹកថ្ងៃទី២៩ ខែឧសភា ឆ្នាំ២០១៨នេះ លោក សុទ្ធ សំអោក ចៅក្រមជម្រះក្តី នៃអយ្យការអមសាលាដំបូងខេត្តប៉ៃលិន…
ខេត្តប៉ៃលិន ៖ រហូតមកដល់ព្រឹកថ្ងៃទី២៩ ខែឧសភា ឆ្នាំ២០១៨នេះ លោក សុទ្ធ សំអោក ចៅក្រមជម្រះក្តី នៃអយ្យការអមសាលាដំបូងខេត្តប៉ៃលិន បានធ្វើការជម្រះក្តីរឿងករណីមន្ត្រីនគរបាលព្រហ្មទណ្ឌកម្រិតធ្ងន់ នៃស្នងការនគរបាលខេត្ត ដែលបានរងការចោទប្រកាន់ថា បានវាយទៅលើជនរងគ្រោះម្នាក់ បណ្តាលឱ្យបាក់ ឆ្អឹងជំនីអស់២កាំ កាលពីឆ្នាំ២០១៤កន្លងមក។ ហើយក្រោយមកចៅក្រមបានសម្រេចថា នឹងប្រកាសសាលក្រម នៅវេលាម៉ោង៣រសៀល ថ្ងៃទី០២ ខែកក្កដា ឆ្នាំ២០១៨ ខាងមុខនេះ។ សូមបញ្ជាក់ថា បុរសម្នាក់ឈ្មោះ ជា រ៉ាស៊ី អាយុ៣០ឆ្នាំ មុខរបរធ្វើចម្ការ មានទីលំនៅភូមិស្ទឹ ងកាច់ ឃុំស្ទឹងកាច់ ស្រុកសាលាក្រៅ ខេត្តប៉ៃលិន បានប្តឹងឈ្មោះ ផាត គឹមយូ ជាមន្ត្រីនគរបាលព្រហ្មទណ្ឌកម្រិតធ្ងន់ នៃស្នងការនគរបាលខេត្តប៉ៃលិន ថាប្រើអំហិង្សាធ្វើឱ្យបាក់ឆ្អឹងជំនីអស់២កាំ ខណៈដែលចុះទៅចាប់រូបគេពីបទប្រើអំពើហិង្សាក្នុងគ្រួសារ បន្ទាប់ពីពួកគេបានដោះស្រាយគ្នារួចរាល់ នៅប៉ុស្តិ៍នគរបាលរដ្ឋបាល ឃុំស្ទឹងកាច់ បានរយៈពេលប្រហែល១អាទិត្យ។ ហើយសមត្ថកិច្ចចុះទៅចាប់ និងប្រើហិង្សាលើជនរងគ្រោះនេះ បានកើតឡើងនៅវេលាម៉ោង៨ និង៣០នាទីយប់ថ្ងៃទី០២ ខែសីហា ឆ្នាំ២០១៤ ដោយបានបញ្ជូនទៅស្នងការដ្ឋាននគរបាលខេត្តប៉ៃលិន លុះនៅថ្ងៃទី០៤ ខែសីហា សមត្ថកិច្ចក៏បានបញ្ជូនឈ្មោះ ជា រ៉ាស៊ី ទៅតុលាការខេត្ត។ បើតាមសម្តីបុរស ឈ្មោះ ជា រ៉ាស៊ី បានរៀបរាប់ឱ្យដឹងថា កាលពីថ្ងៃទី២៨ ខែកក្កដា ឆ្នាំ២០១៤ វេលាម៉ោង៩ព្រឹក គាត់ និងប្រពន្ធ ឈ្មោះ រ៉ាយ សុខរ៉ា អាយុ២៩ឆ្នាំ បានឈ្លោះប្រកែកគ្នាបន្តិចបន្តួច ស្រាប់តែប្រពន្ធទាញដំបងវាយម៉ូតូបែកកុងទ័រ និងបែកអាវ។ ពេលនោះរូបគេខឹងយ៉ាងខ្លាំង ក៏ស្ទុះទៅទះកំផ្លៀងប្រពន្ធ១ដៃ ។ ក្រោយមកប្រពន្ធក៏រត់ទៅទាញយកកូនកាំបិតចុងស្រួច បម្រុងមកចាក់រូបគេ តែត្រូវជនរងគ្រោះរុញចេញ បណ្តាលឱ្យដួលប៉ះនឹងពាងរលាត់ខ្ទង់ច្រមុះបន្តិច រួចនាងក៏ចេញពីផ្ទះខ្លួនឯង ទៅផ្ទះឪពុកបង្កើតដែលនៅក្បែរគ្នា។
លុះដល់ថ្ងៃទី០១ ខែសីហា ឆ្នាំ២០១៤ ក៏មានការសម្រុះសម្រួលពីចាស់ទុំ និងបានធ្វើកិច្ចសន្យានៅប៉ុស្តិ៍នគរបាល រដ្ឋបាលឃុំស្ទឹងកាច់ ហើយពួកគេ ក៏យល់ព្រមទៅនៅផ្ទះជាធម្មតាឡើងវិញ។ តែមិនដឹងជាមូលហេតុអ្វីនៅថ្ងៃទី០២ ខែសីហា ដដែលវេលាម៉ោង៨ និង៣០នាទីយប់ ស្រាប់តែនគរបាលព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្ត ដឹកនាំដោយលោក ជា វ៉ាន់រ៉ន អតីតក្រឡាបញ្ជីអមសាលាដំបូងខេត្តប៉ៃលិន លោក ឆម វ៉ាន់ធី នាយការិយាល័យព្រហ្មទណ្ឌកម្រិតធ្ងន់ លោក ណុប សាវុធ និងបុរសម្នាក់ឈ្មោះ ផាត គឹមយូ បានប្រើហិង្សាទៅលើរូបគាត់រហូតដល់បាក់ឆ្អឹងជំនីទៅវិញ។ លោកបន្តថា ពេលចុះទៅចាប់ ឈ្មោះ ផាត កឹមយូ បានទះកំផ្លៀងគាត់ចំនួន០៣ដៃ លុះពេលទៅដល់ស្នងការខេត្ត ខណៈចុះពីរថយន្ត សមត្ថកិច្ចរូបនោះ បានទាត់គាត់ចំនួន៣ជើងផ្ទួនៗគ្នាចំឆ្អឹងជំនីផ្អែកខាងស្តាំ លុះពេលបញ្ជូនទៅតុលាការ សមត្ថកិច្ចរូបនេះបានទះកំផ្លៀង២ដៃថែមទៀត ហើយក៏បានស្រែកប្រាប់ឱ្យអ្នកទោសវាយបន្ថែម។
ចាប់ពីថ្ងៃនៅក្នុងពន្ធនាគារ ចេះតែឈឺចុកចាប់ពេញខ្លួនប្រាណ ជាពិសេសឆ្អឹងជំនីផ្នែកខាងស្តាំ រហូតទាល់តែថ្ងៃបងស្រីរបស់គាត់ធានាឱ្យចេញនៅក្រៅឃុំ ឃើញសភាពក្អកធ្លាក់ឈាម សាច់ញាតិក៏បានបញ្ជូនទៅកាន់មន្ទីរពេទ្យខេត្តប៉ៃលិន ដើម្បីព្យាបាល ដោយឆ្លុះអ៊ិក្សរេ ឃើញឆ្អឹងជំនីបាក់អស់២កាំ (កាំទី៧ និងទី៨) ។ លោកសង្ឃឹមថា ខាងច្បាប់នឹងរកយុត្តិធម៌ជូន ដោយលោកបានមើលព័ត៌មាន ឃើញមន្ត្រីនគរបាលដែលប្រព្រឹត្តបទល្មើសជាច្រើននាក់ ត្រូវបានថ្នាក់លើដកតំណែង ហើយក៏មានអ្នកខ្លះជាប់ពន្ធគារផងដែរ។ ចំណែករឿងរបស់លោកកើតតាំងពីឆ្នាំ២០១៤ រហូតមកដល់២០១៨នេះ មិនទាន់ទទួលបានយុត្តិធម៌នោះឡើយ។
ម្យ៉ាងវិញទៀត លោកជាប្រជាពលរដ្ឋសាមញ្ញ មិនចេះតែប្តឹងសមត្ថកិច្ចនោះទេ បើមិនប្រើអំពើហិង្សាមកលើលោកក៏លោកមិនប្តឹងអ្វីនោះដែរ។ នៅក្នុងបន្ទប់ជំនុំជម្រះក្តី លោក ផាត គឹមយូ បានបដិសេធថា រូបលោកបានចុះទៅចាប់ជនរងគ្រោះមែន តែមិនបានប្រព្រឹត្តដូចការចោទប្រកាន់របស់ជនរងគ្រោះ នោះឡើយ ដោយតាំងពីចាប់បញ្ជូនទៅស្នងការ រហូតដល់ទៅក្នុងពន្ធនាគារក៏អត់បានវាយទៅលើរូបគេដែរ ប្រហែលជាអ្នកទោសនៅក្នុងពន្ធនាគារជាអ្នកវាយ ទើបណ្តាលឱ្យបាក់ឆ្អឹងជំនីបែបនេះ។ លោកក៏សូមឱ្យខាងចៅក្រម រកយុត្តិធម៌ជូនលោក ចំពោះការចោទ ប្រកាន់បែបនេះដែរ។ ទោះបីជាយ៉ាងណាក៏ដោយរឿងក្តីមួយនេះ នឹងអាចដឹងថា អ្នកណាខុសអ្នកណាត្រូវនៅពេលតុលាការខេត្ត ប្រកាសសាលក្រមនៅថ្ងៃទី០២ ខែកក្កដា ខាងមុខ ព្រោះខាងច្បាប់នឹងវិនិច្ឆ័យទៅតាមការព្រឹត្តរបស់ជនល្មើស ដោយមិនកាន់ជើងមនុស្សខូចនោះឡើយ៕
https://www.youtube.com/watch?v=uQTBHhu-Wrg
ចែករំលែកព័តមាននេះ