រាជធានីភ្នំពេញ ៖ បុរសម្នាក់សង្ស័យដឹងខ្លួនឯងមិនស្រួលខ្លួន កំពុងបើកបររថយន្ត ឈប់អែបកៀនខាងចិញ្ចើមផ្លូវហើយដេក បែរជាស្លាប់បាត់ សង្ស័យខ្យល់គ ។ ហេតុការណ៍នេះបង្កឲ្យភ្ញាក់ផ្អើលកាលពីវេលាម៉ោង១០និង១០នាទីព្រឹក ថ្ងៃទី២៩ ខែឧសភា ឆ្នាំ២០១៨ ស្ថិតនៅលើផ្លូវលេខ១៩៥៨ ភូមិទំនប់ សង្កាត់ភ្នំពេញថ្មី ខណ្ឌសែនសុខ ។
បុរសដែលស្លាប់ឈ្មោះ ហាន គុណផានិត អាយុ៤០ឆ្នាំ មុខរបរបុគ្គលិកក្រុមហ៊ុនមួយ ។
តាមប្រជាពលរដ្ឋបានឲ្យដឹងថា មុនពេលកើតហេតុ គេឃើញបុរសម្នាក់បើកបររថយន្តមួយគ្រឿងម៉ាកហ៊ីយ៉ាន់ដាយ ប្រភេទទេសចរណ៍ ពណ៌ស ពាក់ស្លាកលេខ ភ្នំពេញ ២AS-២៧៦៦ ខាងលើ បើកតាមផ្លូវ១៩៥៨ ពីលិចទៅកើត លុះដល់ចំណុចខាងលើ បើកអែបខាងចិញ្ចើមផ្លូវ បើកកញ្ចក់សងខាង បញ្ឆេះម៉ាស៊ីនរថយន្ត ហើយបុរសនោះដេកទ្រោបឱបជាប់នឹងដៃចង្កូត តាំងពីវេលាម៉ោង៨និង១៥នាទីព្រឹកមកម៉្លេះ រហូតដល់វេលាម៉ោង១០និង១០នាទីទៅហើយ នៅតែឃើញដេកក្នុងរថយន្ត មិនព្រមបើកចេញ ដោយងឿងឆ្ងល់ ពលរដ្ឋដើរទៅអើតមើល ទើបដឹងថា ស្លាប់បាត់ទៅហើយ ក៏បានឆោឡោឡើង និងរាយការណ៍ប្រាប់សមត្ថកិច្ច ។
ស្របពេលដែលពលរដ្ឋ និងសមត្ថកិច្ចកំពុងភ្ញាក់ផ្អើល ស្រាប់តែលេចមុខបុរសម្នាក់មកអះអាងថា ជារថយន្តខ្លួន ហើយបានឲ្យបុរសរងគ្រោះខាងលើបើកយកទៅលាងសំអាតដើម្បីដឹកប្រពន្ធគាត់ទៅកម្មវិធីនៅផ្សារអ៊ីអន ដោយបុរសរងគ្រោះខាងលើបើកចេញពីផ្ទះគាត់តាំងពីម៉ោង៧និង៣០នាទីមកម៉្លេះ ក្រោយចេញពីផ្ទះបាត់នៅវេលាម៉ោង៨និង៣០នាទីព្រឹក មិនឃើញបុរសរងគ្រោះខាងលើបើករថយន្តមកវិញ ក៏ទូរស័ព្ទរក តែមិនលើក គាត់ក៏បានបើករថយន្តស្វែងរក ក្រែងមានបញ្ហាអ្វី ហើយក៏ប្រទះឃើញរថយន្ត និងឃើញបុរសរងគ្រោះស្លាប់ទៅវិញ ។
ក្រោយប្រទះឃើញបុរសម្នាក់ស្លាប់ក្នុងរថយន្ត សមត្ថកិច្ចមូលដ្ឋាន និងសមត្ថកិច្ចជំនាញបានចុះទៅពិនិត្យដល់កន្លែងកើតហេតុ គ្រាន់តែសន្និដ្ឋានជំហានដំបូងថា ស្លាប់ដោយសារគាំងបេះដូង ៕
ចែករំលែកព័តមាននេះ