ក្រុមហ៊ុន «Orion Span» ក្នុងសហរដ្ឋអាមេរិកបង្ហើបឲ្យដឹងថាមានគម្រោងបើកសណ្ឋាគារដ៏ទំនើបមួយនៅលើលំហអវកាសជាលើកដំបូងនៅលើពិភពលោកក្នុងស្ថានីយអវកាស «Aurora Station» នៅឆ្នាំ២០២១ ។ លោកហ្វ្រែង ប៊ុនហ្គ័រ(Frank…
ក្រុមហ៊ុន «Orion Span» ក្នុងសហរដ្ឋអាមេរិកបង្ហើបឲ្យដឹងថាមានគម្រោងបើកសណ្ឋាគារដ៏ទំនើបមួយនៅលើលំហអវកាសជាលើកដំបូងនៅលើពិភពលោកក្នុងស្ថានីយអវកាស «Aurora Station» នៅឆ្នាំ២០២១ ។
លោកហ្វ្រែង ប៊ុនហ្គ័រ(Frank Bunger) ជាម្ចាស់សណ្ឋាគារបានថ្លែងថា «គោលដៅរបស់យើងគឺធ្វើឲ្យអវកាសក្លាយជាកន្លែងដែលមនុស្សគ្រប់រូបចូលទៅដល់» ។ ក្រុមហ៊ុនបានគិតថ្លៃក្នុងការធ្វើដំណើរ និងស្នាក់នៅរយៈពេល១២ថ្ងៃ ចំនួន៩,៥លានដុល្លារ ឬត្រឹមតែពាក់កណ្ដាលនៃថ្លៃចំណាយពី២០ទៅ៤០លានដុល្លារដែលមនុស្សមានអាយុពី១៧ឆ្នាំឡើងតែ៧នាក់ធ្លាប់ចំណាយទៅកម្សាន្តនៅស្ថានីយអវកាសអន្តរជាតិកន្លងមក ។
បច្ចុប្បន្នបានបើកឲ្យកក់ទុកជាមុនតាម ប្រព័ន្ធអនឡាញ ប៉ុន្តែត្រូវបង់ថ្លៃកក់ក្នុងតម្លៃ៨០.០០០ដុល្លារ ព្រោះអាចទទួលអ្នកដំណើរច្រើនបំផុតក្នុងមួយលើកតែ៤នាក់ ធ្វើដំណើរជាមួយអវកាសយានិកចំនួន២នាក់ និងត្រូវហ្វឹកហ្វឺនរយៈពេល៣ខែដើម្បីឲ្យសម្របខ្លួនលើការរស់នៅក្នុងស្ថានភាពគ្មានកម្លាំងទំនាញនៅក្នុងកម្រិតកម្ពស់ជាង៣០០គីឡូម៉ែត្រពីផែនដី ។
លោកប៊ុនហ្គ័របញ្ជាក់ថា «អ្នកដែលធ្វើដំណើរទៅជាមួយយើងនឹងបានប្រឡូកលើបទពិសោធន៍ដែលគ្មានថ្ងៃបំភ្លេច» ។
សា្ថនីយអវកាសនេះនឹងគោចរនៅជុំវិញផែនដី១ជុំនៅរៀងរាល់៩០នាទីម្ដង មានន័យថាក្នុងរយៈពេល២៤ម៉ោងនឹងបានឃើញព្រះអាទិត្យរះ និងលិចចំនួន១៦លើក រួមទាំងបានឃើញពន្លឺនៅតំបន់ប៉ូលខាងជើង-ខាងត្បូង ឬ«Orora»ផងដែរ ។ ក្រៅពីនេះក៏បានចូលរួមសប្បាយក្នុងការដាំបន្លែនៅក្នុងលំហ ហើយនៅពេលត្រឡប់មកផែនដីវិញក៏បានយកវត្ថុនោះមករក្សាទុកនៅផ្ទះធ្វើជាអនុស្សាវរីយ៍ ៕
ចែករំលែកព័តមាននេះ