នេះគឺជាលើកទី២ក្នុងប្រវត្តិសាស្ត្ររបស់ក្រុមជម្រើសជាតិសេណេហ្គាល់ នៅក្នុងព្រឹត្តិការណ៍ប្រកួតពានរង្វាន់ពិភពលោក World Cup ចាប់តាំងពីបង្ហាញខ្លួនលើកដំបូងកាលពីឆ្នាំ២០០២ ដែលពេលនោះពួកគេមានឱកាសឡើងដល់វគ្គ៨ក្រុមចុងក្រោយ តែចាញ់តួកគីក្នុងម៉ោងបន្ថែម០ទល់នឹង១ ។
បន្ទាប់ពីខកខានអស់ជាច្រើនរដូវកាលកន្លងមកនេះ សេណេហ្គាល់បានត្រឡប់មកវិញជាមួយនឹងទម្រង់លេងប្លែកគួរឱ្យកត់សម្គាល់ ខណៈការប្រកួតវគ្គជម្រុះបឋមតាមតំបន់ ពួកគេបានបញ្ចប់ទៅដោយមិនចាញ់១លើកសោះ ។ ម្យ៉ាងទៀត ក្រុមមកពីទ្វីបអាហ្វ្រិកខាងលើកំពុងឈរនៅចំណាត់ថ្នាក់លេខ២៨ក្នុងតារាង FIFA ទៀតផង ។
ក្តីរំពឹង ៖ សេណេហ្គាល់ត្រូវបានគេទទួលស្គាល់ថាជាក្រុមដែលមានប្រព័ន្ធការពាររឹងមាំ ថែមទាំងការបញ្ជូនបាល់ពីតំបន់មួយទៅតំបន់មួយ ពួកគេលេងស៊ីចង្វាក់គ្នាល្អណាស់ ។ សេណេហ្គាល់ដែលកំពុងស្ថិតនៅពូល H ក្នុងវគ្គចែកពូលរដូវកាលនេះ ហាក់រងសម្ពាធច្រើន និងមានសង្ឃឹមតិចតួចប៉ុណ្ណោះ ព្រោះពួកគេត្រូវប្រឈមជាមួយប៉ូឡូញ កូឡុំប៊ី និងជប៉ុន ។ ប្រសិនបើមានឱកាសឡើងដល់វគ្គ១៦ក្រុម នោះវាជាជោគជ័យដ៏ធំធេងមួយហើយសម្រាប់ពួកគេ ។
គ្រូបង្វឹក ៖ អតីតគ្រូបង្វឹក U23 លោក Aliou Cissé ត្រូវបានតែងតាំងឱ្យមកដឹកនាំក្រុមជម្រើសជាតិឈុតធំនៅឆ្នាំ២០១៥ ជាមួយនឹងការតាំងចិត្តខ្ពស់ថាអាចជ្រោមជ្រែង សេណេហ្គាល់ឆ្លងផុតវគ្គចែកពូលបានដោយជោគជ័យ ។ គ្រូបង្វឹកវ័យ៤២ឆ្នាំរូបនេះ ក៏ធ្លាប់ជាខ្សែការពាររឹងមាំមួយរូបផងដែរក្នុងអាជីពជាកីឡាករអំឡុងឆ្នាំ១៩៩៤ ដល់ឆ្នាំ២០០៩ ។ ម្យ៉ាងទៀត ជ័យជម្នះរហូតពួកគេឡើងដល់វគ្គ៨ក្រុមកាលពីឆ្នាំ២០០២ ក៏កើតចេញពីការខិតខំប្រឹងប្រែងរបស់អតីតខ្សែការពារប្រធានក្រុមលោក Aliou Cissé ផងដែរ ។
កីឡាករ Super Star ប្រចាំក្រុម ៖ សន្ទុះលេងមិនថាល្បឿនប្រយុទ្ធ និងការបង្កើតឱកាសរកគ្រាប់បាល់ រួមទាំងបទពិសោធន៍ប្រកួតច្រើនឆ្នាំ កីឡាករ Sadio Mane បានដើរតួយ៉ាងសំខាន់ទាំងនៅក្រុមជម្រើសជាតិ និងក្លិបLiverpool ។ ខ្សែបម្រើប្រយុទ្ធវ័យ២៦ឆ្នាំរូបនេះ បង្ហាញខ្លួនឱ្យក្រុមជម្រើសជាតិបាន៤៩ប្រកួត ស៊ុតបាន១៤គ្រាប់ ខណៈវត្តមាននៅក្លិបហង្សក្រហមចំនួន៥៦លើក Sadio Mane រកបាន២៣គ្រាប់ ។
បញ្ជីឈ្មោះសមាសភាពកីឡាករសរុប (បណ្តោះអាសន្ន) ៖
-អ្នកចាំទី ៖ Khadim N’Diaye (Horoya), Abdoulaye Diallo (Rennes), Alfred Gomis (SPAL) ។
-ខ្សែការពារ ៖ Kara Mbodji (Anderlecht), Lamine Gassama (Alanyaspor), Kalidou Koulibaly (Napoli), Salif Sané (Hannover), Saliou Ciss (Valenciennes), Moussa Wagué (Eupen), Youssouf Sabaly (Bordeaux) ។
-ខ្សែបម្រើ ៖ Idrissa Gueye (Everton), Cheikhou Kouyaté (West Ham), Cheikh N’Doye (Birmingham), Alfred N’Diaye (Wolver), Badou Ndiaye (Stoke City) ។
-ខ្សែប្រយុទ្ធ ៖ Sadio Mané (Liverpool), Moussa Sow (Bursaspor), Mame Biram Diouf (Stoke City), Moussa Konaté (Amiens), Keita Baldé (Monaco), Ismaïla Sarr និង Diafra Sakho (Rennes), M’Baye Niang (Torino), Oumar Niasse (Everton), Khouma Babacar (Sassuolo) ៕
ចែករំលែកព័តមាននេះ